Mwa Ku Fumanela Tabo Mwa Lubasi

Mu Hulise Lilato la za Kwa Moya ka ku ba bo Muuna ni Musali ba ba Nyalani

Bo Frederick *: “Ha ne lu sa zo nyalana, ne ni pihelezi ku itutanga Bibele ni musalaa ka. Ne ni bonanga teñi kuli musalaa ka wa teeleza ka nako ye ne lu itutanga. Kono ne kuli taata ku Leanne ku ina sikalalambo. Mi ha ni buza lipuzo, musalaa ka naa alabanga ka bukuswani ili ku lumela ze ni bulela kamba ku sa lumela. Musalaa ka na sa alabangi ka mwa na swanela ku alabela fa tuto ya Bibele.”

Bo Leanne: “Ne ni li wa lilimo ze 18 ha ne ni nyezwi ku bo Frederick. Ne lu itutanga Bibele hamoho ni bo Frederick kamita, kono ne ba itusisanga nako yeo ku bulela bufokoli bwa ka ni ku talusa lika ze ne ni swanela ku belekela teñi sina musalaa bona. Na zwafa hahulu!”

MU BONA cwañi, ki bufi butata bo ne bu li mwahalaa bo Frederick ni bo Leanne? Kaufela bona ne ba na ni milelo ye minde. Kaufela bona ne ba lata Mulimu. Mi bubeli bwa bona ne ba bona butokwa bwa ku ituta Bibele hamoho. Kono nto ye ne swanela ku tahisa kuli ba swalisane ki yona ye ne tahisa butata. Nihaike kuli ne ba ituta Bibele hamoho, ne ba sa hulisi lilato la bona kwa lika za kwa moya ka ku ba bo muuna ni musali ba ba nyalani.

Lilato la za kwa moya kiñi? Ki kabakalañi batu ba ba nyalani ha ba swanela ku hulisa lilato la za kwa moya hamoho? Ki butata mañi bo bu shutana-shutana bo ba kona ku talimana ni bona batu ba ba nyalani, mi ba kona ku bu tula cwañi?

Lilato La Za Kwa Moya Kiñi?

Pulelo ya kuli “lilato la za kwa moya” ka mo i itusiselizwe mwa Bibele i talusa mubonelo wa mutu wa bupilo. (Juda 18, 19) Ka mutala, Paulusi muñoli yo muñwi wa Bibele, naa bonisize shutano ye mwahalaa mubonelo wa mutu ya lata za kwa moya ni mutu ya na ni mubonelo wa butu. Paulusi naa bonisize kuli batu ba ba na ni mubonelo wa butu ne ba iyakatwa za bona beñi ku fita ku iyakatwa ba bañwi. Batu ba ba cwalo ba eza lika ze ba bona kuli li lukile mwa meeto a bona ku fita ku eza lika ze swalisana ni mubonelo wa Mulimu.—1 Makorinte 2:14; Magalata 5:19, 20.

Ka ku shutana, batu ba ba lata lika za kwa moya ba kuteka hahulu likuka za Mulimu. Ba nga Jehova Mulimu ku ba Mulikanaa bona mi ba lika ku  likanyisa butu bwa hae. (Maefese 5:1) Kacwalo, ba bonisa ba bañwi lilato, sishemo ni musa. (Exoda 34:6) Mi ba utwa Mulimu nihaikaba kuli ku eza cwalo ku taata. (Samu 15:1, 4) Bo Darren ba ba pila kwa Canada, ili ba se ba nyezi ka lilimo ze 35 ba bulela kuli: “Ku likana ni mubonelo wa ka, mutu ya lata lika za kwa moya a si ka bulela kale kamba a si ka eza kale nto ye ñwi, pili u ka yeya ni ku nahana mo likezo ni mubulelelo wa hae u amela bulikani bwa hae ni Mulimu.” Bo Jane, basali ba bo Darren ba ekeza kuli: “Ni bona kuli musali ya lata lika za kwa moya wa sebeza ka taata zazi ni zazi kuli butu bwa hae bu kone ku bonisa miselo ya moya o kenile wa Mulimu.”—Magalata 5:22, 23.

Nihakulicwalo, haki batu feela ba ba nyezwi ba ba swanela ku hulisa lilato la bona kwa lika za kwa moya. Mane Bibele i luta kuli mutu ni mutu u na ni buikalabelo bwa ku ituta ka za Mulimu ni ku mu likanyisa.—Likezo 17:26, 27.

Ki Kabakalañi bo Muuna ni Musali ba ba Nyalani ha ba Swanela ku Hulisa Lilato la za Kwa Moya?

Ki kabakalañi bo muuna ni musali ba ba nyalani ha ba swanela ku hulisa lilato la za kwa moya hamoho? Ha mu nyakisise swanisezo ye: Balimi ba babeli ba kopanezi simu mi ba lela ku cala miloho. Mulimi yo muñwi wa ikatulela ku cala lipeu, yo muñwi yena u bona kuli nako ha i si ka fita kale ya ku cala lipeu. Yo muñwi u tabela ku itusisa mufuta o muñwi wa mununo, yo muñwi yena u ikutwa kuli licalo ha li tokwi mununo. Yo muñwi kwa balimi bao u tabela ku beleka ka taata mwa simu yeo zazi ni zazi. Kono yo muñwi hape kwa balimi bao u tabela ku ina feela inze a buha yo muñwi ha nze a beleka. Mwa muinelo wo, balimi bao ba kona ku kutula se siñwi, kono ne ba ka ba ni kutulo ye tuna ha ne ba ka itomela likonkwani ni ku swalisana mwa ku peta likonkwani zeo.

Muuna ni musali ba swana feela sina balimi ba babeli bani. Haiba ki mutu a li muñwi feela kwa batu ba ba nyalani ya hulisa lilato la za kwa moya, linyalo la bona la kona ku tiya. (1 Pitrosi 3:1, 2) Kono linyalo la bona ne li ka tiya ni ku fita haiba bubeli bwa batu ba ba nyalani ba lumelelana ku itusisa likuka za Mulimu ni ku susuezana mwa ku sebeleza Mulimu! Mulena Salumoni ya butali naa ñozi kuli: “Ba babeli ba fita a li muñwi.” Ki kabakalañi? “Kakuli ba fumana se situna kwa musebezi wa bona. Ha ku wa yo muñwi, wahabo wa mu zusa.”—Muekelesia 4:9, 10.

Mwendi mwa tabela ku hulisa lilato la za kwa moya ni bakumina. Kono sina mo lu bonezi mwa swanisezo ya balimi, ku ba feela ni takazo ha ku tusi se siñwi. Ha lu nyakisiseñi butata bo mu kona ku talimana ni bona ni mo mu kona ku tatululela butata bo.

BUTATA 1: Ha lu na nako. Bo Sue ba ba sa zo nyalwa ba li: “Bo muunaa ka ba yo ni inganga kwa musebezi ka 19:00 hrs. Ha lu fita kwa ndu, ni fumananga kuli ni swanela ku eza misebezi kaufela ya fa lapa. Ku taata hahulu, kakuli lizwalo la luna li lu bulelela kuli lu swanela ku tanda nako inze lu ituta ka za Mulimu hamoho, kono hape lu topwezi.”

Mo mu kona ku tatululela butata bo: Mu cinca-cince miezezo ya lika mi mu swalisane. Bo Sue ba bulela kuli: “Na ni bo muunaa ka ne lu lumelelani ku zuhanga kapili kuli lu balange Bibele hamoho ni ku ambolisananga lu si ka ya kale kwa musebezi. Bo Muunaa ka hape ba ni tusanga ku eza misebezi ya fa lapa kuli lu kone ku fumana nako ya ku ina hamoho.” Ki bunde mañi bo bu zwa mwa ku eza cwalo? Bo Ed, baana ba bo Sue ba bulela kuli: “Ni fumani kuli, ku ikambota kamita litaba za kwa moya ku lu tusa ku tatulula ka bunolo butata kaufela bo lu talimana ni bona mi kwa kusufaza ni kwa lipilaelo ze lu na ni.”

Kwandaa ku ambolisana hamoho, ki kwa butokwa ku tandanga mizuzu i sikai ka zazi inze mu lapela hamoho. Ku eza cwalo ku kona ku mi tusa cwañi? Bo Ryan ba se ba nyezi ka lilimo ze 16 ba bulela kuli: “Nakonyana kwamulaho, ne lu kopani ni butata bo butuna hahulu mwa linyalo la luna. Kono lwa lika ku fumana nako ya ku lapelanga hamoho busihu ni busihu ili ku bulelela Mulimu lipilaelo kaufela za luna. Ni bona kuli ku lapelanga hamoho ku lu tusize ku tatulula butata kaufela bo ne lu talimana ni bona ni ku lu tusa ku ikola linyalo la luna hape.”

MU LIKE MUEZEZO WO:Mu fumane nako zazi ni zazi ya ku ambola ka za lika ze nde ze ezahezi ku mina ka ku ba batu ba ba nyalani ili ze mu kona ku itumela ku Mulimu. Hape mwa kona ku ambola za butata bo bu shutana-shutana bo mu talimana ni bona mwa linyalo sihulu bo bu tokwa kuli mu kupe Mulimu kuli a mi tuse ku bu  tatulula. Temuso: Mu si ke mwa itusisa nako ye, kwa ku talusa mifokolo kaufela ya bakumina. Ha mu lapela hamoho mu bulele feela litaba ze mu swanela ku belekela ku zona. Ha se mu lapezi ka za litaba zeo, lizazi le li tatama mu sebeleze fateñi.

BUTATA 2: Lu na ni buikoneli bo bu shutana-shutana. Bo Tony ba bulela kuli: “Ku taata hahulu ku na ku ina ni ku bala buka.” Bo musalaa bona bo Natalie, ba bulela kuli: “Ni tabela hahulu ku bala mi ni fumananga tabo ka ku bulela ze ni itutile. Fokuñwi ni bonanga inge kuli bo Tony ba ikutwanga ku bembeha kabakala ka ha lu ambola litaba ze tomile fa Bibele.”

Mo mu kona ku tatululela butata bo: Mu fe bakumina kemelo, isiñi ku bonisa moya wa kangisano kamba wa ku nyaza-nyaza. Mu bulelele bakumina kuli mwa itebuha kaufela ze ba ezanga mi mu ba susueze ku zwelapili ku tundamena ku eza ze lukile ha ba nze ba sebeleza Jehova. Bo Tony ba bulela kuli: “Fokuñwi ni ikutwanga ku imezwa ki cisehelo ya na ni yona musalaa ka kwa ku ambola litaba za mwa Bibele, mi mane kale ne ni sa tabelangi ku ambola ka za litaba za kwa moya ni musalaa ka. Nihakulicwalo, bo Natalie ba ni fa kemelo. Ka nako ya cwale lwa ambolanga kamita litaba za kwa moya hamoho, mi ni fitile fa ku lemuha kuli ha ni swaneli ku ikutwa ku bembeha kabakala musalaa ka. Se ni ikolanga ku ambola ni musalaa ka litaba za mwa Bibele. Ku eza cwalo ku lu tusize ku ikutwa ku lukuluha ni ku ba ni kozo mwa linyalo la luna.”

Buñata bwa batu ba ba nyalani ba fumani kuli manyalo a bona a banga a mande ka ku fitisisa haiba ba ba ni nako ya ku bala ni ku ituta Bibele hamoho kamita. Temuso: Mu itusise kelezo ye tomile fa Mañolo ku mina beñi isiñi ku bakumina. (Magalata 6:4) Ka nako ya ku ituta mu si ke mwa ambola butata bwa mwa linyalo la mina kono mu fumane nako isili ya ku ambola butata bo. Ki kabakalañi ha mu swanela ku eza cwalo?

Ha mu nahanisise taba ye: Kana ne mu ka beya mulyani fa sitombo se si tiputuka bulalu ka nako ye mu ca sico ni lubasi lwa mina? Batili. Ku eza cwalo ne ku ka nyembunyisa batu kaufela mi mwendi ne ba ka palelwa ku zwelapili ku ca. Jesu naa bapanyize ku ituta ni ku eza tato ya Mulimu kwa ku ca sico. (Mateu 4:4; Joani 4:34) Haiba nako ni nako ha mu apula Bibele ki yona nako ye mu keta ku ambola litaba ze holofaza, mu ka tahisa kuli bakumina ba nyembunye kamba mane kuli ba si ke ba tabela ku ca sico sa kwa moya. Kaniti, mu swanela ku ambola butata bo mu na ni mwa linyalo la mina. Kono mu swanela ku tatulula butata bo bu shutana-shutana bo ka nako ye mu ketile ku eza cwalo.—Liproverbia 10:19; 15:23.

MU LIKE MUEZEZO WO:Mu ñole tulemeno to tubeli kamba to tulaalu twa bakumina ili to mu tabela hahulu. Nako ye tatama ha mu ka ambola ka za litaba za kwa moya ze ama tulemeno to, mu bulelele bakumina kuli mwa itebuha mo ba boniseza tulemeno to.

Mu Ka Kutula Se Mu Cala

Haiba mu cala kamba mane ku hulisa lilato la za kwa moya ka ku ba bo muuna ni musali ba ba nyalani, mu ka kutula kozo ni tabo mwa linyalo la mina. Mane Linzwi la Mulimu li lu kolwisa kuli “kaufela sa cala mutu, ki sona hape sa ka kutula.”—Magalata 6:7.

Bo Frederick ni bo Leanne ba se ba bulezwi kwa makalelo, ba itutile buniti bwa sikuka seo sa mwa Bibele. Se ba nyalani ka lilimo ze 45 mi ba tusizwe hahulu bakeñisa ku tiisa lilato la bona la za kwa moya. Bo Frederick ba bulela kuli: “Kale ne ni nyazanga musalaa kuli ki yena ya na tahisa kuli lu be ni butata bwa ku sa ambolisananga hande. Kono hamulaho wa nako, na lemuha kuli ni na ne ni swanela ku eza buikatazo.” Bo Leanne ba bulela kuli: “Ze ne lu tusize mwa nako yeo ye taata ne li lilato la luna ku Jehova Mulimu. Mi mwa lilimo kaufela ze, lu balile Bibele hamoho ni ku lapela hamoho. Ku ni belanga bunolo ku lata bo Frederick ha ni ba bona inze ba eza buikatazo bwa ku bonisa tulemeno twa Sikreste.”

[Litaluso za kwatasi]

MU IPUZE KULI . . .

▪ Lu lapezi lili hamoho ka ku ba bo muuna ni musali ba ba nyalani?

▪ Kiñi ze ni kona ku eza kuli ni kone ku susueza bakuluna ku ambola ni na ka ku lukuluha litaba za kwa moya?