Nong Pwony Ki I Lok Pa Lubanga

Lubo Cik pa Lubanga Keliwa Adwogi Mabeco Nining?

Pwony man nyamo lapeny mogo ma gwok nyo ibedo ka penye kwede dok bene nyutti ka ma itwero kwano iye lagamme ki i Baibulli. Lucaden pa Jehovah cwinygi bibedo yom me nyamo lagam pi lapeny magi kwedi.

1. Pingo omyero walub Cik pa Lubanga?

Lubo Cik pa Lubanga tye gin maber, pien Lubanga aye ocweyowa. Kadi wa Yecu bene olubo Cik pa Lubanga i kare ducu. (Jon 6:38; Niyabo 4:11) Cik pa Lubanga miniwa yo ma myero wanyut kwede ni wamaro Lubanga.​—Kwan 1 Jon 5:3.

Cik ducu ma Lubanga ominiwa gibeco piwa. Ginyutiwa yo maber loyo me kwo i kare-ni ki dong kit ma myero wanong kwede kwo ma pe tum i anyim.​—Kwan Jabuli 19:7, 11; Icaya 48:17, 18.

2. Cik pa Lubanga konyowa me bedo ma komwa yot nining?

Cik madok i kom mero ki kongo gwokowa dok gengo nongo two maraco ki dong awano mapol. Mato kongo wa i labyel kweri tye gin ma jukone tek dok weko dano dongo kit mogo me mingo. (Carolok 23:20, 29, 30) Jehovah pe gengowa mato kongo ento ye ni wamat mupore ento pe me mero.​—Kwan Jabuli 104:15; 1 Jo Korint 6:10.

Jehovah bene ocikowa i lok kom nyeko, kiniga ma pe jukke, ki dong kit mogo ma balo kwo pa dano. Ka wamedde ki lubo tam pa Lubanga, ci komwa bedo yot.​—Kwan Carolok 14:30; 22:24, 25.

3. Cik pa Lubanga twero gwokowa nining?

Cik pa Lubanga ye buto i kin laco gin ki dakone ma gunyomme kwede keken. (Jo Ibru 13:4) Luot ma gunyomme dok gilubo cik man ginongo kwo mit kun bene giweko kwo bedo yot bot lutinogi. Kitungcel bene, tim me abor pol kare kelo two, ket keny, gero i ot, cwercwiny, ki dong gangi ma nongo lanyodone tye acel keken iye.​—Kwan Carolok 5:1-9.

Ka ce wagwokke ki i kabedo mogo ma keliwa atematema me tim buto ki ngat ma pe wanyomme kwede ci wagwoko wat i kinwa ki Lubanga. Gengowa bene cwero cwiny jo mukene.​—Kwan 1 Jo Tecalonika 4:3-6.

  4. Nyuto woro i kom kwo keliwa adwogi maber nining?

Jo ma ginyuto ni giworo kwo ma Lubanga omiyo ginongo adwogi mabeco ma keligi yotkom inge weko tim calo mato taagi-ni ma keto kwo ka mading dok wekone pe yot. (2 Jo Korint 7:1) Lubanga neno wakwo pa latin ma i ic ni gin ma pire tek. (Nia 21:22, 23) Pi meno, omyero pe waye tim me ooyo ic akaka. Dok bene jo ma gipwoyo kit ma Lubanga neno kwede kwo, gigwokke i ka tic, i paco ki dong ka giwoto ki mutoka. (Nwoyo Cik 22:8) Medo i kom meno, pe giketo kwogi ka mading pi lok me tuko pien kwo tye mic mua ki bot Lubanga.​—Kwan Jabuli 36:9.

5. Kit ma remo tye gin maleng-ngi twero konyowa nining?

Remo tye gin maleng pien Lubanga owaco ni kwo pa gin ducu tye i remo. (Acakki 9:3, 4) Cik pa Lubanga ma nyutiwa ni kwo pire tek rom aroma ki remo-ni konyowa. I yo ango? Man aye gin mumiyo weko balwa twere.​—Kwan Lulevi 17:11-13; Jo Ibru 9:22.

Tutwalle dong remo pa Yecu pire tek ma pe wacce pien en onongo pe ki roc. Yecu otero bot Lubanga gin mo ma cung pi kwone ma en aye remone. (Jo Ibru 9:12) Watwero nongo kwo ma pe tum pi remo pa Yecu ma en oonyo.​—Kwan Matayo 26:28; Jon 3:16.

Pi ngec mukene, nen dul me 12 ki 13 i buk, Baibul Mono Ada Pwonyo Gin Ango? man ma Lucaden pa Jehovah aye gucoyo.