¿IMA chʼampaypitaq Enrique, Liliana ima rikukurqanku? Iskayninku Diosta munakunku, Bibliata ukhunchananku kasqantapis allinta yachanku. Chaywanpis ukhunchasqanku jukchaykunanmantaqa, karunchachkarqa. Bibliata ukhunchaspapis mana iskayninkuchu Diosman qayllaykuchkarqanku.

¿Imataq Jehová Diosman qayllaykuy niyta munan? ¿Imaraykutaq casarasqas iskayninku Diosman qayllaykunanku tiyan? Chantá, ¿imastaq mana qayllanankupaq jarkʼanman? ¿Imastaq qayllanankupaq yanapanman?

Biblia nisqanmanjina, Diosman qayllaykuq runaqa, imaynatachus Diospa leyesninta kawsayninpi qhawasqanwan rikuchin (Judas 18, 19). Apóstol Pabloqa, espiritumanjina kawsaq runaqa, aychap munayninmanjina kawsaq runawanqa, mana kikinchu kasqanta nin. Pablo nisqanmanjina aychap munayninmanjina kawsaq runaqa, payllapi yuyan. Rikchʼaynillantataq ruwan, nitaq Diospa leyesninta kasukunanpaqpis kallpachakunchu (1 Corintios 2:14; Gálatas 5:19-21).

Espiritumanjina kawsaqqa, Diospa leyesninta jatunpaq qhawan. Chantá Jehová Diosta  amigontajina qhawallantaq, payjina kʼacha kaykunasta rikuchinanpaqtaq kallpachakun (Efesios 5:1). Chayrayku runa masinpaq, munakuyniyuq, kʼacha, pacienciayuq ima (Éxodo 34:6). Mana allin riptinpis, Diosta kasukun (Salmo 15:1, 4). Canadamanta Darío, 35 watasña casarasqa nin: “Reparasqaymanjina espiritumanjina kawsaq runaqa, imatachus nisqan, ruwasqan ima, Diosman qayllananpaq yanapanqachus manachus chaypi tʼukurin”, nispa. Warmin Julia nin: “Espiritumanjina kawsaq warmiqa, sapa pʼunchay espiritup puquyninta rikuchinanpaq kallpachakun”, nispa (Gálatas 5:22, 23).

Kʼacha kaykunata rikuchinapaqqa, mana casarakunaraqchu tiyan. Chantapis Bibliaqa sapa juk Diosta riqsina kasqanta, payjina ruwana kasqanta ima nin (Hechos 17:26, 27).

Diosman sapa juk qayllana kaptin, ¿imaraykú casarasqas iskayninkupuni Diosman qayllananku tiyan? Kaypi tʼukuriy, iskay runas juk huertallayuq kanku, juknin tarpunallaña nin, juktaq qhipan killallata nin, chantá jukninqa wanuta churana nin, juktaq mana churanachu nin. Juknintaq sapa pʼunchay sumaqta llamkʼayta munan, juktaq qhawallan. Ichapis tarpusqankuqa puqunqa, chaywanpis iskayninku yanapanakuspa sumaqta llamkʼaptinkuqa aswan sumaqta puquchinkuman.

Casadospi kikillantaq kanman. Paykunamanta mayqillanpis Diosman astawan qayllaykuptin kusisqas kawsakunkuman (1 Pedro 3:1, 2). Iskayninku Diospa leyesninta kasuptinku, Payta sirvinankupaq yanapanakuptinku imataq, astawan kusisqas kawsakunkuman. Rey Salomón nirqajina, “aswan walej iskay ukhu kayqa sapalla kanamanta nisqaqa”, ¿imaraykú? “Imaraykuchus iskayninkumantaqa astawan ganakuyta atinku. Sichus ujnin urman chayqa, ujnin kaj aysarin” (Eclesiastés 4:9, 10).

Qhariwarmijina Diosman astawan qayllaykuyta munankichikchá. Chantá huertapijina, Diosman qayllanaykichikpaq mayta llamkʼanaykichik tiyan. Qhawarina, Diosman mana qayllanapaq ima chʼampaykunachus kananta, chaytataq imaynatachus atipanata ima.

JUK CHʼAMPAY: “Mana tiempochakuyta atiykuchu”.

Kunallanraq casarasqa, Susy nin: “Qusayqa llamkʼayniyman qanchis horata jamun, wasiman ripunaykupaq, chayaptiykutaq tukuy imapis tʼustipacha. Imatachus ruwanaykutaqa mana yachaykuchu, Diosmanta khuska yachakunayku kasqanta yachayku, chaywanpis manaña kallpa kanchu”, nispa.

¿Imataq yanapasunkichikman? Imaynasmantachus yanapanakunaykichikpi tʼukuriychik. Susyqa, imatachus qusanwan ruwasqankumanta jinata nin: “Qusaywan aswan temprano jatarikunaykupaq parlariyku, niraq llamkʼaq richkaspa, Bibliata ukhuncharinaykupaq. Wasipi ruwanaswantaq yanapawan, astawan tiempoyuq kanaykupaq”, nispa. ¿Chayta ruwasqanku yanaparqachu? Eduardo nin: “Iskayniyku sapa kuti Diosmanta ukhuncharisqaykuqa, chʼampaykunata allinchanaykupaq, mana anchata llakikunaykupaq yanapawasqaykuta reparani”, nispa.

Bibliata ukhunchaptiykichikpis, allin kanman Diosmanta khuska mañakunaykichik. Imaraykuchus chayqa mayta yanapasunqachik. Ramón 16 watastaña casarasqa nin: “Warmiywan mana allintachu apanakuchkarqani, chaywanpis sapa chʼisi Diosman juk mañakuypi llakiykunasniykuta ninaykupaq parlarirqayku. Chaytaq chʼampaykunasniykuta allinchanaykupaq, kusisqa kawsakunaykupaq ima yanapawarqayku”, nispa.

ISKAY CHʼAMPAY: “Mana kikinchu kayku”.

Tony nin: “Librota leerispa mana miskʼichikuqchu kani”, nispa. Warmin Natalia nin: “Leespaqa mayta miskʼichikuni, yachakusqaymantataq parlariyta munani. Wakin kutispiqa, Bibliap yachachiykunasninmanta parlarispa Tonyta pʼinqachisqayta yuyani”, nispa.

¿Imataq yanapasunkichikman? Atipanakunaykichikmanta, qhawaranakunaykichikmanta imaqa, puraqmanta kallpachanakuychik. Qusayki chayri warmiyki imastachus allinta ruwayta yachasqanta qhawariy, chaykunamantataq allinta ruwanki niy. Tony nin: “Wakin kutisqa warmiy Bibliap yachachiykunasninmanta mayta parlawasqanqa saykʼuchiwaq, chayraykutaq mana paywan Bibliata ukhunchayta atillaqchu kani. Chaywanpis Nataliaqa pacienciayuq. Kunanqa Bibliata iskayniyku ukhunchayku, manataq pʼinqakunaychu kasqanta reparani. Bibliap yachachiykunasninmantapis warmiywan parlariyta gustachikuni. Chaytaq sunqu tiyasqa, kusisqas kawsakunaykupaq yanapawayku”, nispa.

Achkha casarasqas, iskayninku sapa semana Bibliata leey, ukhunchariy ima, aswan allinta kawsakunankupaq yanapasqanta reparanku. Juk yuyaychay: imapichus aswan kʼacha kanaykipi tʼukuriy, mana imapichus warmiyki chayri qusayki aswan kʼacha kananpiqa (Gálatas 6:4, 5). Chʼampaykunata allinchanaykichik kaptinqa, Bibliata ukhunchachkaspa, ama chaykunamanta parlaychikchu. Chaykunataqa wak kutipaq saqiychik. ¿Imaraykú?

Familiaykiwan mikhuchkasqaykipi tʼukuriy. Qʼiyachaykusuptin, ¿chay ratupunichu jampikuwaq? Mana, ¿icharí? Chayta ruwaptiykiqa familiayki manaña mikhuyta munanmanchu. Jesusqa Diosmanta yachakuyta, munayninta ruwayta ima, mikhunata mikhuywan kikincharqa (Mateo 4:4; Juan 4:34). Bibliata ukhunchachkaptiykichik, chʼampayniykichikmanta parlaptiyki, qusayki chayri warmiyki Bibliata niña ukhunchayta munanmanchu. Chʼampaykunataqa, wak kutispi allinchanayki allin kanman (Proverbios 10:19; 15:23).

Casarasqas kaqkuna Diosman qayllaykullaptinkupuni sunqu juntʼasqa, kusisqastaq kawsakunqanku. Diospa Palabran nin: “Runaqa imatachus tarpun, chayllatataj oqharenqa”, nispa (Gálatas 6:7).

Enrique, Liliana ima kay versículo chiqapuni kasqanta reparanku. Paykunaqa, 45 watasña casarasqas kanku, Bibliata ukhunchanankupaq kallpachakusqallankupuniqa, mayta yanapasqanta yachanku. Enrique nin: “Mana parlarisqaykumanta warmiyta juchachaq kani, tiempo pasasqanmanjinataq iskayniyku parlarinaykupaq kallpachakunayku kasqanta repararqani”, nispa. Lilianataq nin: “Chʼampaykunapi kachkaptiyku, Jehová Diosta iskayniyku munakusqayku yanapawarqayku. Kay tukuy wataspitaq iskayniyku Diosmanta mañakuyku, Bibliatapis ukhunchallaykupuni. Enrique kʼacha kaykunata rikuchinanpaq kallpachakusqanta rikuspataq, payta munakuyta atillani”, nispa.