BAIBOL NA WENE OHWO

MRẸ obo ri mu ọshare ọvo ro phi idjogba ro ji chuji vwo wene akpeyeren rọyen. Se obo ro vwori rọ cha ta.

“Onẹ ra djẹ womarẹ iyesi vwerhẹn ovwẹ oma mamọ.”​—RICHARD STEWART

UKPE RE VWIẸRẸ: 1965

ẸKUOTỌ RO NURHE: JAMAICA

AKPỌ RO YERIN JOVWO: ONOGBOZIGHI RO JI PHI IDJOGBA

AKPỌ MI YERIN JOVWO: Ekogho rẹ igbere de bun mamọ vwẹ Kingston, rọ dia otorere ri Jamaica yen me dia ghwanre. Ihwo buebun vwo iruo rẹ ayen ruẹ-ẹ, ozighi ji bun vwọ mamọ. Oshọ ko muẹ ihwo buebun fikirẹ ihwo ri gbozighi na. Kẹdẹ kẹdẹ yen mi vwo nyo edo rẹ ihwunu ra sa.

Oni mẹ wianre gangan vwọ vwẹrote vwe vẹ iniọvo mẹ itete ivẹ. Ọ davwẹngba rọyen avwanre vwo kpo omamọ isikuru. Mi ghwe vwo omavwerhovwẹn kpahen isikuru-u, ẹkẹvuọvo mi vwo ẹguọnọ rẹ iyesi mamọ ọtiọyen ji te e vwo nughe rẹ onẹdjẹ rayen. Ukperẹ mi vwo kpo isikuru, asan iyesi da djonẹ kọyen me ra. Me tobọ gua komobọ.

O kriri-i, ke me womarẹ onẹdjẹ rẹ iyesi na vwo te idjogba. Akpereyen ọfanrhiẹn kọyen mi yerẹn. Mi phopho igbo ji vwobọ vwẹ ujiecho rere me sa vwọ mrẹ igho vwo te idjogba ji yerẹn akpọ ọfanrhiẹn. Mi vwo ihwunu buebun, ẹkẹvuọvo oma vwerhen ovwẹ nẹ mi hwe ohwo vuọvo vwẹ ujiecho buebun ri mi vwobọ vwọ na-a.

Ukuko na, elọkpa de mu vwe phiyọ uwodi fikirẹ ozighi egbe mẹ na. Ọke re vwo siobọnu vwe nu, me da rhoma ton oka rẹ akpọ mi yerẹn jovwo phiyọ. Ke me tobọ rhoma bra vrẹ obo ri jovwo. Dede nẹ mi vwo opharo rẹ ohwo ro che se ru emu ọbrabra-a, jẹ obo ri wenvwe yen mi ruẹ, mi vwo orharhe ophu vẹ uruemu rẹ ọkon. Mi se ihwo gbemu-u.

OBORẸ BAIBOL NA WENE AKPEYEREN MẸ WAN: Vwẹ uvwre rẹ ọke ri mi ji vwo vwobọ vwẹ erọnvwọn ebrabra na, oni mẹ de yono Baibol na je dia ọvo usun rẹ Iseri ri Jihova. Mi vwo oniso rẹ ewene evo vwẹ akpeyeren rọyen, ọ da nẹrhẹ mi vwo ẹwẹn me vwọ guọnọ obo re so ewene na. Mi de brorhiẹn me vwọ hiẹ guọnọ obo ri muro vwo ru ewene, ọtiọyena, ki mi nene iseri ri Jihova yono Baibol na kuẹgbe.

Me mrẹvughe nẹ iyono rẹ Iseri ri Jihova fẹnẹ ọ rẹ ẹga efa, ayen ji muẹ oborẹ ayen ta eje kpahen Baibol na. Ayen ọvo yen ihwo ri mi niso nẹ i ghwoghwo nẹ uwevwin kpo uwevwin kirobo rẹ Inenikristi rẹ ẹgbukpe ujorin rẹsosuọ ruru. (Matiu 28:19; Iruo Rẹ Iyinkọn Na 20:20) O de rhi muvwẹro nẹ me mrẹ ẹga rẹ uyota na re ọke me vwọ mrẹ ẹguọnọ ro nẹ otọ ẹwẹn rhe rẹ ayen djephia vwọ kẹ ohwohwo.​​—Jọn 13:35.

Kirobo ri mi yonori vwẹ Baibol na, me da rhe mrẹvughe nẹ ofori mi vwo ru ewene ride vwẹ akpeyeren mẹ. Mi yonori nẹ Jihova vwo utuoma kpahen ọfanrhiẹn, ọtiọyena, ofori nẹ mi ru ewene rere oma mẹ vwọ vwerhọn. (2 Kọrẹnt 7:1; Hibru 13:4) O te vwe ẹwẹn mamọ me vwọ mrẹvughe nẹ oborẹ mi ruẹ sa da Jihova yẹrẹ nẹrhẹ oma vwerhọn. (Isẹ 27:11) Ọtiọyena mi de brorhiẹn me vwọ dobọ rẹ igbo ephopho ji, mi de ji do ihwunu mẹ kufia, je davwẹngba vwo ru ewene vwẹ akpeyeren mẹ. Ọvo usun rẹ ewene rọ bẹn vwẹ eruo yen me vwọ dobọ rẹ akpeyerẹn ọfanrhiẹn ji, je kẹnoma kẹ idjogba.

Ẹsosuọ me ka guọnọ nẹ igbeyan mẹ riẹn nẹ mi yono Baibol na vẹ Iseri ri Jihova-a. Ẹkẹvuọvo, me kpairoro vrẹ iroro tiọyen ọke mi vwo se oborẹ Jesu tare vwẹ Matiu 10:​33, ọ da ta: “Ohwo kohwo rọ sen vwẹ vwẹ irharo rẹ ihwo, ọye me je sen vwẹ obaro rẹ ọsẹ mẹ rọ hẹ obo odjuvwu.” Owọrota yena chọn vwẹ uko vwọ vuẹ igbeyan mẹ nẹ mi nene Iseri ri Jihova yono Biabol na kuẹgbe. O gbe ayen unu. O mu ayen ẹro nẹ ohwo kerẹ omẹvwẹ na che vwo ẹwẹn rọ vwọ dia Onenikristi-i. Ẹkẹvuọvo, me da vuẹ ayen nẹ me guọnọ yeren oka rẹ akpọ mi yerẹn jovwo-o.

ERERE RE ME MRẸRE: Oma vwerhen oni mẹ mamọ ọke rọ vwọ mrẹ nẹ me vwẹ iyono ri Baibol na vwo ruiruo vwẹ akpeyeren mẹ. Enẹna, oshọ rẹ oborẹ mi ruẹ rhe muo-o. Avwanre nabọ kẹrẹ ohwohwo asaọkiephana fikirẹ ẹguọnọ avwanre vwo kpahen Jihova. Ọkiọvo mi de ni kpuko roro kpahen oka rẹ akpọ mi yerin jovwo, ko gbevwunu nẹ mi se ru ewene nana fikirẹ ukẹcha ri Jihova. Mi rhe vwo ẹwẹn mi vwo vwobọ vwẹ uruemu rẹ ọfanrhiẹn ji mu akpeyeren mẹ vwọ kpahen ẹvwọtua rẹ ekuakua rẹ akpeyere-en.

Ọ dia uyono ri Biabol ri mi rhiabọreyọ jovwo-o, manẹ mi ghwure yẹrẹ je me hẹ uwodi enẹna. Mi vwo uvi rẹ orua rẹ oma vwerhan asaọkiephana. Oma vwerhen ovwẹ mamọ nẹ mẹ vẹ aye mẹ kugbe ọmọtẹ mẹ ga Jihova sasasa. Me kpẹvwẹ Jihova nẹ o rhiabọreyọ ovwẹ kerẹ ọvo usun rẹ idibo rọyen. Oma vwerhen ovwẹ nẹ ohwo ọvo jowọ o vwo yono uvwe uyota ri Baibol na. Mi ji nẹ uphẹn ri mi vwo yono ihwo obo ri Baibol na tare ghanghanre. Me kpẹvwẹ Jihova mamọ vwọ kẹ ẹguọnọ vẹ uruemu esiri rọyen ro si vwe kẹrẹ.

[Ẹkpo rọ teyenphia vwẹ]

“Me mrẹvughe nẹ oborẹ mi ruẹ sa da Jihova yẹrẹ nẹrhẹ oma vwerhọn”

[Uhoho rọhẹ]

Mẹvwẹ, aye mẹ kugbe ọmọtẹ mẹ

[Uhoho rọhẹ]

Mi vwo oniso rẹ ewene evo vwẹ akpeyeren rẹ oni mẹ