Rot Bilong Famili i Ken Stap Amamas

Ol Marit, Kisim Pasin Bilong Tingim Ol Samting Bilong God

Frederick a: “Taim mipela i marit nupela, mi strong long mi na meri bilong mi i mas stadi wantaim long Baibel. Na mi strong long em i mas putim tingting olgeta i go long stadi. Tasol Leanne i no putim tingting olgeta long stadi. Na taim mi kamapim ol askim, em i save bekim yes o no tasol. Em i no bekim gut ol askim olsem mi ting em i mas mekim long taim bilong Baibel stadi.”

Leanne: “Mi gat 18 krismas taim mi maritim Frederick. Oltaim mitupela i stadi wantaim long Baibel, tasol long taim bilong stadi, Frederick i save kamapim ol pasin kranki bilong mi na ol samting mi mas mekim bilong kamap gutpela meri marit. Dispela i mekim na mi bel hevi stret!”

ORAIT, yu ting wanem hevi i stap insait long marit bilong Frederick na Leanne? Tingting na laik bilong tupela i gutpela. Tupela wantaim i save laikim tru God. Na tupela i lukim olsem ol i mas stadi wantaim long Baibel. Tasol dispela i no helpim ol. Maski tupela i stadi wantaim olsem marit, tupela i no kisim pasin bilong tingim ol samting bilong lotu.

Wanem ol samting bilong lotu? Bilong wanem ol marit i mas wok strong long kisim ol dispela samting? Wanem ol hatwok inap painim ol, na olsem wanem ol inap winim?

Tingim Ol Samting Bilong God

Dispela tok “ol samting bilong God” long Baibel i makim tingting o pasin man i bihainim long laip bilong em. (1 Korin 2:15) Pol, man bilong raitim Baibel, em i soim olsem man bilong tingim ol samting bilong God na man bilong tingim ol samting bilong skin, tingting bilong tupela i narapela narapela. I olsem ol man i gat tingting bilong dispela graun ol i save tingting long ol yet tasol, na ol i no tingting tumas long ol narapela man. Ol i save mekim ol samting i stret long ai bilong ol yet, na ol i no bihainim ol lo bilong God long i stap bilong ol.​—⁠1 Korin 2:14; Galesia 5:​19, 20.

Tasol ol man i save tingting long ol samting bilong God, ol lo bilong God i bikpela samting long ol. Ol i tingim God Jehova olsem Pren bilong ol na ol i wok strong long bihainim ol pasin bilong em. (Efesus 5:⁠1) Olsem na ol i save mekim pasin sori na gutpela pasin na pasin isi long ol man. (Kisim  Bek 34:⁠6) Na ol i save bihainim tok bilong God maski sampela taim i hatwok long mekim olsem. (Song 15:​1, 4) Darren husat i sindaun long Kanada, em i marit inap 35 yia, em i tok: “Tingting bilong mi i olsem, man bilong tingim ol samting bilong God, oltaim em i save tingting long ol tok na pasin bilong em bai helpim em olsem wanem long i stap pren bilong God.” Na meri bilong em, Jane i tok: “Mi ting olsem, meri bilong tingim ol samting bilong God i save wok strong long bihainim ol pasin em holi spirit bilong God i kamapim, na em i mekim dispela i kamap olsem pasin tru bilong em.”​—⁠Galesia 5:​22, 23.

Tasol i no olsem man o meri i mas marit pastaim na bai em i ken kisim pasin bilong tingim ol samting bilong God, nogat. Baibel i tok, olgeta man na meri wan wan i gat wok long kisim save long God na bihainim pasin bilong em.​—⁠Aposel 17:​26, 27.

Tupela Marit i Mas Tingim Ol Samting Bilong God

Bilong wanem tupela marit i mas wok wantaim long kisim pasin bilong tingim ol samting bilong God? Tingim dispela tok piksa: Tupela man i gat wanpela hap graun bilong wokim gaden na tupela i laik planim kaikai long en. Wanpela i makim stret wanpela mun bilong planim kaikai na narapela i laik planim kaikai sampela mun bihain. Wanpela i laik putim wanpela kain fetelaisa long graun, tasol narapela i no wanbel liklik​—⁠em i pilim olsem graun i no nidim fetelaisa. Wanpela i laik wok long gaden long olgeta de, tasol narapela i no laik wok, em i laik sindaun tasol na lukluk. Long kain taim olsem, gaden bai i no inap kamapim planti kaikai, tasol sapos tupela man i bin wok gut wantaim, gaden bai kamapim planti kaikai.

Man marit na meri bilong em i olsem dispela tupela man bilong wokim gaden. Sapos wanpela poroman tasol i kisim pasin bilong tingim ol samting bilong God, ating marit bilong tupela bai kamap gutpela liklik. (1 Pita 3:​1, 2) Tasol i gutpela moa sapos tupela wantaim i pasim tok long bihainim ol lo bilong God long i stap bilong ol na wok strong long helpim narapela narapela na mekim wok bilong God! King Solomon i tok: “Sapos tupela man i stap wantaim, em i gutpela.” Bilong wanem? Long wanem, wok bilong tupela bai kamap gutpela moa. “Sapos wanpela i pundaun, orait narapela i ken litimapim em gen.”​—⁠Saveman 4:​9, 10.

Ating yu laik tru bai yu na poroman marit bilong yu i kisim pasin bilong tingim ol samting bilong God. Tasol olsem wok bilong gaden, sapos yu gat laik tasol long mekim wanpela samting, dispela i no inap kamapim gutpela samting. Tingim tupela hevi inap painim yu na olsem wanem yu ken winim.

HEVI 1: Mipela i no gat taim. Sue, em i marit inap sotpela taim tasol, em i tok: “Man bilong mi i save kisim mi long ples wok long 7 klok nait. Taim mipela i kamap long haus, i gat planti wok bilong haus i stap na mipela i mas mekim. Mipela i gat laik long mekim wok, tasol mipela i save pilim taiet stret. Mipela i laik lusim haptaim long kisim sampela save moa long God, tasol bodi i taiet tru.”

Rot bilong stretim: Redi long senisim pasin na taim bilong mekim ol samting, na wok gut wantaim. Sue i tok: “Mi na man bilong mi i pasim tok olsem mitupela bai kirap long bikmoning na ritim na skelim wanpela hap bilong Baibel na bihain mipela i go long wok. Em i save helpim mi long ol wok bilong haus na bai mi gat haptaim bilong i stap na toktok wantaim em.” Wanem gutpela samting i kamap long dispela? Ed, em man bilong Sue, em i tok: “Mi lukim olsem taim mitupela Sue i toktok wantaim long ol samting bilong spirit long olgeta de, mipela inap stretim ol hevi bilong mipela na ol hevi i no daunim mipela.”

Tru, toktok wantaim i bikpela samting, tasol narapela bikpela samting moa, em yupela i mas lusim sampela minit long olgeta de long beten wantaim. Em inap helpim yutupela olsem wanem? Ryan, em i bin marit inap 16 yia pinis, em i tok: “I no longtaim i go pinis na sampela hevi i kamap namel long mi na meri bilong mi. Tasol mitupela i beten wantaim long olgeta nait na kamapim ol hevi bilong mipela long God. Mi pilim olsem pasin bilong beten wantaim i bin helpim mipela long stretim ol hevi na kisim amamas gen long marit bilong mipela.”

TRAIM MEKIM OLSEM: Makim sampela minit long olgeta de long toktok wantaim long ol gutpela samting i bin painim yutupela, olsem ol samting yupela inap tenkyu long God long en.  Na toktok long ol hevi bilong yupela, em ol hevi God i mas helpim yupela long karim o stretim. Tasol was gut: Yu no ken ting em i gutpela rot bilong kamapim ol popaia na pasin kranki bilong poroman bilong yu. Taim yupela i beten wantaim, toktok tasol long ol hevi em yutupela wantaim i mas wok long stretim. Orait long de bihain, mekim ol samting i stret wantaim beten bilong yupela.

HEVI 2: Mitupela i gat narapela narapela save bilong mekim wok. Tony i tok: “Mi no man bilong sindaun na ritim buk.” Meri bilong em Natalie, i tok: “Mi save laikim tumas long ritim buk, na mi laik toktok long ol samting mi bin lainim. Sampela taim mi ting Tony i sem o pret liklik long mi taim mitupela i stadi na toktok long ol tok bilong Baibel.”

Rot bilong stretim: Helpim poroman, no ken resis long winim em o mekim olsem yu kotim em. Tok amamas long ol gutpela pasin bilong em na strongim bel bilong em long mekim yet gutpela pasin. Tony i tok: “Meri bilong mi i save amamas long toktok long Baibel na sampela taim em i save abrusim mak, na dispela i mekim mi surik long toktok wantaim em long Baibel. Tasol Natalie i save helpim mi gut na strongim bel bilong mi. Nau mitupela i save toktok wantaim long ol samting bilong God, na mi save pinis olsem i no gat as na mi pret long mekim olsem. Mi amamas long toktok wantaim em long ol dispela samting. Em i bin helpim mitupela long i stap bel isi wantaim.”

Planti marit i lukim olsem marit bilong ol i kamap gutpela moa taim ol i makim haptaim long olgeta wik long ritim na stadi wantaim long Baibel. Tasol tingim dispela: Taim yu ritim sampela tok kaunsel long Baibel, tingting long olsem wanem yu yet i ken bihainim​—⁠i no poroman bilong yu. (Galesia 6:⁠4) Makim narapela taim bilong toktok long ol hevi bilong marit i kamap namel long yupela, na no ken mekim long taim bilong stadi. Bilong wanem?

Tingim dispela: Sapos yu kaikai wantaim famili bilong yu, yu ting bai yu makim dispela taim bilong pasim wanpela sua i gat susu long en? Nogat, a? Bai famili i no gat laik moa long kaikai. Jisas i soim olsem pasin bilong kisim save long God na mekim laik bilong em i kain olsem yumi kisim kaikai. (Matyu 4:4; Jon 4:34) Sapos oltaim yu save kamapim bel hevi bilong yu long taim yupela i opim Baibel, ating dispela bai mekim na poroman bilong yu i no gat laik moa long stori long ol samting bilong God. Em tru olsem yupela i mas toktok long ol hevi bilong yutupela, tasol makim wanpela taim stret bilong mekim olsem.​—⁠Sindaun 10:19; 15:⁠23.

TRAIM MEKIM OLSEM: Raitim 2-pela o 3-pela pasin bilong poroman bilong yu em yu laikim tru. Taim yupela i stadi long ol tok bilong Baibel i stori long ol dispela pasin, tokim poroman olsem yu amamas tru long em i save kamapim ol dispela pasin.

Samting Yu Planim, Em Tasol Bai Yu Kamautim

Sapos yu na poroman marit bilong yu i wok strong long kisim pasin bilong tingim ol samting bilong spirit, yupela bai i stap bel isi na amamas long marit bilong yupela. Tok bilong Baibel em i tru, “samting man i planim, dispela samting tasol em bai kamautim.”​—⁠Galesia 6:⁠7.

Frederick na Leanne, em mipela i kamapim tok bilong ol long kirap bilong dispela stori, ol i kisim save pinis olsem dispela stiatok bilong Baibel i tru. Nau tupela i marit inap 45 yia na ol i save olsem pasin bilong wok strong long kisim save long God i bin helpim tru marit bilong ol. Frederick i tok: “Bipo mi save tok, em asua bilong meri bilong mi na mipela i no save toktok gut wantaim. Tasol bihain mi luksave olsem mi yet i mas wok strong tu long stretim dispela hevi.” Leanne i tok: “Samting i bin helpim tru mipela long dispela taim bilong hevi, em pasin bilong mitupela wantaim long laikim tru God Jehova. Insait long ol dispela yia, oltaim mipela i stadi na beten wantaim. Mi lukim Frederick i wok strong long mekim ol pasin Kristen bilong em i kamap gutpela moa, na dispela i mekim na mi laikim em tru.”

[Futnot]

ASKIM YU YET . . .

▪ Wanem laspela taim mi na poroman marit bilong mi i beten wantaim?

▪ Mi ken mekim wanem na bai poroman marit bilong mi i gat laik long toktok wantaim mi long ol samting bilong God?