Akaa A Van A Msaanyol Hen Tsombor

Ne Noov man Kasev, Maa Nen Mlu Wen u ken Jijingi

Frederick * kaa ér: “Zum u se sember vôson ayol ase la, hanma shighe yô m sendegh mer saa mo vea kwase wam se hen Bibilo imôngo. Yange m soo mer shighe u se lu henen Bibilo yô, a ver ishima her jighilii. Kpa Leanne ti ishima na i lu her keng ga. Shi yange mea pine mbampin yô, á na mlumun u een shin ei tseegh. Yange a na mbamlumun tsembelee sha gbenda u i doo u a na mlumun shighe u i lu henen Bibilo la ga cii.”

Leanne kaa ér: “Yange m lu anyom 18 shighe u m vôso Frederick la. Yange se henen Bibilo imôngo hanma shighe cii, nahan kpa sea tema u henen Bibilo yô, Frederick a gba hônon ave sha akaa a m er shami ga la cii, kua shi igbenda i me kar ve me seer lun kwaseya u injaa yô. Nahan yô, yange iyol hingir u kpen mo kpishi u henen Bibilo shi ishima i vihin mo ker!”

KA NYI u hen wer yange i za iyol ken ivese i Frederick man Leanne laa? Yange ve lu a awashima u dedoo. Ve cii Aôndo yange doo ve ishima. Shi ve cii yange ve nenge ér doo u vea henen Bibilo imôngo. Kpa kwagh u ma wase ve u lun ken mzough ne gema lu van a va a mpav hen atô ve. Shin er yange ve lu henen Bibilo imôngo nahan kpa, ve gema ve lu maan mlu ve u ken jijingi la sha inja i nom man kwase ga.

Mlu u ken jijingi la ka nyi? Er nan ve i gbe u mba ve vese ayol a ve la vea nôngo u maan mlu ve u ken jijingi laa? Ka mbamtaver mba nyi alaghga vea tagher a mi, man vea hemba mbamtaver mban nena?

Mlu u ken Jijingi la Ka Nyi?

Ishember i ‘mlu u ken jijingi’ i Bibilo i er kwagh u i la ka gbenda u ior ve eren uma shin ve nengen uma la. (Yuda 18, 19) Ikyav i tesen yô, Paulu, u lu môm ken ior mba yange ve nger Bibilo la, pase mkposo u a lu hen atô u or u wan akaa a ken jijingi ikyo man or u iyolough yô. Paulu tese ér mba ve veren ishima sha akaa a yolough la mba hembe wan ayol a ve ikyo a ior mbagenev. Mba eren kwagh u a zough sha atindiakaa a Aôndo la ga, kpa ka kwagh u ve nenge i doo ve la.—1 Mbakorinte 2:14; Mbagalatia 5:19, 20.

Kpa ior mba akaa a ken jijingi a gbe ve ishima yô, mba we atindiakaa a Aôndo ikyo. Ka ve nenge Yehova Aôndo ér ka ijende ve, shi ve nôngon ér vea lu mbakaven un kpaa. (Mbaefese 5:1) Sha nahan yô, mba eren kwagh a mbagenev kundu kundu  kua sha dooshima man sha mhôôn kpaa. (Ekesodu 34:6) Shi mba ongo imo i Aôndo, kua sha shighe u i taver ve u eren nahan je kpaa. (Pasalmi 15:1, 4) Orgen ken tar u Kanada u a er ivese i kom anyom 35 hegen yô, mba yer un ér Darren, a kaa ér, “Gbenda u mo m kav kwagh ne yô, m nenge mer hanma shighe cii yô, or u nan veren ishima sha akaa a ken jijingi la ka nan henen er iliam i nan man ieren i nan ia fatyô u benden a ikyar i nan ye vea Aôndo la.” Jane, kwase u Darren, seer mkaanem nam man ér: “M hen mer kwase u veren ishima sha akaa a ken jijingi, ka u nan eren tom taveraa hanma sev cii sha u lun a aeren a ityamegh ki jijingi u Aôndo ken uma u nan la.”—Mbagalatia 5:22, 23.

Nahan kpa, u ngu wer gba u saa or nana er ivese keng ve nana fatyô u lun a ieren i veren ishima sha akaa a ken jijingi ne ga. Jighilii yô, Bibilo tese ér gba u hanma wase cii, nana hen kwagh u Aôndo shi nana dondo un kpaa.—Aerenakaa 17:26, 27.

Er Nan Ve i Gbe u Mba Ve Vese Ayol a Ve la Vea Maa Mlu Ve u ken Jijingi Laa?

Er nan ve i gbe u mba ve vese ayol a ve mbara vea eren kwagh imôngo sha u maan mlu ve u ken jijingi laa? Hen ase sha ikyav ne: Mbasulev uhar mba a inya ijiir i môm, nahan ve soo u kahan sule u ikyayue. U môm ken ve soo u lôôn ikyayue la ken ma uwer ugen ken inyom, kpa ugen la gema nenge ér doo u a lôô ikyayue la hen shighe la ga. U môm soo u wan icigh ken sule la, kpa ugen la venda inyigh i môm ér ityôkyaa ngi i wan sule la icigh ga. U môm soo ér una eren tom ken sule la hanma iyange. Ugen la di hemba doon un u teman nengen a nenge, a u un kpa eren tom la. Aluer kwagh er nahan yô, alaghga ikyayue la ia doo, kpa ia kera doo er ve uhar vea tem imôngo, vea tsough kwagh u vea er, shi vea er tom la imôngo ve, ma i doo nahan ga.

Nom man kwase kpa mba er mbasulev mbara nahan. Aluer mô ken a ve nan ngu maan mlu u nan u ken jijingi yô, alaghga ivaa ve la ia seer doon. (1 Peteru 3:1, 2) Kpa a hemba doon aluer ve mba uhar mbara cii ve lumun u dondon atindiakaa a Aôndo ken uma ve shi ve nôngo kpoghuloo u suen ayol a ve, er ve lu civir Aôndo yô! Solomon, tor u fankwagh yange nger ér: “Guda uhar a u môm.” Sha ci u nyi? “Sha ci u mba a injar i dedoo sha tom ve u sha ican [la]. Gadia aluer vea gba kpaa, u môm nana kôr ugen nan mough a nan sha.”—Orpasenkwagh 4:9, 10.

Adooga a sar u tsung je, u maan mlu wen u ken jijingi la, we vea or u ú vese la. Kpa isharen la tseegh yô, ia ume atam ga, vough er ken tom sule kpa isharen tseegh i wasen iyiav u umen atam ga nahan. Nenge ase mbamtaver uhar mba alaghga u tagher a mi ne, man er u er ve u hemba ve la kpaa.

MTAVER U HIIHII: Se mba a shighe ga. Kwaseya ugen u a er ivese ica i lu a gba yô, iti na ér Sue, a kaa ér: “Nomom ka a va tôôm sha ijiir i tom yam sha ahwa 7:00 aikighe. Ka sea za nyôron hen ya yô, ityom i eren hen ya, i keghen se a kegh. Ka i hingir er ishima yase ngi nôngon num a iyol yase nahan; gadia ishima ngi i ôron a vese ér gba u se tôô shighe sha u henen kwagh u Aôndo imôngo, kpa iyol yase di i vaan keela ér i soo u memen.”

Gbenda u a fatyô u sôron zayol ne yô: Kar nen igbenda kposo kposo shi eren nen kwagh ken mzough. Sue kaa ér: “Mo vea nomom yange se gema nderen faa, se nder se ôr avur a Bibilo imôngo shi se time sha a cii man se mase yaren tom ye. Shi yange a wasem u eren akaa agen sha er me zua a ian i lun imôngo vea na yô.” Ka mbamtsera mba nyi or nana zua a mi sha u nôngon kwagh ngeegh nahana? Ed, nom u Sue kaa ér: “M mase kaven mer mo vea Sue ka sea lamen sha akaa a ken jijingi hanma shighe yô, se hemba fan er se sôr mbamzeyol mba se tagher a mi la man er se nôngo a akaa a nyian se ishima kpaa yô.”

Er i doo u ne lamen ayol a en nahan, kwagh ugen u i gbe hange hange u ne eren yô, ka u tôôn miniti kpuaa hanma sev, eren msen imôngo. Kwagh ne una wase ne nena? Ryan, u a vôso kwase hegen i kom anyom 16 yô, kaa ér: “Semberee ne, mo vea kwase wam se lu a zayol ken ivese yase. Nahan kpa, se ver shighe u eren msen imôngo hanma tugh, pasen Aôndo akaa a a lu zan se iyol la. M nenge mer msen u yange se eren imôngo la,wase se u sôron mbamzeyol asev, nahan se hide se zua a msaanyol ken ivese yase.”

KAR KWAGH NE: Hanma iyange yô, tôô nen miniti kpuaa aikighe, lam nen sha akaa a doon a a er ne ken iyange la, a ne fatyô u sughun Aôndo sha mi yô. Shi lam nen sha mbamzeyol  mba ne tagher a mi sha iyange shon la, hemban je yô, mba i gbe u ne ker iwasen hen Aôndo sha er ne nôngo a mi la. Wa ikyo: Mayange je shighe ne a de hingir we shighe u pasen kwase wou shin nomou mbamshi nav ga. Er ma i lu nahan yô, zum u ne lu eren msen imôngo la, ter mbamzeyol mba i gbe u ne cii ne nôngo a mi la tseegh. Sev mbu a aven yô, nôngo nen u eren sha akaa a nyen ne er msen sha mi la.

MTAVER U SHA UHAR: Se mba kwagh môm ga. Tony kaa ér: “Mo m ngu or u m fetyô u teman ijiir i môm ôron takerada ga yô.” Kwase na, Natalie di kaa ér: “Takerada u ôron doom ishima, shi ka i doom u lamen sha akaa a m hen la kpaa. Ashighe agen ka i lum er ka sea lamen sha akaa a se lu henen ken Bibilo la yô, Tony a nenge ér mo m hemba fan a na, nahan ishima i za un iyol.”

Gbenda u a fatyô u sôron zayol ne yô: Sue nen ayol a en, de gbe nen a gba gesa shin puun nen ayol a en ga. Wasen kwase wou shin nomou sha akaa a a lu eren i lu doon la shi taver un ishima sha er una za hemen yô. Tony kaa ér: “Gbashima u kwase wam a lu a mi u lamen sha akaa a ken Bibilo la, ngu a tam mciem iyol ashighe agen; tsuaa la yô, i taver mo u lamen sha akaa a ken Bibilo vea na. Nahan kpa, Natalie wasem kpishi. Hegen ne, se mba lamen sha akaa a ken Bibilo imôngo hanma shighe cii, man m mase kaven mer ityôkyaa ngi i me cia ga. Ka i saan mo iyol u lamen sha akaa ne vea na kpen kpen. Kwagh ne wase se u hemban lun ayol a ase kundu kundu man ken bem kpaa.”

Noov man kasev kpishi nenge ér, ka vea ver shighe u ôron Bibilo shi henen i imôngo ken hanma kasua nahan, kwagh la a wase ivaa ve kpen kpen. Nahan kpa wa ikyo: Zum u ne ôr ma kwaghwan ken ivur ruamabera yô, pase gbenda u we iyol you u dondo kwaghwan shon la, i de lu gbenda u kwase wou shin nomou una dondo un la ga. (Mbagalatia 6:4) De lamen nen sha akaa a ken ivaa yen a aa va a anyiman shin ayôôso shighe u ne lu henen kwagh la ga, kpa i lu sha ian igen. Sha ci u nyi?

Nenge ase ikyav ne: Aluer u ngu yan kwaghyan vea tsombor wou nahan, ka hen shighe la u ôô or ivav i i lu hôôn human yee? U er nahan ga. U er yô, kwaghyan la una due ior ou cii ishima. Yesu yange kaa ér u henen kwagh u Aôndo shi eren ishima na la, ngu inja er ka u yan kwaghyan nahan. (Mateu 4:4; Yohane 4:34) Aluer hanma shighe u ne tem u henen Bibilo yô, u ngu lamen sha akaa a vihin we, a lun er ivav nahan la yô, kwaghhenen la una due ikyar u ishima. Ka mimi, gba u ne lamen sha mbamzeyol enev. Kpa er nen kwagh ne sha shighe u ne ver sha u lamen sha akaa a zan ne iyol la.—Anzaakaa 10:19; 15:23.

KAR KWAGH NE: Nger aeren ahar shin atar a kwase wou shin nomou a a hembe doon we ishima la shin takerada. Nahan aluer kwagen ne tema u timen sha akaa a ken Bibilo, man akaa a ne lu timen sha mi la zua sha aeren a nan shon yô, pase nan er aeren a nan la á doo u yô.

U Sunda Kwagh u U Lee La

Aluer we vea kwase wou ne lôô mlu u ken jijingi yô, ne va hingir u sundan bem man mbamtsera mbagenev ken ivaa yen. Jighilii yô, Mkaanem ma Aôndo na se ibumun ér “Kwagh u or nan lee yô, shi ka un je nana sunda ye.”—Mbagalatia 6:7.

Frederick man Leanne, mba se vande ôron kwagh ve ken mhii u ngeren ne la, nenge a mimi u kwagh u Bibilo i er ne. Ve vôso ayol a ve hegen ka anyom 45 je ne, man ve zua a mbamtsera kpishi sha u maan mlu ve u ken jijingi la. Frederick kaa ér: “Yange m shi gban kwase wam ijir mer soon u lamen a mo ga. Nahan kpa, shighe kar yô, m nenge mer gba u me seer nôngon.” Leanne di kaa ér: “Kwagh u yange wase se sha ashighe a se lu a mbamzeyol ken ivaa yase la yô, lu mdoo u Yehova Aôndo doo se ishima la. Ken anyom a se vese ayol a ase ne cii, se mba henen Bibilo hanma shighe shi se mba eren msen imôngo kpaa. Ka mea nenge Frederick una nôngon u seer lun a aeren a Orkristu nahan, kwagh na a hemba doon mo ishima cii.”

[Ngeren u shin kpe]

PINE IYOL YOU WER . . .

▪ Ka hanma shighe mo vea kwase wam shin orya wam se mase eren msen imôngoo?

▪ Ka nyi me er ve ishima ia taver kwase wam shin orya wam u seer lamen a mo gbar gbar sha akaa a ken Bibiloo?