Kukwe Ngöbökwe tä driere

Ngöbökwe kukwe kwin ükaninte

Kukwe ruäre mätä ngwentari jai ye mikata gare Biblia mäkwe yebätä. Mä törba angwane nitre testiko Jehovakwe raba kukwe ye mike gare mäi.

1. ¿Ñobätä nikwe Ngöbö mikadre täte?

Ngöbökwe ni sribebare ye medenbätä ni rabadre niara kukwei mike täte. Jesukwe käre niara kukwei mikani täte (Juan 6:38; Revelación [Apocalipsis] 4:11). Ngöbökwe kukwe ükaninte ye mikadre täte angwane nita bämike niara tare nikwe. (Mäkwe ñäkä 1 Juan 5:3 yebätä.)

Kukwe ükaninte kwe ye jökrä kwin ni kräke. Nikwe nünandre ño kä nengwane bätä jondron kwin raba nemen ño nikwe kä ja känenkäre yete ye tä mike gare nie. (Mäkwe ñäkä Salmo 19:7, 11 bätä Isaías 48:17, 18 yebätä.)

2. ¿Ngöbökwe kukwe ükaninte ye kwin ja kriemikakäre?

Kukwe tare tä nemen bare dröbanikata yebätä aune bren tare tä nemen nibätä, ye medenbätä Ngöbökwe kukwe ükaninte ni kriemikakäre. Dö ñata krubäte ye tä ni töi mike dö ye aibe ñain aune ni töi mike ngwarbe kukwe mada nuainne (Proverbios 23:20, 29, 30). Jehovata niere ni ñaka raba dö ñain krubäte dröbanikakäre. (Mäkwe ñäkä Salmo 104:15 bätä 1 Corintios 6:10 yebätä.)

Arato, Ngöböta kukwe niere ne kwe ni ñaka rabadre jondron ni madakwe yebätä ja töi mike, ja mike rubun aune kukwe mada mada käme nuainne. Nita kukwe ye mike täte angwane ye köböire nikwe ja kriemikai. (Mäkwe ñäkä Proverbios 14:30 bätä 22:24, 25 yebätä.)

3. ¿Ni nemen jabe yebätä Ngöbökwe kukwe ükaninte ye tä ni kriemike ño?

Ni ñaka gure metre tä nemen jabe ye ñäkäita kukwe Ngöbökwe yebätä (Hebreos 13:4). Nitre gure metre tä kukwe ne mike täte ye köböire tätre tö ngwen jai kwärikwäri bätä tätre monsotre kwe ngübare kwin. Nitre gure metre akwa tä nemen ni madabe yebätä bren tä neketekä, tätre ja tuenmetre, raba ni mada nuainne tare, töi ñan tä jäme bätä itibe tä nemen monso ngübare kaibe. (Mäkwe ñäkä Proverbios 5:1-9 yebätä.)

Kukwe ükaninte Ngöbökwe ye nita mike täte ye ngwane ja mäkädi käre ben. Arato, kukwe ye ni dimikai ñaka ñäke tare ni madai. (Mäkwe ñäkä 1 Tesalonicenses 4:3-6 yebätä.)

  4. ¿Ja nire mikata ütiäte ye köböire dre kwin tä nemen nikwe?

Nitre tä ja nire mike ütiäte ye ñaka sö duen o jondron mada käme abokän tä kukwe tare mike nemen barebätä ye nuainne (2 Corintios 7:1). Ja nire nikwe ye ütiäte Ngöbö kräke, monso tä meyebätä jämi därere ye ütiäte kräke arato (Éxodo 21:22, 23). Aisete, monso jämi därere ye ñaka murie ketadre. Ne madakäre, sribikänti, ja gwirete o karo nikwe ye jökrä nikwe ükadrete kwin bämikakäre ja nire nikwe ye nita mike tuin ütiäte Ngöbö ye erere (Deuteronomio 22:8). Jadaka känti ni mada nuainta tare ye ni ñaka nuainne, ñobätä ñan aune Ngöbökwe ja nire biani nie ye nüke gare kwin nie (Mäkwe ñäkä Salmo 36:9 yebätä.)

5. ¿Däri mikadre tuin deme jai ye köböire dre kwin tä nemen nikwe?

Ngöböta niere ni därie yebiti nita nire, ye medenbätä ni däri ye deme (Génesis 9:3, 4). Ngöbökwe kukwe ükaninte yebiti tä mike gare däri ye ütiäte ja nire ye erere. ¿Ñobätä? Ñobätä ñan aune Ngöbökwe kukwe ükaninte ye köböire ngite juanta ta nibiti. (Mäkwe ñäkä Levítico 17:11-13 bätä Hebreos 9:22 yebätä.)

Jesús därie ñaka ja mikani ngite ye medenbätä niara därie namani bäri ütiäte. Ja nire biani kwe ni jökrä ütiäre, ye bitikäre ja därie biani kwe Ngöböi, ye abokän ja nire ütiäte biani kwe (Hebreos 9:12). Niarakwe ja därie ianinte ye köböire ja nire käre ye raba nemen nikwe. (Mäkwe ñäkä Mateo 26:28 bätä Juan 3:16 yebätä.)

Mä törba kukwe mikai gare bäri jai angwane mäkwe ñäkä kapitulo 12 bätä 13 tärä ¿Dre drieta erametre Bibliakwe? yebätä.