Ifingalenga Ulupwa Ukuba ne Nsansa

Mwe Baupana, Mulebombela Pamo pa Kuti Mulecindamika Ifya kwa Lesa

Ba Frederick batile *: “Ilyo fye twaupene, nalefwaya sana ukuti tulesambilila Baibolo pamo no mukashi wandi, Leanne. Nalefwaisha ukuti umukashi wandi alebikako sana amano nga tulesambilila. Lelo talepoosako amano. Kabili nga namwipusha icipusho, aleasuka fye ati, ee nangu awe, epela. Ifyo aleasuka te fyo nalefwaya ukuti e fyo aleasuka nga tulesambilila Baibolo.”

Ba Leanne batile: “Nali ne myaka 18 ilyo twaupene na ba Frederick. Lelo lyonse fye nga tulesambilila, ba Frederick balelanda fye pa filubo fyandi ne fyo nalingile ukucita pa kuti mbe umukashi umusuma. Calenkalipa sana kabili nalifuupwilwe!”

BUSHE muletontonkanya ukuti bwafya nshi ba Frederick na ba Leanne bakwete mu cupo cabo? Kwena ifyo bonse balefwaya fyali fye bwino. Bonse balitemenwe Lesa, kabili balishibe no kuti calicindama ukusambilila Baibolo pamo. Lelo ukusambilila Baibolo ukwali no kubalenga ukulaumfwana, kwalemoneka kwati e kwalelenga ukuti belaumfwana. Bafwile balesambilila Baibolo pamo, lelo tabalecindamika ifya kwa Lesa.

Mibele ya musango nshi Abena Kristu balingile ukukwata? Mulandu nshi abaupana balingile ukubombesesha pa kuti babe ne yo mibele? Mafya nshi bengakwata ilyo bale-esha ukuba ne yi mibele, kabili kuti bacita shani pa kuti bayapwishe?

Mibele ya Musango Nshi Abena Kristu Balingile Ukukwata?

Baibolo yalilondolola imibele yalekanalekana iyo abantu bengakwata. (Yuda 18, 19) Ku ca kumwenako, Paulo, uwalembeleko Baibolo, alilandile pa fyo imibele ya muntu uwacindamika ifya kwa Lesa yapusana no ukonkelela ififwaya umutima wakwe. Paulo atile, abakonkelela ififwaya imitima yabo, babika fye amano ku fyo abene balefwaya, tababika amano ku bantu bambi. Bacita fye ifyo abene bamona ukuti fisuma, tabakonka amafunde ya kwa Lesa.—1 Abena Korinti 2:14; Abena Galatia 5:19, 20.

Lelo abacindamika ifya kwa Lesa, balakonka amafunde yakwe. Bamona Yehova Lesa ukuti ni  Cibusa wabo kabili balesha na maka ukupashanya imibele yakwe. (Abena Efese 5:1) Ici calenga ukuti babe abafuuka, aba cikuuku, no kuba no kutemwa. (Ukufuma 34:6) Kabili balomfwila Lesa nangu ifintu fyafye shani. (Amalumbo 15:1, 4) Ba Darren abekala ku Canada kabili ababa mu cupo pa myaka 35, batile: “Naishiba ukuti umuntu uwacindamika ifya kwa Lesa lyonse fye alatontonkanya pa fyo imilandile yakwe ne mibele fingakuma bucibusa bwakwe na Lesa.” Abena mwabo ba Jane nabo balundilepo ukuti: “Umwanakashi uwacindamika ifya kwa Lesa, ni ulya uubombesha cila bushiku ukukwata ifisabo fya mupashi wa kwa Lesa.”—Abena Galatia 5:22, 23.

Kwena, tacipilibula ukuti pa kuti umuntu alecindamika ifya kwa Lesa kano aupwa nelyo ukuupa. Na kuba, Baibolo isambilisha ukuti umuntu fye onse alingile ukusambilila pali Lesa no kulamupashanya.—Imilimo 17:26, 27.

Mulandu Nshi Abaupana Balingile Ukulabombela Pamo pa Kuti Balecindamika Ifya kwa Lesa?

Nomba mulandu nshi abaupana balingile ukwesesha na maka ukulabombela pamo pa kuti balecindamika ifya kwa Lesa? Tontonkanyeni pali ici cilangililo: Tutile kuli abantu babili abakwata ibala kabili balefwaya ukulimamo umusalu. Umo alefwaya ukutanda imbuto pa nshita imo iya mwaka, e lyo umbi aletontonkanya ukuti balingile ukutanda imbuto pa nshita imbi. Umo alefwaya ukubikamo umufundo, lelo umbi akaana, alemona ukuti umusalu kuti wakula fye bwino nangu tababikilemo umufundo. Umo alefwaya ukulabomba mwi bala cila bushiku, lelo umbi talefwaya, alefwaya ukulatambako fye ilyo umunankwe alebomba. Kwena muli ili bala umusalu kuti wabamo, lelo te kuti ufule nga filya cingaba nga ca kutila aba bantu babili balesuminishanya mu fintu no kubombela pamo.

Umulume no mukashi baba kwati ni aba bantu babili abo twalandapo. Kwena, nga ca kutila umo fye mu cupo e wacindamika ifya kwa Lesa, ifintu kuti fyabako bwino. (1 Petro 3:1, 2) Lelo ifintu kuti fyaba bwino sana mu cupo cabo nga ca kuti bonse babili balekonka amafunde ya kwa Lesa kabili bale-esha na maka ukulabombela pamo ilyo balebombela Lesa! Imfumu ya mano Solomone yalembele ukuti: “Ukuba babili kwawama ukucila ukuba weka.” Mulandu nshi? “Pantu bena balalambulwa icisuma pa kubombesha kwabo. Pantu umo nga awa, umunankwe kuti amwimya.”—Lukala Milandu 4:9, 10.

Ukwabula no kutwishika imwe na bena mwenu mulafwaya ukucindamika ifya kwa Lesa. Lelo nga filya fine abalefwaya ukulima ibala babombela pamo, e fyo na imwe mulingile ukucita. Natulande pa mafya yabili ayo mwingakwata ne fyo mwingayapwisha.

UBWAFYA BWA KUBALILAPO: Tatwakwata inshita. Ba Sue abaupilwe fye nomba line batile: “Abena mwandi besa mu kunsenda ukufuma ku ncito ne nshita ya 19:00 hrs. Nga twafika ku ng’anda, tulakwata imilimo iingi iya kubomba. Tulafwaisha ukusambilila pali Lesa, lelo cilafya nga nshi pantu tulanaka sana ica kuti tufwaya fye ukutuusha.”

Ifyo mwingacita: Sangeniko inshita imbi kabili mulebombela pamo. Ba Sue batile: “Ine na bena mwandi twapingwilepo ukulabuuka lucelocelo no kulalanshanya amashiwi ya mu Baibolo ilyo tushilaya ku ncito. Kabili balangafwako imilimo ya pa ng’anda pa kuti ndekwata inshita ya kuba pamo nabo.” Busuma nshi bwafuma mu kubombesha kwabo? Ba Ed, abalume ba ba Sue batile: “Nalimona ukuti ine na Sue nga tulelanshanya lyonse ifya kwa Lesa, tuleshiba bwino ifya kupwisha amafya kabili amasakamika yesu yalacepa.”

Pa mbali ya kulanshanya, calicindama ukuti cila bushiku mulekwatako inshita ya kupepela capamo. Bushe ukucita ifi kuti kwamwafwa shani? Ba Ryan, abaikala mu cupo pa myaka 16, batile: “Tapalapita sana inshita ukutula apo ine no mukashi wandi twakwatile amafya mu cupo. Lelo twalisangileko inshita ya kupepela pamo ilyo tushilaya mu kusendama, kabili twalelondolwela Lesa fyonse ifyaletusakamika. Nalishiba ukuti ukupepela pamo kwalitwafwa ukupwisha amafya no kuba ne nsansa mu cupo na kabili.”

ESHENIKO IFI: Cila bushiku muleshako inshita ya kulanshanya pa fisuma ifyacicitika kuli  imwe babili pali ubo bushiku, ifyo mwingatashishapo Lesa. Kabili kuti mwalanda na pa mafya mukwete ayo mwingatemwa Lesa ukumwafwa ukupwisha. Lelo ico mufwile ukwishiba ni ci: Pali iyi nshita, tamufwile ukulalanda pa filubo fya bena mwenu. Lelo ilyo mulepepa, mulelanda fye pa mafya ayo mulingile ukubombelapo bonse babili. Mu bushiku bukonkelepo, mule-esha ukubombela pa fyo mwapepelepo kuli Lesa.

UBWAFYA BWALENGA BUBILI: Twalipusana ifyo twatemwa ne fyo twacenjelamo. Ba Tony batile: “Nshatemwa ifya kubelengabelenga.” Abakashi babo, ba Natalie batile: “Nalitemwa sana ukubelenga, kabili nalitemwa no kulanda pa fyo nabelenga. Limo mona kwati ici cilenga ba Tony ukukanaicetekela no kulaumfwa umwenso nga tulelanshanya ifya mu Baibolo.”

Ifyo mwingacita: Muletungililana, mwilacimfyanya nelyo ukulengululana. Muletasha no kukoselesha abena mwenu mu fyo bacita bwino. Ba Tony batile: “Limo umukashi wandi alampesha mano pa fyo acincimuka nga tulelanshanya ifya mu Baibolo ica kuti kale nshalefwaya no kulasambilila pamo nankwe. Lelo kwena alantungilila nga nshi. Pali ino nshita, tulalanshanya ifya mu Baibolo lyonse, kabili nasanga ukuti nshilingile ukulatiina icili conse. Ndatemwa ukulanshanya nankwe amalyashi ya mu Baibolo. Calitwafwa ukulaumfwana no kukanaba no mwenso.”

Abaupana abengi basanga ukuti nga batantika inshita ya kubelenga no kusambilila Baibolo pamo cila mulungu, icupo cabo cilaba bwino. Lelo muleibukisha ukuti: Ilyo mulesambilila Baibolo, mulemona ifyo imwe bene mwingabomfya ifyo mulesambilila, te kulafisunkila ku bena mwenu. (Abena Galatia 6:4) Inshita ya kusambilila Baibolo, te nshita ya kulanda pa mafya mukwete, mulingile ukusanga inshita imbi iyo mwingalanda pali ayo mafya. Mulandu nshi?

Tontonkanyeni pali ici: Bushe kuti mwatendeka ukusambila icilonda icilepompa na mafina pa nshita mulelya ifya kulya no lupwa lwenu? Awe nakalya. Kuti mwalenga aba mu lupwa lwenu bafilwa ukulya. Yesu apashenye ukusambilila pali Lesa no kucita ukufwaya kwakwe ku kulya ifya kulya. (Mateo 4:4; Yohane 4:34) Nga mulelanda pa filubo fya bena mwenu lyonse ilyo mulesambilila Baibolo, kuti mwalenga bapata ukulanshanya ifya kwa Lesa. Kwena ca cine ukuti mulingile ukulanda pa mafya mukwata, lelo mulingile ukuyalandapo pa nshita imbi iyalinga.—Amapinda 10:19; 15:23.

ESHENIKO IFI: Lembeni imibele iyo mwatemwa sana mu bena mwenu, ibili nelyo itatu. Umuku ukakonkapo ilyo mukalalanshanya ifya mu Baibolo ifikumine imibele iyo ine bakwata, mukabatashe sana.

Mukalobolola ico Mulebyala

Nga ca kutila bonse mulecindamika ifya kwa Lesa, icupo cenu cikawama nga nshi kabili mukalaikala umutende. Na kuba, Icebo ca kwa Lesa calaya ukuti “ico umuntu alebyala, e co akalobolola.”—Abena Galatia 6:7.

Ba Frederick na ba Leanne, abo twacilandapo pa ntendekelo, balishileishiba ukuti ifi Baibolo ilanda fya cine. Nomba napapita imyaka 45 ukutula apo baupanina kabili icupo cabo caliwama pa mulandu wa kuti balicindamika ifya kwa Lesa. Ba Frederick batile: “Nalepeela umukashi wandi umulandu wa kuti talefwaya ukuti tulelanshanya. Lelo mu kuya kwa nshita, naishilekutuluka ukuti na ine wine nalingile ukubombesha pa kuti tulelanshanya bwino.” Ba Leanne batile: “Icatwafwile sana ilyo twakwete amafya mu cupo cesu ca kutila, bonse babili twalitemenwe Yehova Lesa. Imyaka yonse iyo twaikala mu cupo, lyonse tulasambilila Baibolo no kupepela pamo. Ilyo mona ba Frederick baletwalilila ukuba ne mibele iisuma iyo Umwina Kristu alingile ukuba nayo, cilenga ukuti ndebatemenwako fye.”

[Futunoti]

MUIPUSHE AMUTI . . .

▪ Ni lilali ine no mwina mwandi twalekelesheko ukupepela pamo?

▪ Cinshi ningacita icingalenga umwina mwandi elaumfwa umwenso ilyo tulelanshanya pa fya kwa Lesa?