ANO sa banta mo ang problema nanday Frederick kag Leanne? Maayo ang ila tuyo. Ginahigugma nila ang Dios kag nahibaluan nila nga dapat updanay sila sa pagtuon sang Biblia. Pero daw nangin kabangdanan pa ini sang paglainay nila sing buot. Matuod, nagaupdanay sila kon magtuon, pero wala nila mapauswag ang ila espirituwalidad.

Ano ang espirituwalidad? Ngaa dapat ini pauswagon sang mga mag-asawa? Ano nga mga kabudlayan ang mahimo nila maatubang, kag paano nila ini masolusyunan?

Sa Biblia, ang tinaga nga “espirituwalidad” nagapatuhoy sa panimuot sa kabuhi. (Judas 18, 19) Halimbawa, ginpakita sang manunulat sang Biblia nga si Pablo nga indi pareho ang panimuot sang espirituwal nga tawo sa pisikal nga tawo. Suno kay Pablo, ginauna sang pisikal nga mga tawo ang ila kaugalingon sangsa iban. Ginahimo nila kon ano ang matarong para sa ila, sa baylo nga sundon ang mga prinsipio sang Dios.—1 Corinto 2:14; Galacia 5:19, 20.

Pero, ang espirituwal nga mga tawo nagapabalor sa mga prinsipio sang Dios. Ginakabig nila nga Abyan si Jehova nga Dios kag ginatinguhaan nila nga ilugon sia. (Efeso 5:1) Gani, mahigugmaon sila, mainayuhon, kag  maluluy-on sa pagpakig-angot sa iban. (Exodo 34:6) Ginatuman nila ang Dios bisan pa mabudlay ini himuon. (Salmo 15:1, 4) “Para sa akon,” siling ni Darren, nga taga-Canada kag 35 ka tuig na nga may asawa, “ginapamensar pirme sang espirituwal nga tawo ang epekto sang iya ginahambal kag ginahimo sa iya kaangtanan sa Dios.” Ang iya asawa, nga si Jane, nagsiling man: “Para sa akon, ginatinguhaan sang espirituwal nga babayi nga ipakita kada adlaw ang mga bunga sang espiritu sang Dios.”—Galacia 5:22, 23.

Siempre, indi kinahanglan nga magminyo ang isa para mapauswag ang iya espirituwalidad. Ginatudlo sang Biblia nga responsibilidad sang kada isa nga magtuon parte sa Dios kag ilugon sia.—Binuhatan 17:26, 27.

Ngaa dapat magbuligay ang mag-asawa para mapauswag ang ila espirituwalidad? Binagbinaga ini nga ilustrasyon: Ang duha ka hardinero may isa ka hardin kag gusto nila nga tamnan ini sang ulutanon. Gusto sang isa nga magtanom na sang binhi, pero nagsiling ang isa nga sa ulihi na lang ini itanom. Ang isa gusto maggamit sang abono, pero ang isa nagsiling nga indi na ini kinahanglan. Gusto sang isa nga mag-obra sa hardin kada adlaw, pero ang isa nagapatawhay lang. Sa sini nga sitwasyon, ang hardin mahimo nga magpatubas man. Pero mas madamo pa kuntani ang mapatubas sini kon ang duha ka hardinero nagsugtanay sa ila himuon kag nagbuligay sa pagtuman sini.

Ang bana kag asawa mapaanggid sa sini nga mga hardinero. Bisan isa lang sa ila ang magpauswag sang espirituwalidad, mahimo nga mag-ayo ang ila kaangtanan. (1 Pedro 3:1, 2) Pero, mas maayo pa gid kon sila nga duha magsugtanay nga tumanon ang mga prinsipio sang Dios kag magbuligay samtang nagaalagad sa Dios! “Ang duha mas maayo sang sa isa,” sulat ni Hari Solomon. Ngaa? “Kay sila nga duha makapangabudlay sing labing maayo. Kon ang isa sa ila matumba, ang isa sa ila makabulig sa pagpabangon sa iya.”—Manugwali 4:9, 10, MB.

Mahimo nga gusto mo pauswagon ang inyo espirituwalidad nga mag-asawa. Pero pareho sa pagpanghardin, dapat nga may himuon ka para magpatubas ini sing maayo nga resulta. Binagbinaga ang duha ka kabudlayan nga mahimo mo maatubang kag kon paano mo ini masolusyunan.

KABUDLAYAN 1: Wala kami sing panahon.

“Ginasugat ako sang akon bana sa akon ginatrabahuan kada alas 7 sang gab-i,” siling ni Sue, nga bag-o lang nakasal. “Pag-abot namon sa balay, kadamo pa sang ulubrahon. Makakalapoy gid; gusto namon magtuon parte sa Dios, pero gusto sang amon lawas nga magpahuway na.”

Posible nga solusyon: Mag-adjust kag magkooperar. Si Sue nagsiling: “Aga pa kami nagabugtaw sang akon bana para magbasa kag magbinagbinag sang Biblia antes magtrabaho. Ginabuligan man niya ako sa mga ulubrahon para may tion ako upod sa iya.” Ano ang mga benepisyo sini? Si Ed, nga bana ni Sue, nagsiling: “Kon ginabinagbinag namon pirme ni Sue ang espirituwal nga mga butang, masolbar namon sing maayo ang mga problema kag wala kami gawa nagakabalaka.”

Importante man nga may tion kamo kada adlaw nga mag-updanay sa pagpangamuyo. Paano ini makabulig? “Kasan-o lang,” siling ni Ryan, nga 16 ka tuig na nga may asawa, “may mabug-at kami nga problema nga mag-asawa. Pero kada gab-i, nagaupdanay kami sa pagpangamuyo para ipabutyag sa Dios ang amon ginakabalak-an. Nakabulig ini para masolbar namon ang mga problema kag magmalipayon liwat sa amon pag-asawahay.”

KABUDLAYAN 2: Indi pareho ang amon gusto.

“Indi ako mahilig magbasa,” siling ni Tony. Ang iya asawa, nga si Natalie, nagsiling: “Nanamian ako magbasa, kag gusto ko istoryahan ang akon natun-an. Kon kaisa, daw nahuya si Tony sa akon kon mag-istoryahanay kami parte sa Biblia.”

Posible nga solusyon: Mangin mabinuligon. Indi magpaindisanay ukon magpanghikay. Apresyaha ang imo tiayon kag ang iya determinasyon sa pag-alagad sa Dios. “Kon kaisa, gusto gid sang akon asawa nga istoryahan ang mga topiko sa Biblia,” siling ni Tony, “kag sadto daw nahuya ako nga istoryahan ini upod sa iya. Pero mabinuligon gid si Natalie. Subong, pirme na namon ginaistoryahan ang espirituwal nga mga butang, kag narealisar ko nga wala ako sing dapat ikahuya. Nanamian na ako mag-istorya sini upod sa iya. Nakahatag ini sa amon sing kalinong.”

Natalupangdan sang madamo nga mag-asawa nga nagauswag ang ila pag-asawahay sang naghatag sila sang tion kada semana nga mag-updanay sa pagbasa kag pagtuon sang Biblia. Pero, dapat binagbinagon sang kada isa kon paano iaplikar ang mga laygay sang Biblia. (Galacia 6:4) Indi pag-istoryahi ang inyo mga problema kon nagatuon kamo. Ngaa?

Binagbinaga ini: Tinluan mo bala ang pilas samtang nagakaon ka upod sa imo pamilya? Siempre indi, kay basi madulaan kamo sing gana. Ginpaanggid ni Jesus ang pagtuon kag pagtuman sa kabubut-on sang Dios sa pagkaon sing kalan-on. (Mateo 4:4; Juan 4:34) Kon ginasal-ut mo ang inyo problema kada magtuon kamo sa Biblia, madulaan sing gana ang imo tiayon sa espirituwal nga mga butang. Matuod, ang mga problema kinahanglan istoryahan. Pero, himua ini sa iban nga tion.—Hulubaton 10:19; 15:23.

Kon ginapauswag mo ang inyo espirituwalidad nga mag-asawa, mangin matawhay kag makalilipay ang inyo pag-asawahay. Ang Biblia nagasiling nga “kon ano ang ginasab-ug sang tawo, ini man ang iya anihon.”—Galacia 6:7.

Napamatud-an gid ini nanday Frederick kag Leanne, nga ginsambit sa umpisa. Subong, 45 ka tuig na sila nga mag-asawa kag naeksperiensiahan nila ang maayo nga resulta sang ila pagtinguha nga mapauswag ang ila espirituwalidad. “Sadto, ginabasol ko ang akon asawa kay daw wala sia gana mag-istorya,” siling ni Frederick. “Pero sang ulihi, narealisar ko nga dapat may himuon ako.” Si Leanne nagsiling: “Nakabulig gid sa amon ang amon gugma kay Jehova nga Dios. Halin sang una, updanay kami pirme nga nagatuon kag nagapangamuyo. Sang nakita ko nga ginatinguhaan ni Frederick nga ipakita ang Cristiano nga mga kinaiya, labi ko sia nga ginpalangga.”