Geeshsha Maxaafay Asay Laamettanaadan Oottees

CEERIYAA kaaˈiyaanne asa keettaa mentti geli wuuqqiya issi bitanee ba iita amaliyaa agganaadaaninne ba deˈuwan laamettanaadan aybi maaddidee? I yootidobaa nabbaba.

“Paraa togan annaacettiyoogaa dosays.”—RICHARD ISTIWARTA

YELETTIDO LAYTTAA: 1965

YELETTIDO BIITTAA: JAMAYKA

KASE TAARIKIYAA: CEERIYAA KAASSANCHCHANNE DANOBAA OOTTIYAAGAA

KASE DEˈUWAA: Taani Jamayka waanna kataman Kingisttenen, hiyyeesa asay corattidi deˈiyo heeran diccaas. Daro asawu oosoy baynna gishshawu, daroti danobaa oottoosona. Bonqqiyaageeti asay hirggiiddi deˈanaadan oottidosona. Asay shugguxiyaa xuussishin ubba gallassi siyays gaana danddayays.

Mino oosanchcha gidida taayyiyaa taassi, ta kaalo ishaassinne michcheessi hanennabi baawa. A nuuni loˈˈo timirtte keettan tamaaranaadan oottaasu. Taani timirttiyaa darin dosikke, shin paraanne paraa togan annaacettiyoogaa dosays. Yaatiyo gishshawu, timirttiyaa aggada, annaacettiyo sohuwaa bays. Paraakka toggays.

Taani takkennan paraa annaaciyan keesettiyoogan daro miishshaa wurssiyoogaa doommaas. Qassi daro maccaasaara shaaramuxaas. Maruwaana cuwayays; qassi hegawu koshshiya miishshaa demmanawu asaappe bonqqays. Tawu daro shugguxee deˈees; shin taani darotoo asaappe bonqqishin, ooninne hayqqibeenna gishshawu haˈˈi ufayttays.

Guyyeppe, taani daro danobaa oottidoogaa gaasuwan poliseti tana oyqqidi qasho keetti gelissidosona. Birshshetta simmada, kaseegaadankka deˈiyoogaa doommaas. Ubba taani kaseegaappe yaa iitaas. Taani suure asa milatikkokka, morgge zozza, hanqqettiyaanne meqettaa iita asa. Taappe attin hara oossinne qoppikke.

TAANI LAAMETTANAADAN GEESHSHA MAXAAFAY MAADDIIS: Taani hegaadan iita deˈuwaa deˈishin, taayyiyaa Geeshsha Maxaafaa xannaˈada Yihoowa Markka gidaasu. I eeshshay kaseegaappe loˈˈidoogaa beˈada aybissakko eranawu koyaas. Taayyiyaa laamettanaadan oottidabaa eranawu koyido gishshawu, Yihoowa Markkatuura Geeshsha Maxaafaa xannaˈiyoogaa doommaas.

Yihoowa Markkatu timirttee hara haymaanootetuugaappe dummatiyoogaa eraas; qassi eti tamaarissiyo ubbabaa Geeshsha Maxaafaappe yootiyoogaa akeekaas. Qassi beni Kiristtaaneti oottidoogaadan, sooppe soo biidi sabbakiyaageeti eta xalla gidiyoogaa eraas. (Maatiyoosa 28:19; Oosuwaa 20:20) Eti issoy issuwaara tumuppe siiqettiyoogaa beˈada, taani tumu haymaanootiyaa demmidoogaa akeekaas.—Yohaannisa 13:35.

Geeshsha Maxaafaappe tamaaridobay taani ta deˈuwan daro laamettana koshshiyoogaa akeekanaadan oottiis. Xoossaa Yihooway shaaramuxiyaageeta ixxiyoogaanne taani A ufayssana koyikko, ta asatettaa tunissiyaabaa oottiyoogaa aggana bessiyoogaa akeekaas. (2 Qoronttoosa 7:1; Ibraawe 13:4) Ta haniyoobay Yihoowa azzanttana woy ufayssana danddayiyoogaa eridoogee taani laamettanaadan denttettiis. (Leemiso 27:11) Hegaa gishshawu, maruwaana cuwayiyoogaanne shugguxiyaa oyqqiyoogaa agganawu, qassi tawu loˈˈo eeshshay deˈanaadan murttaas. SHin shaaramuxiyoogaanne ceeriyaa kaaˈiyoogaa agganaagee tana keehi metiis.

Taani Yihoowa Markkatuura Geeshsha Maxaafaa xannaˈiyoogaa ta laggeti eranaadan koyro koyabeykke. SHin Yesuusi, “Asa sinttan tana kaddiya oonanne taanikka qassi saluwan de7iya ta Aawaa sinttan a kaddana” giidoogaa, Maatiyoosa 10:33n nabbabada, laamettana bessiyoogaa akeekaas. Hagee taani Yihoowa Markkatuura xannaˈaydda deˈiyoogaa ta laggetussi yootanaadan denttettiis. Eti hegaa siyidi dagammidosona. Ta mala asi Kiristtaane gidanawu koyidoogaa eti ammanana danddayibookkona. SHin taani kaseegaa mala deˈuwaa mule deˈana koyennaagaa etawu yootaas.

TAANI GOˈETTIDO HANOTAA: Taani Geeshsha Maxaafaa maaraadan deˈiyoogaa doommidoogaa taayyiyaa beˈada keehi ufayttaasu. Hegaappe guyyiyan, tana iitabaa oottees gaada hirggiyoogaa aggaasu. Nuuni Yihoowa siiqiyo gishshawu, haˈˈi issoy issuwaara keehi siiqettoos. Issi issitoo, taani kase ay mala asakko qoppada, Xoossay maaddin haˈˈi laamettido hanotaa hassayiyo wode maalaalettays. Taani shaaramuxayddanne miishshaa siiqaydda deˈido kase deˈuwaa haˈˈi mule amottikke.

Taani Geeshsha Maxaafaa zoriyaa siyennaakko, hannoode hayqqaas woy qasho keettan deˈays. Haˈˈi ta so asaara ufayssiya deˈo deˈays. Tana kaafiya machcheeranne azazettiya naˈeera Xoossaa Yihoowawu haggaaziyoogee tana keehi ufayssees. Taani siiqettiya nu ishanttu maabaraa yara gidanaadan Yihooway oottido gishshawu keehi galatays. Issi uri tana Geeshsha Maxaafaa tamaarissanawu daafurido gishshawu keehi galatays. Harata Geeshsha Maxaafaa tamaarissiyo maataakka xoqqu oottada xeellays. Ubbaappe aaruwan, Yihooway ba aaro kehatettan tana baakko shiishshido gishshawu A keehippe galatays.

[Qonccissuwaa]

“Ta haniyoobay Yihoowa azzanttana woy ufayssana danddayiyoogaa eridoogee taani laamettanaadan denttettiis”

[Misiliyaa]

Ta machcheeranne ta naˈeera

[Misiliyaa]

Taayee eeshshay kaseegaappe loˈˈidoogaa akeekaas