¿Jamüsüche paashin makaʼa nukuwaʼipa Enrique sümaa Liliana? Anasü tü keeʼireekat naaʼin. Aishi Maleiwa napüla otta natüjaa aaʼu nekirajaainjanain piamaleʼeya sünain tü Wiwüliakat. Paaʼinwainjana naya sutuma nekirajaain, nnojotpejeʼe müin nakuwaʼipa. Ekirajaashii naya piamaleʼeya, akatsaʼa nnojoluin jülüjain naaʼin tü jülüjakat naaʼin Maleiwa.

¿Kasa sünainpünaaka jülüjain waaʼin tü jülüjakat naaʼin Maleiwa? ¿Jamüsü jülüjainjatka naaʼin na kaʼwayuuseshiikana tü jülüjakat naaʼin Maleiwa? ¿Kasa eeka süpüla amojujeʼerüin nakuwaʼipa? ¿Kasa naainjüinjatka süpüla ayatüinjatüin jülüjain naaʼin tü jülüjakat naaʼin Maleiwa?

Saashin tü Wiwüliakat naatawai nakuwaʼipa na wayuukana sünain tü naainjakat (Judas 18, 19). Nüküjüin chi aluwataaushikai Pablo naatain nukuwaʼipa chi wayuu kojutükai amüin tü nümakat Maleiwa nuulia chi wayuu aainjakai tü nüchekakat neʼe nümüiwaʼa (1 Corinto 2:14; Galacia 5:19, 20).

Chi wayuu jülüjakai aaʼin tü jülüjakat naaʼin Maleiwa, kojutüsü nümüin nümakat Jeʼwaa süchiki wanee kasa. Aleewashi nümaa otta nüchajaain sukuwaʼipa süpüla nüshatüin nukuwaʼipa (Éfeso 5:1). Makalaka kamaneein nia sümüin wayuu süpüshuaʼa (Éxodo 34:6).  Oonooshi nümaa Maleiwa jaʼitairü kapüleein nümüin (Salmo 15:1, 4). Darío, nia wanee wayuu kepiakai chaa Canadá, apünüinchi shikii jaʼralimüin juya sümaa nuʼwayuuse, müshi nia: «Chi wayuu jülüjakai aaʼin tü jülüjakat naaʼin Maleiwa, nütüjaa aaʼu sumojujaajeerüin nukuwaʼipa nümaa Jeʼwaa müleka naainjüle jee nüküjüle wanee kasa mojusü». Müsü sünüiki Julia, tü nuʼwayuusekat Darío: «Wanee wayuu eekai jülüjüin saaʼin tü jülüjakat naaʼin Maleiwa, süchajaain sukuwaʼipa süpüla jüüjüüinjatüin shia nümüin chi naaʼinkai Maleiwa» (Galacia 5:22, 23).

Nnojotsü waʼatapajüinjatüin kaʼwayuusein süpüla müinjatüin wakuwaʼipa. Saashin tü Wiwüliakat eʼraajünüinjachi Maleiwa otta ashatünüinjatü nukuwaʼipa natuma napüshuaʼa na anoujashiikana (Aluwataaushikana 17:26, 27).

Asouktüinjana waya waneʼewai wakua nümüin Maleiwa saaʼu tü wakuwaʼipakat, ¿jamaka choʼujaaka nekirajaainjanain piamaleʼeya na kaʼwayuuseshiikana? Jülüjataa paaʼin nakuwaʼipa piamashii wayuu eekana amaʼana wanee yüüja: chi wanee apünajeeshi nia, chi wanee nnojoishi apünajeein. Chi wanee naawajeein tü mmakat otta chi wanee «jamajatche joo tamüin» müshi. Chi wanee aʼyataweeshi maʼin sünain tü mmakat otta chi wanee yalashi neʼe «nnaweerüjaʼa sukuwaʼipa», müshi neʼe. ¿Eejeetche aʼttiee suluʼu yüüjaka? Eejeeria palitchon. Aluʼusaʼa müin naʼyataajiraale piamaleʼeya wainmaleejeeria tü aʼttieekat.

Müsia neʼe nakuwaʼipa na kaʼwayuuseshiikana. Anouktaajeerü nakuwaʼipa müleka shiale tü jietkat jee niale chi toolokoi achajaain sukuwaʼipa süpüla jülüjain naaʼin tü jülüjakat naaʼin Maleiwa (1 Pedro 3:1, 2). Analeejeetpajaʼa nakuwaʼipa müleka naʼyataajiraale süchiirua aainjaa tü nümakat Maleiwa jee nakaaliinjiraale sünain aʼyatawaa nümüin Maleiwa. Müshi Salomón: «Anashii piamashii wayuu nuulia waneeshia». Süka jamüin, «eesü kasa anasü aapünaka namüin sükajee naʼyataain maʼin. Nujutuule waneeshia eeshi süpüla nütameʼennüin nutuma chi wanee» (Eclesiastés 4:9, 10).

Keeʼireesü paaʼin sümaa puʼwayuuse jülüjain jaaʼin tü kasa jülüjakat naaʼin Maleiwa. Paaʼinwainjana jia sünain tia. Aʼyataajiraainjana jia piamaleʼeya süpüla jüinküinjatüin shia. Wekirajaa sünain piamasü kasa kapüleeka atuma jülüjüin waaʼin tü jülüjakat naaʼin Maleiwa otta tü waaʼinrajatka süpüla eejiraain waya sümaa.

TÜ KASA KAPÜLEEKALÜ ATUMA: «Kupaashii maʼin waya».

«Nüsaapünaʼawalin taya chi taʼwayuusekai lasiete aipaʼa süchikijee taʼyataain. Watta saalin kasa waaʼinrajatka wantapa wepialuʼumüin. Keeʼireesü waaʼin wekirajaain piamaleʼeya sünain tü Wiwüliakat shiasaʼa müin mapüsain maʼin waya», müsü Susy, jeketü kaʼwayuusein.

Anuu tü eekat süpüla jaainjain: Jüchajaa sukuwaʼipa süpüla jikirajaain otta jükaaliinjiraain. Müsü sünüiki Susy süchiki tü saainjakat nümaa chi suʼwayuusekai: «Achijiraʼawaishii waya wattachon süpüla waashajeʼerüin tü Wiwüliakat süpülapünaa woʼunüin sünain aʼyatawaa. Nükaaliinjain taya sünain waneeirua kasa yaa miichipaʼa. ¿Anasüche nakuwaʼipa sutuma naainjain tia? «Teʼrüin mapüleein wamüin anoukteʼeraa wanee kasa sümaa Susy müleka wekirajaʼawaire weinshi. Otta jimatüsü waaʼin», müshi Eduardo.

Anashii müleka juʼuraajüle piamaleʼeya. Choʼujaasü maʼin jaainjain tia süpüla anainjatüin jukuwaʼipa. «Mojusü maʼin paala takuwaʼipa sümaa taʼwayuuse. Makalaka woʼuraajüin piamaleʼeya weinshi aipaʼawai süpüla waküjüin nümüin Maleiwa tü shapaakalü atuma wakuwaʼipa. Anaitpa wakuwaʼipa sutuma waainjain tia otta talatüsü waaʼin», müshi Ramon, polooichi aipiruamüin juya sümaa nuʼwayuuse.

TÜ KASA KAPÜLEEKALÜ ATUMA: «Naatawaisü wakuwaʼipa».

«Mamalainsat tamüin aleejaa», müshi Tony. Nnojotsü müin sukuwaʼipa Natalia, tü nuʼwayuusekat. «Kamalainsü maʼin tamüin aleejaa otta yootoo süchiki tü taleejakat. Müshi moʼookai naaʼin Tony tatuma yootopa taya nümaa süchiki wanee pütchi suluʼuka tü Wiwüliakat.» müsü shiakat

Anuu tü eekat süpüla jaainjain: Jükaaliinjiraa, nnojo jiyoujiraain süchiirua jaralin atüjain maʼin. Jülüja jaaʼin tü nütüjakat apüleerua juʼwayuuse otta talata jaaʼin sümaa tia. «Süka wainmain tü kasa sütüjaakalü aaʼu tü taʼwayuusekat süchiki tü Wiwüliakat, eesü nnojorüle taaʼin sünain ekirajawaa sutuma. Sükaaliinjain taya Natalia. Ekirajaashii jooluʼu waya piamaleʼeya sünain tü Wiwüliakat. Kamalaitpa tamüin yootoo sümaa süchiki tia. Anasü wakuwaʼipa sutuma tia, jimatüsü waaʼin otta talatüshii waya,» müshi Tony.

Watta naaliin na wayuu eʼrakana anain nakuwaʼipa sümaa naʼwayuuse süka nekirajaain piamaleʼeya sünain tü Wiwüliakat. Shia jülüjainjatka paaʼin tü kasa punoukteʼerüinjatkat sünain pukuwaʼipa (Galacia 6:4). Eere wanee kasa mojujiraaka anainjee jia, nnojo yootuin jia süchiki wanaa sümaa jikirajaain sünain tü Wiwüliakat. ¿Jamüsüche jaainjainjatka tia?

¿Kaseerü paainjaka eʼikaale püta sümaa kajüin shia? ¿Piiyajeetche tü pülioʼukat suʼunnaa maʼin pikaain sümaa püpüshi? Nnojoleerü paainjain tia süka mojushiijeerüin namüin na yalakana ekaain pümaa. Naashin Jesuu müsü aka saaʼin ekaa eküülü ekirajawaa nüchiki Maleiwa otta aainjaa tü nüchekakat (Mateo 4:4; Juan 4:34). Pajayatüle tü ekirajawaakat sümaa puʼwayuuse süpüla yootoo süchiki tü kasa mojusü saainjakat, nnojoleerü keeʼireein saaʼin ekirajawaa. Shiimain yootuinjanain jia eere mojujirawaa, akatsaʼa nnojoluinjatüin jaainjain shia suʼunnaa jikirajaain sünain tü Wiwüliakat (Proverbios 10:19; 15:23).

Müleka nekirajaale piamaleʼeya na kaʼwayuuseshiikana, aneerü nakuwaʼipa otta talateerü naaʼin. Müsü tü Wiwüliakat: «Chi aaʼinrakai tü kasa anasükat, walaajeechi nütüma [Jeʼwaa]. Otta chi aaʼinrakai tü kasa mojusükat, nnojoleechi walaain nütüma» (Galacia 6:7).

Niyaawata aaʼu Enrique sümaa Liliana shiimainshaatain tia pütchikat. Pienchiinna jaʼralimüin juya sünain kasaalüin naya. Natüjaa aaʼu anain nakuwaʼipa sutuma weinshin naya sünain ekirajawaa. «‹Matüjainsat pia yootuuka amaa›, tamawaisü tü taʼwayuusekat. Tayaawataka saaʼu mapa, tanoukteʼerüinjatüin takuwaʼipa», müshi Enrique. «Eejiraashii waya sümaa tü kasa mojusü alatakat wamüin süka alin wapüla Jeʼwaa. Wekirajaa anainrü weinshi tü Wiwüliakat piamaleʼeya otta woʼuraaja amüinchi Maleiwa. Teʼrüin Enrique sünain nunoukteʼerüin nukuwaʼipa makalaka alin nia tapüla», müsü Liliana.