Iinlodlhelo Zethabo Lomndeni

Hlawulelani Ingokomoya Njengabantu Abatjhadileko

UFrederick * uthi: “Nesiqeda ukutjhada, ngakatelela umkami bona sifunde ndawonye iBhayibhili. Bengifuna bona alalele nesifundako. Kodwana uLeanne gade angahlaliseki. Nengibuza iimbuzo, bekamane aphendule ngo-iye nofana awa. Ukuphendula kwakhe akhenge kungenze ngibe nombono wendlela isifundo seBhayibhili okufuze siragwe ngayo.”

ULeanne: “Bengineemnyaka eli-18 nengitjhada noFrederick. Besifunda iBhayibhili ndawonye qobe, kodwana uFrederick bekasebenzisa isifundo ngasinye njengethuba lokuveza yoke iimtjhaphwami neendlela okufuze ngithuthuke ngazo njengomfazi. Ngadana begodu ngezwa ubuhlungu!”

UCABANGA bona umraro bewuhlangana kobuhlobo bakaFrederick noLeanne? Iimnqophwabo beyimihle. Bobabili bebamthanda uZimu. Begodu bobabili bebayibona itlhogeko yokufunda iBhayibhili ndawonye. Kodwana into ebekufuze ibasize bona babe nobunye yaba nomphumela ohlukileko. Ngitjho nanyana bebafunda ndawonye, kodwana bebangahlawuleli ingokomoya njengebantu abatjhadileko.

Liyini ingokomoya? Kubayini kufuze abantu abatjhadileko balinge ngamandla bona balihlawulele? Ngiyiphi iimraro abangaqalana nayo, begodu bangayihlula njani?

Liyini Ingokomoya?

Ibizo elithi ‘ingokomoya’ njengombana lisetjenziswa eBhayibhilini litjho ubujamo bomkhumbulo nendlela umuntu aqala ngayo ukuphila. (KaJuda 18, 19) Isibonelo, umtloli weBhayibhili uPowula, ukhanyisa umehluko hlangana nomuntu ongokomoya nongokwenyama. UPowula uthi labo abanombono ongokwenyama, bazicabangela khulu kunabanye. Benza okulungileko emehlwenabo kunokobana balinge ukuphila ngemithetho kaZimu.—1 KwebeKorinte 2:14; KwebeGalatiya 5:19, 20.

Ngokuhlukileko, labo abanombono ongokomoya bahlonipha imithetho kaZimu. Baqala uJehova uZimu njengoMnganabo begodu balinga ukulingisa ubuntu bakhe. (Kwebe-Efesu 5:1) Ngalokho, banethando, umusa nesineke  nebasebenzelana nabanye. (Eksodosi 34:6) Balalela uZimu ngitjho nalokha kungasilula ukwenza njalo. (IRhalani 15:1, 4) UDarren ohlala eCanada osele aneemnyaka ema-35 atjhadile uthi, “Ngendlela engizwisisa ngayo, umuntu ongokomoya ngaso soke isikhathi ucabanga ngendlela ikulumo nezenzo zakhe okuzokuthinta ngayo ubuhlobo bakhe noZimu.” Umkakhe, uJane, uyangezelela: “Ngicabanga bona umfazi ongokomoya ngiloyo osebenza budisi qobe langa bonyana enze iinthelo zomoya kaZimu zibe yingcenye yobuntu bakhe.”—KwebeGalatiya 5:22, 23.

Liqiniso, umuntu akukafuzi atjhade bona akhule ngokomoya. Eqinisweni, iBhayibhili ifundisa bona umuntu ngamunye unomthwalo wokufunda ngoZimu nokumlingisa.—IZenzo 17:26, 27.

Kubayini Kufuze Nihlawulele Ingokomoya Njengabantu Abatjhadileko?

Kubayini kufuze abalingani bomtjhado balinge ngamandla ukuhlawulela ingokomoya njengabatjhadi? Cabanga ngomfanekiso naku: Abalimi ababili baneplodi yesivande begodu bafuna ukutjala iimrorho. Omunye ukhetha ukutjala imbewu ngesikhathi esithileko somnyaka, kungilapho omunye acabanga bona imbewu kufuze itjalwe ngokukhamba kwesikhathi. Omunye ufuna ukusebenzisa ihlobo elithileko lesivundisi, kodwana omunye akavumelani ngokupheleleko nalokho begodu ucabanga bona iintjalo azisitlhogi isivundisi. Omunye ufuna ukusebenza budisi esivandeni qobe langa. Omunye uthabela ukuhlala abukele, kunokusebenza. Endabeni le, isivande singaba neemphumela ethileko, kodwana angekhe sikhiqize okunengi ngendlela ebesingakhiqiza ngayo nengabe bobabili abalimi bavumelene kilokho abakwenzako begodu basebenza ndawonye bona bafeze iimnqopho leyo.

Indoda nomfazi bafana nabalimaba. Nengabe munye kwaphela umlingani ohlawulela ingokomoya, ubuhlobo bungakhula. (1 KaPitrosi 3:1, 2) Nokho, qala bona kungaba kuhle kangangani nengabe bobabili abalingani bavumelana ngokuphila ngemithetho kaZimu begodu basebenze budisi bona basekelane njengombana bakhonza uZimu! IKosi ehlakaniphileko uSolomoni yatlola: “Ababili bangcono kunoyedwa. Kubayini kunjalo? Ngombana banomvuzo omuhle ngomsebenzi wabo obudisi. Nengabe omunye wabo uyawa, omunye angakghona ukumvusa.”—UMtjhumayeli 4:9, 10.

Kungenzeka ukhanuka ukuhlawulela ingokomoya nomlinganakho womtjhado. Kodwana njengesivande, ukukhanuka kukodwa akusizi. Cabangela iintjhijilo eembili ongaqalana nazo nendlela ongazihlula ngayo.

UMRARO 1: Asisifumani isikhathi. USue osanduk’tjhada uthi: “Indodakwami ingithatha emsebenzini ngo-7:00 ntambama. Nesifika ekhaya, woke umsebenzi wekhaya ulinde thina. Kuba mzukuzuku hlangana kwengqondo nomzimba; ingqondwethu isitjela bona kufuze sibe nesikhathi sokufunda ngoZimu ndawonye, kodwana iimzimbethu ikhanuka ukuphumula.”

Esinye seenrarululo: Yiba ngotjhentjhatjhentjhako nonebambiswano. USue uthi: “Mina nendodakwami sakhetha bona sivuke ekuseni sifunde besicoce ngengcenye yeBhayibhili ndawonye ngaphambi kobana siye emsebenzini. Godu ingisiza ngomsebenzi othileko wangendlini bona ngibe nesikhathi nayo.” Ngiziphi iinzuzo ezifumaneka ngokwenza umzamo ongeziweko lo? Indoda kaSue u-Ed ithi: “Ngifumene bona nengabe mina noSue qobe sicoca ngezinto ezingokomoya ndawonye, sikwazi ukuqalana ngokuphumelelako neemraro esinayo begodu sikghona nokunciphisa ukugandeleleka.”

Ukungezelela ekukhulumisaneni, kuqakathekile bona nisebenzise iimzuzu embalwa qobe langa nithandaza ndawonye. Kungasiza njani lokhu? URyan osele atjhade iimnyaka eli-16 uthi, “Esikhathini esidlulileko, mina nomkami saba nesikhathi esibudisi khulu ebuhlotjeni bethu. Kodwana senza isikhathi sokuthandaza ndawonye ubusuku ngabunye, sithululela uZimu amatshwenyekwethu. Ngicabanga bona ukuthandaza ndawonye kusisize sararulula iimrarwethu, safumana nethabo godu emtjhadwenethu.”

LINGA NAKU: Bekelani eqadi iimzuzu embalwa ekupheleni kwelanga ngalinye nicoce ngananyana ngiziphi izinto ezihle ezenzeke kini njengabatjhadi,  izinto eningathokoza ngazo uZimu. Godu khulumani ngeemraro eniqalane nayo, khulukhulu leyo enitlhoga isizo lakaZimu bona niyikghodlhelelele. Tjheja: Ungasebenzisi isikhathesi njengethuba lokuveza iimtjhapho yomlinganakho. Kunalokho, nenithandaza ndawonye, yitjho kwaphela izinto okufuze nisebenzele kizo nobabili. Ngelanga elilandelako, yenza ngokuvumelana nomthandazwakho.

UMRARO 2: Sinamakghono angafaniko. UTony uthi, “Angisimumuntu okwazi ukuhlala phasi afunde.” Umkakhe uNatalie uthi: “Ngiyakuthanda ukufunda, nokucoca ngalokho engikufundileko. Ngezinye iinkhathi ngicabanga bona ngiyamthusa uTony nesifunda ngezinto ezisekelwe eBhayibhilini.”

Esinye seenrarululo: Yiba ngosekelako, ingasi umphalisani namtjhana ohlulelako. Buka bewukhuthaze umlinganakho. UTony uthi, “Itjiseko yomkami yokucoca ngeendaba zeBhayibhili ingiqeda amandla ngezinye iinkhathi, begodu esikhathini esidlulileko bengikudondela ukucoca naye ngezinto ezingokomoya. Nanyana kunjalo, uNatalie uyangisekela. Okwanje sicoca qobe ngezinto ezingokomoya ndawonye, begodu ngifumene bona ayikho into okufuze ngiyisabe. Ngiyakuthabela ukucoca naye ngeendabezi. Kusisize bona sitjhaphuluke khudlwana begodu sibe nokuthula njengabatjhadi.”

Abatjhadi abanengi bafumene bona umtjhadwabo uyathuthuka nebabekela eqadi isikhathi sokufunda iBhayibhili ndawonye qobe veke. Nokho, nasi into okufuze siyitjheje: Sebenzisa nanyana ngisiphi isiluleko kuwe ngokwakho, ingasi kumlinganakho. (KwebeGalatiya 6:4) Cocani ngezinto ezibangela ukunghwarana emtjhadwenenu ngesinye isikhathi, ingasi ngesikhathi sesifundo. Kubayini kunjalo?

Cabanga ngalokhu: Nengabe bewudla nomndenakho, bewungakhetha ukusebenzisa isikhatheso bona uhlanze bewubhanditjhe inceba elibhibhidlhako? Bewungekhe ukwenze lokho. Bewuzokuphakamisela woke umuntu iimbindi. UJesu wamadanisa ukufunda nokwenza intando kaZimu nokudla ukudla. (Matewu 4:4; Jwanisi 4:34) Newukhuluma ngamanceba angokwamazizo ngaso soke isikhathi newuvula iBhayibhili, ungabangela umlinganakho angasakhanuka ukufunda ngezinto ezingokomoya. Liqiniso, nizokufuna ukucoca ngeemraro. Kodwana cocani ngeendabezo ngesikhathi enisibekele eqadi bona nicoce ngazo.—Iziyema 10:19; 15:23.

LINGA NAKU: Tlola iimfanelo eembili namtjhana eentathu zomlinganakho ozithanda khulu. Esikhathi esilandelako nenicoca ngezinto ezingokomoya ezihlobene neemfanelwezo, tjela umlinganakho bona uyithanda kangangani indlela azibonisa ngayo iimfanelwezo.

Uvuna Okutjalileko

Nengabe nitjala, nofana nihlawulela ingokomoya njengabantu abatjhadileko ekugcineni nizokuba nomtjhado onokuthula nozuzisako. Eqinisweni, iLizwi lakaZimu liqinisekisa bona ‘umuntu uvuna lokho akutjalileko.’—KwebeGalatiya 6:7.

UFrederick noLeanne abadzubhulwe ekuthomeni kwesihlokwesi bafunda iqiniso lekambisolawulo yeBhayibhili le. Okwanje sebaneemnyaka ema-45 batjhadile begodu bayazi bona ukukghodlhelela kuyazuzisa. UFrederick uthi, “Bengithanda ukusola umkami ngokubhalelwa kucoca. Nokho, ngokukhamba kwesikhathi ngalemuka bona nami godu kufuze ngenze umzamo.” ULeanne uthi: “Okwasisiza kwamambala eenkhathini ezibudisi lithando lethu ngoJehova uZimu. Kiyo yoke iimnyaka le, besifunda qobe begodu sithandaza ndawonye. Njengombana ngibona uFrederick enza umzamo bona athuthuke ekutjengiseni iimfanelo zobuKrestu, kwenza kube lula ngami ukumthanda.”

[Umtlolo waphasi]

ZIBUZE . . .

▪ Sagcina nini ukuthandaza ndawonye njengabantu abatjhadileko?

▪ Khuyini engingayenza ukukhuthaza umlinganami bona atjhaphuluke khudlwana ukucoca nami ngezinto ezingokomoya?