Me Sauma na iVolatabu

E Yaga Vakacava Vei Keda na Lawa ni Kalou?

Ena veivosakitaki ena ulutaga qo eso na taro o rairai dau lomatarotarotaka tu, o na raica tale ga na tikinivolatabu mo wilika kina na kena isau. Era marau na iVakadinadina i Jiova mera veivosakitaka kei kemuni na kena isau.

1. Na cava meda talairawarawa kina vua na Kalou?

E dodonu meda talairawarawa vua ni o koya ga a buli keda. O Jisu mada ga e dau talairawarawa vua na Kalou. (Joni 6:38; Vakatakila 4:11) Nida muria na nona lawa eda sa vakaraitaka tiko nida lomani koya.—Wilika 1 Joni 5:3.

Na lawa kece ni Kalou e yaga vei keda. E dusimaki keda ena ka meda cakava me vinaka kina noda bula nikua kei na sala meda vakalougatataki tawamudu kina ena veigauna se bera mai.—Wilika Same 19:7, 11; Aisea 48:17, 18.

2. E yaga vakacava ena noda bula na lawa ni Kalou?

Na lawa ni Kalou me baleta na mateni e taqomaki keda mai na mate e rawa ni veivakaleqai kei na vakacalaka. E veivakabobulataki na gunusivia, e rawa tale ga ni caka kina na ka lialia. (Vosa Vakaibalebale 23:20, 29, 30) E vakadonuya o Jiova meda gunu, ia e vakasalataki keda me vakarauta ga.—Wilika Same 104:15; 1 Korinica 6:10.

E vakasalataki keda tale ga o Jiova meda lewa vinaka na noda cudru, meda kua ni dau vuvu se cakava na veika e rawa ni vakaleqai keda. Ena yaga ena noda bula na noda muria na nona ivakasala.—Wilika Vosa Vakaibalebale 14:30; 22:24, 25.

3. E itataqomaki vakacava vei keda na lawa ni Kalou?

E vakatabuya na lawa ni Kalou na veibutakoci. (Iperiu 13:4) Ena dei na vakawati ke rau muria na veiwatini na lawa qori, era na marautaka tale ga na gone na bula e vale. Ia na veibutakoci e dau yaco kina na ivalavala kaukaua, lomabibi, veisere, rawa ni veitauvi kina na mate ca ni veiyacovi, ra qai susugi na gone ena vuvale itubutubu le dua.—Wilika Vosa Vakaibalebale 5:1-9.

Ke da cata na veika eda rawa ni temaki kina meda veibutakoci, ena dei na noda veiwekani kei na Kalou, eda na sega tale ga ni vakararawataki ira eso tale ena ka eda cakava.—Wilika 1 Cesalonaika 4:3-6.

 4. E yaga vakacava na noda doka na bula?

Na bula e isolisoli ni Kalou, o ira era doka qori era bulabula vinaka nira muduka na vakatavako kei na veika tale eso era bobula kina e rawa ni vakaleqa nodra bula. (2 Korinica 7:1) E talei sara mada ga vua na Kalou na bula ni gone se kunekunetaki tiko. (Lako Yani 21:22, 23) Me kua gona ni nakiti na nona vakamatei na gone se bera ni sucu. O ira era doka na rai ni Kalou me baleta na bula era na qaqarauni e vanua ni cakacaka vaka kina e vale, nira vodo motoka tale ga. (Vakarua 22:8) Era na sega tale ga ni vakaitavi ena qito ena vakaleqa na nodra bula, ni isolisoli ni Kalou na bula.—Wilika Same 36:9.

5. E yaga vakacava na noda doka na dra?

E tukuna na Kalou ni ka tabu na dra ni vakatakarakarataka na bula ni tamata se manumanu. (Vakatekivu 9:3, 4) Ena lawa ni Kalou e tautauvata na talei ni bula kei na dra. Ena yaga vei keda na lawa qori ni rawa ni vosoti kina noda ivalavala ca.—Wilika Vunau ni Soro 17:11-13; Iperiu 9:22.

Ni uasivi o Jisu e talei kina na nona dra. A cabora vua na Kalou e dua na ka e vakatakarakarataka na nona bula—na nona dra. (Iperiu 9:12) Na dra vakadavei i Jisu e rawa kina nida bula tawamudu.—Wilika Maciu 26:28; Joni 3:16.

Me ikuri ni ivakamacala, raica na wase 12 kei na 13 ni ivola Na Cava Sara Mada e Kaya na iVolatabu, tabaka na iVakadinadina i Jiova.