O Auala e Fiafia ai le Aiga

Ia Atiaʻe o se Ulugalii Uiga Faaleagaga

Frederick *: “I le taimi faatoʻā ma faaipoipo ai, na ou manaʻo lava e ma te suʻesuʻeina faatasi ma laʻu avā le Tusi Paia. Na ou maumauaʻi lava ina ia uaʻi mai a o faia a ma suʻesuʻega. Ae e lē mafai ona nofo faalelei Leanne. A ou fesili atu foʻi, e pau lava lana tali o le ioe po o le leai. E lē ōgatusa ana gaoioiga ma le auala lea ou te manatu e tatau ona faia ai la ma suʻesuʻega o le Tusi Paia.”

Leanne: “I le 18 o oʻu tausaga, na ou faaipoipo ai iā Frederick. E masani ona ma suʻesuʻe faatasi le Tusi Paia, ae e faaaogā e Frederick na taimi e taʻu mai ai oʻu sesē, ma mea e tatau ona ou faia ina ia avea ai aʻu ma avā lelei. Na ou lagona lava le lotovaivai ma le tigā!”

O LE ā sou manatu, o le ā le faafitauli i le va o Frederick ma Leanne? E lelei o la faanaunauga. E alolofa uma i laʻua i le Atua. Na la iloa foʻi e manaʻomia ona la suʻesuʻe faatasi le Tusi Paia. Peitaʻi, nai lo o le avea ma mea e ono faamalosia ai le la mafutaga, ae ua avea ma māfuaaga e lē māfana ai. E moni na faia faatasi a la suʻesuʻega, ae e la te leʻi atiaʻe o se ulugalii uiga faaleagaga.

O le ā e uiga iai le faaleagaga? Aiseā e tatau ai i ulugalii faaipoipo ona maumauaʻi e atiaʻe uiga faaleagaga? O ā luʻi e la te ono fesagaʻia, ma e faapefea ona la foʻia?

O le ā e Uiga Iai le Faaleagaga?

E pei ona faaaogā i le Tusi Paia, o loo faasino atu le upu “faaleagaga” i se uiga po o le vaaiga i le olaga. (Iuta 18, 19) O se faaaʻoaʻoga, na faamatilatila mai e le tusitala o le Tusi Paia o Paulo, le eseesega o uiga o se tagata faaleagaga ma se tagata faaletino. Ua faaalia mai e Paulo, o ē e iai tuʻinanauga o le tino e sili atu ona latou manatu iā i latou lava nai lo o isi. E latou te faia le mea e saʻo i o latou lava manatu, nai lo o le taumafai e ola e tusa ma tapulaa a le Atua.—1 Korinito 2:14; Kalatia 5:19, 20.

Peitaʻi, o i latou e iai uiga faaleagaga e faatāuaina tapulaa a le Atua. E latou te vāai iā Ieova le Atua o la latou Uō, ma taumafai e faaaʻoaʻo i ona  uiga. (Efeso 5:1) O le māfuaaga lea e latou te alolofa, agalelei, ma agamalu ai pe a feagai ma isi. (Esoto 34:6) E latou te usiusitaʻi foʻi i le Atua e tusa lava pe e faigatā ona latou faia faapea. (Salamo 15:1, 4) Ua faapea mai Darren, o lē e nofo i Kanata ma ua 35 tausaga talu ona faaipoipo: “Ou te iloa o se tagata faaleagaga, e mafaufau lava o ia i le aafiaga o lana faiā ma le Atua, ona o le auala e tautala ma amioaʻi ai.” Na taʻua atili e lana avā o Jane: “Ou te manatu o se avā e faaleagaga, e na te faia taumafaiga fitā i aso taʻitasi, ina ia avea fua o le agaga o le Atua ma se vaega o ona uiga.”—Kalatia 5:22, 23.

E lē faapea seʻiloga e faaipoipo se tasi ona faatoʻā atiaʻe lea o uiga faaleagaga. O le mea moni, ua aʻoaʻoina i le Tusi Paia e iai i tagata taʻitoʻatasi le tiute tauave ina ia suʻesuʻe e uiga i le Atua, ma faaaʻoaʻo iā te ia.—Galuega 17:26, 27.

Aiseā e Atiaʻe ai o se Ulugalii Uiga Faaleagaga?

Aiseā la e tatau ai ona taumafai e atiaʻe o se ulugalii uiga faaleagaga? Seʻi manatu i lenei faataʻitaʻiga: E toʻalua ni faifaatoʻaga e ana se laufanua itiiti, ma e la te mananaʻo e totō ai fualaau ʻaina. Ua filifili le tasi e totō fatu i se taimi patino o le tausaga, ae e manatu le isi e tatau ona totō i se taimi mulimuli ane. E manaʻo le tasi faifaatoʻaga e faaaogā se faalelei eleele patino, ae e matuā teena e le isi ma manatu e lē manaʻomia. E manaʻo le tasi e galue mamafa i le faatoʻaga i aso taʻitasi, a o le isi e na o le nofonofo lava ae lē fia fesoasoani. I lenei tulaga, e ono maua mai ni nai fua o faaeleeleaga mai i le faatoʻaga, ae o le a lē fua tele mai e pei o le tele lea e faatalitalia pe afai e tutusa o la manatu i le mea e tatau ona fai, ma galulue faatasi ina ia maua le mea o loo mananaʻo i ai.

E tai pei lava se tane ma se avā o na faifaatoʻaga. Pe afai e na o le toʻatasi e atiaʻe uiga faaleagaga, atonu e faaleleia ai le la mafutaga. (1 Peteru 3:1, 2) Ae maʻeu le sili atu ona lelei, pe afai e malilie uma le ulugalii e ola e tusa ai ma tapulaa a le Atua, ma galulue malolosi e lagolagoina e le tasi le isi a o auauna atu i le Atua! Na tusi le tupu poto o Solomona: “E sili ona lelei o le toʻalua nai lo o le toʻatasi.” Aiseā? “Auā ua iā te i laʻua le taui lelei o la laʻua galuega mamafa. Auā afai e paʻū le tasi, e toe faatūina o ia e lē la te toʻalua.”—Failauga 4:9, 10.

E mautinoa lou naunau ina ia atiaʻe faatasi uiga faaleagaga ma lau paaga faaipoipo. Ae e pei lava o le totōina o fualaau ʻaina, e lē mafai ona maua ni iʻuga lelei pe afai e na o le naunau i ai. Seʻi mātau ni luʻi se lua e te lua ono fesagaʻia, ma auala e ono foʻia ai.

LUʻI 1: E leai so ma taimi. Ua faapea mai Sue, o sē e leʻi leva ona faaipoipo: “E piki aʻu e loʻu toʻalua mai i le galuega i le 7 i le afiafi. Pe a ma taunuu i le fale, e tele feʻau e manaʻomia ona fai. E feteenaʻi le mafaufau ma le tino, ona e manaʻo le mafaufau e faaalu se taimi e aʻoaʻoina faatasi ai mea e uiga i le Atua, ae ua matuā vaivai lava le tino.”

O se auala e ono foʻia ai: Ia fetuutuunaʻi ma ia galulue faatasi. Ua toe faapea mai Sue: “Na ma filifili ma laʻu tane ina ia vave feala i taeao e faitau ma talanoaina faatasi se vaega o le Tusi Paia, a o leʻi ō e faigaluega. E fesoasoani mai foʻi iā te aʻu i le faia o nisi o feʻau, ina ia iai se taimi e ma te faifaimea faatasi ai.” O ā ni aogā e maua mai i nei taumafaiga e tele? Na faapea mai Ed, le tane a Sue: “Ua ou iloa pe a fai ma masani le talanoaina faatasi o mataupu faaleagaga ma Sue, e aogā tele lea i le foʻia o faafitauli, ma mafai ai ona faaitiitia o ma popolega.”

E lē gata i le fetalanoaaʻi, ae e tāua foʻi le faaaluina o sina taimi i aso taʻitasi e lua te tatalo faatasi ai. O le ā le aogā o le faia faapea? Ua fai mai Ryan, o lē ua 16 tausaga talu ona faaipoipo: “I se taimi e leʻi leva tele atu, sa oo ai la ma faaipoipoga i ni tulaga e sili ona faigatā. Peitaʻi, na ma faaavanoa se taimi e tatalo faatasi ai i pō taʻitasi, ma faailoa atu o ma popolega i le Atua. Na ou iloa o le tatalo faatasi, ua fesoasoani e foʻia ai o ma faafitauli ma toe maua ai le fiafia i le ma faaipoipoga.”

FAATAʻITAʻI LE MEA LENEI: Ia faaavanoa sina taimi i faaiʻuga o aso taʻitasi e talatalanoa ai i ni mea lelei na tutupu iā te oulua o se ulugalii, o ni mea e mafai ona oulua faafetaia ai le Atua. Ia talatalanoa foʻi i luʻi e lua te fesagaʻia,  lea e sili ona manaʻomia ai le fesoasoani a le Atua ina ia tumau ma foʻia ai. Ia faaeteete: Aua le faaaogāina lea taimi e faailoa ai masei o lau paaga. Peitaʻi, pe afai e te lua tatalo faatasi, ia taʻua na o mea e manaʻomia ona oulua galulue faatasi ai. I le aso e sosoo ai, ia taumafai e gaoioi e tusa ma mea na taʻua i a oulua tatalo.

LUʻI LONA 2: E eseese o ma tomai. Ua faapea mai Tony: “E lē taitai ona ou masani i le nofo i lalo ma faitau se tusi.” Na faapea mai lana avā o Natalie: “Ou te fiafia e faitau, ma talanoa e faatatau i mea na ou aʻoaʻoina. O isi taimi ou te manatu ai e matamuli Tony iā te aʻu pe a ma talanoa i mataupu faale-Tusi Paia.”

O se auala e ono foʻia ai: Ia avatu le lagolagosua, ae aua le faatautavā pe faamasinosino. Ia faailoa atu i lou toʻalua lou talisapaia o ana taumafaiga, ma ia faalaeiau o ia ina ia tumau pea ona maumauaʻi i le faia o le mea e tonu, a o auauna atu iā Ieova. Na toe faapea mai Tony: “O le naunau o laʻu avā e talanoa i mataupu faaleagaga, e faafaigatā ai iā te aʻu ona faailoa atu oʻu manatu. Na ou faatalatū foʻi i le taimi ua teʻa e talatalanoa ma ia e uiga i mataupu faaleagaga. Peitaʻi, e matuā lagolagoina aʻu e Natalie. O lea ua fai ma masani le talanoaina faatasi o mataupu faaleagaga, ma ua ou iloa e leai se māfuaaga ou te fefe ai fua. Ou te fiafia e talatalanoa ma ia i na mataupu. Ua fesoasoani iā i maʻua o se ulugalii e faateleina ai le filemu ma lē toe popole naʻuā.”

Ua iloa e le toʻatele o ulugalii e faaleleia atili a latou faaipoipoga, pe a faaavanoa se taimi ua faatulagaina i vaiaso taʻitasi e faitau ma suʻesuʻe faatasi ai le Tusi Paia. O se faaeteetega: Ia e faatatauina ni fautuaga mai i le Tusi Paia iā te oe lava, ae lē o lau paaga. (Kalatia 6:4) Ia talanoa i faafitauli o la oulua faaipoipoga i se isi taimi, ae lē o taimi o a oulua suʻesuʻega. Aiseā?

Ia mātau le mea lenei: Pe e te faaaogāina le taimi o le taumafataga a le tou aiga e faamamā ma fusi ai se manuʻa ua papala? Ailoga. E mautinoa lava o le a lē fia aai uma tagata. Na faatusatusa e Iesu le aʻoaʻoina ma le faia o le finagalo o le Atua i le ʻaina o meaʻai. (Mataio 4:4; Ioane 4:34) Pe afai e te talanoa e uiga i manuʻa po o faafitauli tau i le faalogona i taimi uma lava e faaaogā ai le Tusi Paia, o le a iʻu la ina mou atu ai le fiaʻai faaleagaga o lau paaga. O le mea moni, o se mea tatau le talanoa i o oulua faafitauli, ae ia faatulaga se isi taimi e talanoa ai i na mataupu.—Faataoto 10:19; 15:23.

FAATAʻITAʻI LE MEA LENEI: Ia tusi i lalo ni uiga se lua pe tolu o lau paaga e sili ona e faatāuaina. Pe a oulua toe talanoa i mataupu faaleagaga e faatatau i na uiga, ia faailoa atu i lau paaga lou talisapaia o le auala o loo ia faaalia ai na uiga.

E te Selesele le Mea E te Lūlū

Pe afai e lua te lūlū, pe atiaʻe o se ulugalii uiga faaleagaga, o le a sili ona filemu ma tauia la oulua faaipoipoga. Ua moni ai le Afioga a le Atua lea e faamautinoa mai, “o le mea e lūlūina e le tagata, o le mea lava lea e na te seleseleina mai.”—Kalatia 6:7.

Na molimauina e Frederick ma Leanne lea na taʻua i le amataga o lenei mataupu, le moni o le taʻiala lenā a le Tusi Paia. Ua 45 nei tausaga talu ona la faaipoipo, ma ua la iloa e tauia le iai o se uiga o le lē fiugofie. Na faapea mai Frederick: “E masani ona ou tuuaʻia laʻu avā ona o le lē lelei o le auala e ma te fesootaʻi ai.” Ae ua faapea mai Leanne: “Na ou iloa ua tatau foʻi ona faia ni aʻu taumafaiga. O le mea sa sili ona fesoasoani iā i maʻua a o feagai ma taimi faigatā, o lo ma alofa lea mo Ieova le Atua. A o faagasolo tausaga, ua fai ma masani le fai faatasi o a ma suʻesuʻega ma tatalo. O le vaaia o taumafaiga a Frederick e faaleleia le auala e na te faaalia ai uiga faa-Kerisiano, ua faigofie ai mo aʻu ona alofa iā te ia.”

[Faaopoopoga i lalo]

FESILI IFO IĀ TE OE LAVA . . .

▪ O le ā le taimi mulimuli na ma tatalo faatasi ai o se ulugalii?

▪ O le ā se mea ou te faia ina ia faalaeiau ai laʻu paaga e saʻoloto lana talanoa mai iā te aʻu e uiga i mataupu faaleagaga?