Familiapaq consejokuna

Kuskam kallpanchakuna Diosman sonqo kanapaq

Enriquem nin: * “Casarakusqaykumantapacham tantearqani señoray Lilianawan kuskayku Biblia estudianaykupaq. Estudiasqaykupi piensanantam munarqani ichaqa mana estudiay munasqanmi sutilla karqa. Imamantapas tapuptiyqa contestawaqmi arí otaq manam nispallan. Chaynata contestawaptinmi piensarqani estudiasqaykupi mana yanapakusqanta”, nispa.

Lilianam nin: “Enriquewanmi casarakurqani 18 watallaypi. Qallariypiqa kuskam estudiaq kaniku ichaqa sapakutim niwaq pantasqaykunamanta hinaspa imaynata astawan allin warmi kanaymanta. Chaywanmi sonqoy nanaq hinaptinmi hukmanyasqa karqani”, nispa.

¿IMATAQ sasacharqa Enriquetawan Lilianata? Kuska estudiay munasqankuqa allinmi karqa. Iskayninkum Diosta kuyarqaku chaymi Bibliata kuska estudiayta munarqaku. Ichaqa astawan huk sonqolla kanankumantaqa hukmanyasqam karqaku. Kuska estudiaspankupas manam iskayninkuchu Diosman sonqo kanankupaq kallpanchakurqaku.

¿Ima ninantaq Diosman sonqo kayqa? ¿Imanasqam Diosman sonqo kanankupaq kallpanchakunanku? ¿Imataq sasachanman? ¿Imaynatam atipanmanku?

¿Ima ninantaq Diosman sonqo kayqa?

Diosman sonqo runaqa Diospa kamachisqanman hinam kawsan (Judas 18, 19). Bibliata qellqaq apostol Pablom sutillata qawachirqa Diosta mana kasukuq runaqa aychapa munasqanman hina kawsasqanta. Paymi nirqa aychapa munayninman hina kawsaqqa kikillanpaq munaq kasqanmanta. Kikinpa piensasqanman hinam imatapas ruran, manam Diospa kamachisqanman hinachu (1 Corintios 2:14; Galatas 5:19, 20).

Diosman sonqo runaqa Diospa kamachisqantam allinpaq hapin. Paypaqqa Jehová Diosmi amistadnin chaymi paypa sumaq kayninkunata qatipakunanpaq kallpanchakun (Efesios 5:1). Chaymi kallpanchakun hukkunata kuyananpaq,  kuyapayananpaq hinaspa pacienciakunanpaqpas (Exodo 34:6). Diostam kasukun munasqanman hina mana kaptinpas (Salmo 15:1, 4). Canadá nacionpi kaq 35 wataña casarasqa Dariom nin: “Piensasqayman hinaqa Diosman sonqo runaqa piensanmi rimasqanwan otaq rurasqanwan Dioswan amistadnin imayna kasqanpi”, nispa. Señoran Juliam nin: “Piensasqayman hinaqa Diosman sonqo warmiqa sapa punchawmi kallpanchakun chuya espiritupa yanapasqanman hina kawsananpaq”, nispa (Galatas 5:22, 23).

Ichaqa manam suyanaraqchu casado kaspaña chuya espirituman hina kawsanapaqqa. Bibliaqa llapanchiktam kamachiwanchik Diosta reqsinanchikpaq hinaspa payman rikchakunanchikpaq (Hechos 17:26, 27).

¿Imanasqam Diosman sonqo kanankupaq kallpanchakunanku?

Diosman sonqo kanankupaq sapakama kallpanchakunanku kaptinqa, ¿imanasqataq casarasqakunaqa kuska kallpanchakunanku? Kaypi piensarisun, huk huertapi iskay runakuna llamkasqankupi. Hukninmi tiempollanpi imatapas tarpuyta munan, hukninñataq tiempo pasaytaña. Hukninmi wanuyta munan, hukninñataq mana wanunanpaq harkakun. Hukninmi munan sapa punchaw allin llamkayta, hukninñataq mana imata ruraspan imapas wiñananta suyan. Yaqapaschá huertamantaqa imallatapas cosechanqaku, ichaqa astawanmi cosechanmanku imata tarpunankupaq chaynataq kuska llamkanankupaq tanteaspankuqa.

Casado vidapas chaymanmi rikchakun. Mayqenpas Diosman sonqo kaptinqa yanapanmanmi allin kanankupaq (1 Pedro 3:1, 2). Ichaqa astawan allintaraqmi kawsakunmanku Diospa kamachisqanta iskayninku kasukuspa hinaspa payta servinankupaq yanapanakuspaqa. Yachayniyoq rey Salomonmi nirqa: “Chulla runalla kanamantaqa iskay runam aswan allinqa”, nispa. ¿Imanasqa? “Iskayninkum llamkasqankumanta chaskinqaku” chaymantapas “iskayninkumanta huknin wichiykuptinqa hukninmi wichiqta hatarichinqa” (Eclesiastes 4:9, 10).

Qamkunaqa munankichikchá iskaynikichik Diosman sonqo kayta. Imaynam huertapipas llamkachkaq hinam iskaynikichik kallpanchakunaykichik sumaqta kawsanaykichikpaq. Iskay sasachakuykunapi piensasun hinaspa imayna atipanamantapas.

1 KAQ SASACHAQ: “Manam tiempochakuyta atinikuchu”. Chayraq casarasqa Susym nin: “Qosaymi wasiman rinaykupaq las sieteta llamkasqayman hamun. Wasiman chayaruptiykuqa tukuy imam ruranapaq kachkan. Chaymi sasachakuniku Bibliata kuska estudianaykupaq ichaqa reqsikunikum chayta ruranaykupaq kasqanta, chayna kaptinpas pisipasqa kasqaykuwanmi puñuy atipawanku”.

Imataq yanapasunkichikman: Imayna yanapanakunaykichikpaq tanteaychik. Qosanwan imapaq tanteasqankumantam Susy nin: “Eduardowanmi tantearuniku temprano hatarispa llamkayniykuman manaraq richkaspa Bibliata kuska leenaykupaq. Chaymantapas paymi wakin ruraykunawan yanapawan tiempochakunaykurayku”, nispa. ¿Yanaparqachu chayna kallpanchakusqanku? Eduardom nin: “Cuentatam qokuni Susywan kuska Biblia estudiasqaykum ima sasachakuytapas atipanaykupaq hinaspa hawkalla kawsanaykupaq yanapawasqankumanta”, nispa.

Diospa yachachikuyninkunamanta rimaspapas ¿allinchu kanman kuska Diosta mañakuynikichik? Chayta ruraptikichikqa allintam yanapasunkichik. 17 wataña casarasqa Ramonmi nin: “Ñawpa watakunapim señoraywan sasachakuypi tarikurqaniku. Ichaqa tanteakurqanikum imawan sasachakusqaykumanta sapa tuta kuskayku Diosman willakunaykupaq. Chaymi yanapawarqaku sasachakuyniykuta atipaspa kusisqa kawsakunaykupaq”, nispa.

KAYTAPAS RURAWAQCHIKMI. Huk ratochallapas tiempochakuychik punchawpi allinkuna pasasusqaykichikmanta willanakunaykichikpaq hinaspa chaykunamanta Diosman graciasta qoychik. Tanteaychiktaq ima sasachakuynikichikpi Diospa yanapaynin  necesitasqaykichikta. Ichaqa chay rimasqaykichiktaqa ama servichikuychikchu imapipas pantasqaykichikmanta ninakunaykichikpaqqa. Kuska orakuspaykichikqa imapipas yanapasunaykichikpaq kaqkunallamanta mañakuychik. Ichaqa mañakusqaykichikman hina kawsaspa cambiay munasqaykichikta qawachiychik.

2 KAQ SASACHAQ: “Manam chaynallatachu entiendeniku”. Tonym nin: “Manam haykapipas gustawaqchu librokuna leeyqa”, nispa. Señoran Nataliamanñataqmi leeyta gustan. Paymi nin: “Leeytam gustawan hinaspa yachasqaymanta willakuytapas. Wakinpiqa piensanim Bibliata estudiaptiyku yachasqaykunawan qosay penqachisqayta”, nispa.

Imataq yanapasunkichikman: Pim astawan yachasqanmanta atipanakunaykichikmantaqa yanapanakuychik. Reparay vida pasaqmasiki imapi astawan kallpanchakusqanpi hinaspa alabaykuy. Tonym nin: “Reqsikunim Bibliamanta yachachikuykunata estudiananpaq señoray kallpanchakusqanta, chaywanmi wakinpiqa hukmanyaspa paywan kuska estudiaypi sasachakurqani. Chayna kaptinpas señorayqa entiendewaqmi. Kunanqa sapakutim Bibliata kuska estudianiku manañam hukmanyaniñachu. Chaymantapas estudiasqan kaqkunamantam rimaniku. Chayna parlasqaykum hawkalla kawsakunaykupaq yanaparuwanku”, nispa.

Achkam cuentata qokurunku Bibliata sapa semana kuska estudiasqanku casado vidankupi allinta kawsanankupaq yanapasqanta. Kayta yuyaychik, kikiki imayna kasqaykipi reparay ama vida pasaqmasiki imapi cambiananpichu (Galatas 6:4). Ima sasachakuynikichikpas kaptinqa ama rimaychikchu estudiasqaykichik horaqa. Chaykunamantaqa huk kutipiña rimaychik. ¿Imanasqa?

Familiaykiwan mikusqaykipi piensariy. ¿Hampikuwaqchu chay hora qeyallaña heridaykita? Manachá, chayta ruraptikiqa millakuymantach pipas manaña mikuyta munanqachu. Diosmanta yachayta hinaspa kamachisqan ruraytam Jesusqa mikuywan tupachirqa (Mateo 4:4; Juan 4:34, NM). Chaynallataqmi kanman “heridaykitapas” hampichkaq hina sapa estudiasqaykichikpi imapas mana allin kasqanmanta rimaptikiqa, vida pasaqmasikiqa manañam qanwan estudiayta munanqachu. Kanmanmi ima sasachakuypas chaymanta rimanapaq. Ichaqa tanteanam huk punchawpiña chaymanta rimanapaq (Proverbios 10:19; 15:23).

KAYTAPAS RURAWAQCHIKMI. Vida pasaqmasikipa imayna kaynin astawan gustasusqaykimanta qellqay. Yapapi Bibliata estudiasqaykichikpi niy chay allin kayninkunamanta agradecekusqaykita.

Tarpusqanchiktam cosechasun

Casarasqakuna iskayninku Diosman sonqo kanankupaq kallpanchakuspankuqa cosechachkaq hinam hawkayaypi kusisqa kawsakunqaku. Bibliam nin: “Runaqa imapas tarpusqantam cosechanqa”, nispa (Galatas 6:7).

Kay yachachikuypa qallariyninpi rimasqanchik Enriquewan Lilianam yacharurqaku chay textopa nisqanqa cheqap kasqanta. 45 watañam casarasqa kachkanku ichaqa cuentatam qokunku sapakuti estudiayqa allinpaq kasqanta. Enriquem nin: “Señoraymanmi tumpaq kani rimanaykupaq sasachakusqaykumanta. Tiempo pasasqanman hinam cuentata qokurqani kikiy cambianaypaq kasqanta”, nispa. Lilianam nin: “Sasachakusqayku tiempopim imamantapas astawanqa Jehová Dios kuyasqayku yanapawarqaku. Kay unay wataña casado vidaykupim kuska estudianiku hinaspa Diosta mañakuniku sapakuti. Diospa yachachisqankunata kasukunanpaq qosay kallpanchakusqanta qawaspaymi aswan kuyani”, nispa.

[Willakuy]

YUYAYMANANAPAQ TAPUKUYKUNA

▪ ¿Haykapitaq Diosta vidapasaqmasiywan kuska mañakurqaniku?

▪ ¿Imaynatataq yanapayman vida pasaqmasiyta Bibliata kuska estudianaykupaq?