Aye so ayeke sara si sewa aduti na ngia

Gi ti ga zo ti yingo na yâ ti mariage ti mo

Frédéric *: “Lani so e mû tere kpâ, mbi tene na wali ti mbi ti tene e manda Bible legeoko. Mbi sara kue ti tene li ti lo angbâ na ndo ti ye so e yeke manda. Me so kue gbä, tongana mbi hunda tënë, lo yeke tene gi ‘en’ wala ‘ên-ën.’ Mbi ku lani ti tene mandango Bible ti e ni aduti tongaso pëpe.”

Line: “Na ngoi so mbi na Frédéric e mû tere, mbi yeke lani na ngu 18. Lakue e yeke manda ka Bible legeoko, me Frédéric ayeke mû ka ngoi ni so ti fa awokongo ti mbi kue na gigi nga tongana nyen mbi doit ti sara kua ti wali nzoni. Ye so asara nzoni lani na mbi oko pëpe.”

MO PENSÉ kpale ti Frédéric na Line ayeke lani so wa? Bibe ti ala ni ayeke sioni pëpe. Ala use kue aye Nzapa nga ala bâ so a yeke kota ye ti tene ala manda Bible legeoko. Me ye so alingbi fade ti kpengba songo ti ala, tâ gi ni la si aga na kpale na ala. Tâ tënë, ala yeke manda ye legeoko, me sarango ye ti ala use kue akpa ti azo ti yingo pëpe.

Zo ti yingo ayeke sara ye tongana nyen? Ngbanga ti nyen a yeke nzoni azo so asara mariage awe agi ti sara ye tongana azo ti yingo? Akpale wa ala lingbi ti wara? Nga, ala lingbi ti sara nyen ti hon ndo ni?

Zo ti yingo ayeke sara ye tongana nyen?

Na yâ ti Bible, tongana a sara tënë ti “zo ti yingo” a ye ti sara tënë ti sarango ye ti tere ti zo ni so (1 aCorinthien 2:15). Na tapande, bazengele Paul afa kangbi so ayeke na popo ti zo ti yingo na zo ti mitele. Lo fa so zo ti mitele ayeke gi mingi ni gi nzoni ti lo wani me ti ambeni zo nde pëpe. Lo yeke sara gi ye so anzere na lo, me pëpe ye so bê ti Nzapa aye.​—1 aCorinthien 2:14; aGalate 5:19, 20.

Me ti zo ti yingo, lo ye gi ti sara ye so bê ti Nzapa aye. Lo bâ Jéhovah Nzapa tongana Kamarade ti lo na lo yeke gi lege kue ti sara ye tongana lo (aÉphésien 5:1). Tongaso, na yâ ti  sarango ye ti lo na mbage ti amba ti lo azo, lo yeke sara ye na ndoye, na nzoni bê nga na ngangu pëpe (Exode 34:6). Même tongana a yeke ngangu na lo ti sara mbeni ye so Nzapa ahunda, lo yeke sara ni (Psaume 15:1, 4). Darren, so ayeke lango na Canada na lo sara mariage a sara ngu 35 awe, atene: “Ti mbi, zo ti yingo ayeke bâ lakue ye so tënë ti yanga ti lo nga na sarango ye ti lo ayeke sara na ndo ti songo ti lo na Nzapa.” Wali ti lo Jane atene: “Ti mbi, wali so akpengba na lege ti yingo ayeke sara kue ti tene lâ oko oko lo lë lengo ti yingo ti Nzapa.”​—aGalate 5:22, 23.

Biani, a hunda pëpe ti tene zo asara mariage awe si lo ga zo ti yingo. Bible afa ti lo so a yeke ti zo oko oko ti manda ye na ndo ti Nzapa na ti gi ti sara ye tongana lo.​—Kusala 17:26, 27.

Ndani so a hunda ti duti zo ti yingo

Tongaso, ngbanga ti nyen a yeke nzoni ala so asara mariage awe agi ti ga azo ti yingo ala use kue? Bâ tapande so: Azo ti fango yaka use abungbi nginza ala vo mbeni sese ti lu kobe dä. Mbeni atene so a yeke nzoni a lu alê ti kobe ni na ngoi tongaso, me mbeni atene ti lo a yeke nzoni a ku kete si. Mbeni aye ti sara kua na engrais tongaso, me mbeni ake vîi, ti lo a bezoin ni pëpe. Mbeni aye ti fâ yaka dä lango oko oko. Ti mbeni, lo kanga maboko, lo duti lo bâ ndo. Na mara ti ye tongaso, peut-être alê ti kobe ni ayeke sigigi, me gi kete. Tongana ala use kue amä tere fade na ndo ti ye so a lingbi ala sara nga ala sara kua maboko na maboko, ka a yeke lë mingi ahon so.

Na yâ ti mariage, koli na wali ayeke tongana azo ti fango yaka so. Tongana gi oko ti ala la ayeke gi ti ga zo ti yingo, songo ti ala alingbi peut-être ti ga nzoni (1 Pierre 3:1, 2). Me tongana ala use kue la ayeke gi ti sara ye so bê ti Nzapa aye na ti mû maboko na mba, a yeke duti nzoni ahon so. Gbia Salomon, so ayeke na ndara mingi, atene: “Azo use ayeke nzoni ahon zo oko.” Ngbanga ti nyen? “Teti ala yeke na futa nzoni teti kusala ti ala. Teti tongana oko atï, fade mbeni ayä ita ti lo na nduzu.”​—Zo-ti-fa-tene 4:9, 10.

Peut-être mo ye mingi ti tene mo na koli wala wali ti mo agi ti sara ye tongana azo ti yingo. Me tongana ti awafango yaka so, gi dutingo na nzara ni alingbi pëpe. Bâ akpale use so peut-être mo wara ni nga tongana nyen mo lingbi ti hon ndo ni.

KOZO KPALE NI: Ngoi ni ayeke dä pëpe. Suzanne, so a iri lo nga Sue na so asara mariage ade ti ninga pëpe, atene: “Koli ti mbi ayeke ga ka ti mû mbi na place ti kua na 19h. Tongana e kiri na yanga-da awe, gbâ ti kua ti da ayeke ku e. Na li ti e, e tene e yeke manda Mbeti ti Nzapa li ti e use, me e fatigué kue na e ye ti wu tere.”

Ye so mo lingbi ti sara: Duti nduru ti gbian yâ ti programme ti mo na mû maboko na mba ti mo. Sue atene: “Mbi na koli ti mbi e bâ so a yeke nzoni e zingo hio na ndapre, e diko Bible nga e sara lisoro na ndo ni kozoni si e gue na kua. Lo mû nga maboko na mbi na yâ ti ambeni kua ti yâ ti da si e wara ngoi ti duti na tere ti mba.” So ala gbian yâ ti kapa ti ala so, ye ti nzoni wa ala wara na pekoni? Ed, koli ti Sue, atene: “Mbi bâ so tongana mbi na Sue e sara lisoro lakue na ndo ti aye ti yingo, e hinga tongana nyen ti sigigi na yâ ti akpale so e yeke wara.”

Nde na lisoro so ala yeke sara na popo ti ala, a yeke nga kota ye ti mû kete ngoi ti sambela li ti ala use. Ngbanga ti nyen? Ryan, so asara mariage a sara ngu 16 awe, atene: “Ade ti ninga pëpe, mbi na wali ti mbi e wara kota kpale na yâ ti duti ti e. Me lakue na bï e sambela Nzapa legeoko, e fa na lo akpale ti e. Ye so amû maboko na e ti leke akpale ti e na ti kiri ti wara ngia na yâ ti mariage ti e.”

TARA TI SARA YE SO: Lakue na lakui, mû mbeni kete ngoi, mo na koli wala wali ti mo, ti sara tënë na ndo ti anzoni ye so asi na ala, aye so ala lingbi ti kiri singila na Nzapa ndali  ni. Nga ala sara tënë na ndo ti akpale so ala wara, so ala bezoin mungo maboko ti Nzapa dä. Me hange, mû ngoi so ti fa na afaute ti mba ti mo ni pëpe. Nde na so, tongana ala use ayeke sambela, fa gi aye so a lingbi mo na lo asara kua dä. Na ndade ni, sara ye ague oko na tënë ti sambela ni.

USE KPALE NI: Ndara ti lo ayeke nde na ti mbi. Tony atene: “Mbi ye ka ti duti ti diko mbeti pëpe.” Wali ti lo Nathalie atene: “Mbi ye dikongo mbeti na ti sara tënë ti aye so mbi diko so. A si ka so tongana mbi na Tony e sara lisoro na ndo ti Bible, mbeto asara lo kete.”

Ye so mo lingbi ti sara: Mû maboko na mba ti mo ni. Sara mandako na lo pëpe wala fâ ngbanga na ndo ti lo pëpe. Gonda lo ndali ti ngangu so lo sara, na wa lo ti ngbâ dä. Tony atene: “A si ka so nzerengo tere so si wali ti mbi ayeke sara na tënë ti Bible ahon ngangu ti mbi kete. Lani mbi ye ti sara lisoro na lo na ndo ti aye ti yingo pëpe, me lo mû maboko na mbi mingi. Fadeso e yeke sara lisoro na ndo ti aye ti yingo mingi, na mbi bâ so mbeni ye ti sara mbeto ndali ni ayeke dä pëpe. Nga, a nzere na mbi mingi ti sara lisoro na lo na ndo ni. Mbeto ti sara lisoro na mba asara e ape.”

Akoli na awali mingi so asara mariage abâ so tongana ala mû ngoi yenga oko oko ti diko Bible legeoko na ti manda ni, ala yeke na ngia. Me girisa tënë so pëpe: Ye so mo yeke manda so, mû ni mo haka ni na mo wani me pëpe na koli wala wali ti mo (aGalate 6:4). Atënë so ala mä tere dä pëpe so, ala sara lisoro na ndo ni na mbeni ngoi nde, me pëpe na ngoi ti mandango ye ni. Ngbanga ti nyen?

Bâ ye so si: Tongana mo yeke te ye na sewa, fade mo yeke mû ngoi so ti kanga na lê ti mbeni fungo kä? Oko pëpe! Mo yeke zi nzara ti kobe ni na yâ ti azo ni kue. Jésus atene so mandango tënë ti Nzapa nga na sarango ye so bê ti lo aye ayeke tongana tengo kobe (Matthieu 4:4; Jean 4:34). Ni la, lakue tongana ala yeke manda Bible si mo yeke fa gi ye so ason bê ti mo, mo lingbi ti zi nzara ti mandango Bible ni na bê ti koli wala wali ti mo. A ke pëpe ti tene ala sara lisoro na ndo ti akpale so asi na ala. Me ala soro mbeni ngoi nde ndali ni.​—aProverbe 10:19; 15:23.

TARA TI SARA YE SO: Sara na mbeti aye use wala ota so mo bâ na mbage ti koli wala wali ti mo na so anzere na mo mingi. Nga, tongana ala yeke manda ye na ndo ti aye so, fa na lo so asarango ye ti lo ni so anzere na mo mingi.

Mo yeke ko gi ye so mo lu

Tongana ala use kue ayeke sara kue ti ga azo ti yingo, ala yeke duti na siriri nga ala yeke bâ nzoni ande na yâ ti mariage ti ala. Bible atene so “ye so mbeni zo ayeke lu, gi ni la fade lo yeke ko ni.”​—aGalate 6:7.

Frédéric na Line, so e sara tënë ti ala fade na tongo nda ti article so, abâ tâ tënë so na ndo ti ala wani. Ala mû tere a sara ngu 45 awe, na ala bâ so ti ngbâ lakue ti gi ti sara ye tongana zo ti yingo aga na ye ti nzoni mingi. Frédéric atene: “Bê ti mbi ason lani na tere ti wali ti mbi mingi, ngbanga ti so lo yeke kanga gi yanga ti lo so. Me tongana angoi ayeke hon, mbi bâ so mbi nga kue a lingbi mbi changé.” Line atene: “Tâ ye so amû lani maboko na e na yâ ti akpale ayeke so e use kue e ye Jéhovah Nzapa. Na yâ ti angu kue so ahon, e manda Bible lakue nga e sambela legeoko. Nga, tongana mbi bâ ngangu so Frédéric ayeke sara ti duti na anzoni sarango ye, a sara si a yeke ngangu na mbi pëpe ti ye lo.”

[Kete tënë na gbe ni]

HUNDA TERE TI MO . . . 

▪ Lawa si ti ndangba ni e use kue e sambela legeoko?

▪ Mbi lingbi ti sara nyen ti tene koli wala wali ti mbi ayeda na bê ti lo oko ti sara lisoro na mbi na ndo ti tënë ti Nzapa?