Dirava Ena Hereva Amo Diba Abia

Inai atikol ese reana emu henanadai haida ia hahedinaraia bona edia haere be Baibel lalonai oi davaria diba. Iehova ena Witnes taudia be mai moale ida oi do idia durua haere oi diba totona.

1. Dahaka dainai Dirava ita kamonai henia?

Dirava ese ita ia havaraia dainai Ia ita kamonai henia be maoro. Iesu danu be hanaihanai Dirava ia kamonai henia. (Ioane 6:​38; Apokalupo 4:​11) Dirava ena taravatu ita badinaia amo ita hamomokania ia ita lalokau henia.​—⁠1 Ioane 5:3 duahia.

Iehova ena taravatu ibounai be iseda namo totona. Idia ese hari mauri dalana namona ita dekenai idia hadibaia, bona vaira negai mauri hanaihanai abia dalana idia hahedinaraia.​​—⁠Salamo 19:​7, 11; Isaia 48:​17, 18 duahia.

2. Edena dala ai Dirava ena taravatu ese eda helt ia durua?

Dirava ena taravatu kekero karana dekenai ese ita ia gimaia, mase ia havaraia gorere bona aksiden ita davaria lasi totona. Kekero karana ese ta ia biagua bona kara dikadia ia karaia diba. (Aonega Herevadia 23:​20, 29, 30) Iehova ese alkahol inua karana ia koua lasi, to Ia ura dala maorona ai ita gaukaralaia.​​—⁠Salamo 104:15; 1 Korinto 6:​10 duahia.

Danu Iehova ese mama, badu bona unai bamona karadia ma haida dekenai ita ia sisiba henia. Iena sisiba ita badinaia neganai, eda helt do ia namo.​​—⁠Aonega Herevadia 14:30; 22:​24, 25 duahia.

3. Edena dala ai Dirava ena taravatu ese ita ia gimaia diba?

Dirava ese matabodaga karadia ia taravatua. (Heberu 13:⁠4) Unai taravatu idia badinaia headava taudia edia noho ia namo bona natudia idia moale. To, unai taravatu idia badinaia lasi taudia ese idia davaria hekwakwanai be inai: Gorere, headava ia doko, lalometau, bona ruma bese lalonai tama o sina sibona ia noho.​​—⁠Aonega Herevadia 5:​1-9 duahia.

Matabodaga karadia edia hedibagani ita dadaraia neganai, eda hetura karana Iehova ida ita gimaia diba, bona ma haida ita hahisia lasi.​​—⁠1 Tesalonika 4:​3-6 duahia.

 4. Edena dala ai mauri matauraia karana ese ita ia durua?

Dirava ena harihari gauna, mauri, idia matauraia taudia be kuku ania karana bona mauri hadikaia gaudia ma haida idia dadaraia neganai, edia helt ia namo. (2 Korinto 7:⁠1) Dirava ese sinana ena bogana lalonai ia tubu beibi ena mauri ia laloa bada. (Esodo 21:​22, 23) Unai dainai bogana lalonai ia noho beibi ita hamasea lasi. Danu, Dirava ena lalohadai mauri dekenai idia laloa bada taudia be gaukara gabunai, ruma, bona motuka ai, seifti karana idia laloa bada. (Deuteronomi 22:⁠8) Ma danu, edia mauri ia hadikaia diba spot gadara lalonai idia vareai lasi, badina mauri be Dirava ena harihari gauna.​​—⁠Salamo 36:9 duahia.

5. Rara be helaga bona edena dala ai ita ia durua?

Rara be helaga badina Dirava ia gwau rara ese taunimanima bona animal edia mauri ia laulaulaia. (Genese 9:​3, 4) Dirava ena taravatu ese ita ia durua. Edena dala ai? Dala ia kehoa Dirava ese eda dika ia gwauatao totona.​​—⁠Levitiko 17:​11-​13; Heberu 9:​22 duahia.

Iesu ena rara be dava bada gauna badina ia be goevadae tauna. Iesu ese iena rara​—⁠mauri​—⁠be Dirava dekenai ia henia. (Heberu 9:​12) Iena rara ese dala ia kehoa mauri hanaihanai ita abia totona.​​—⁠Mataio 26:28; Ioane 3:​16 duahia.

Diba ma haida abia totona, inai buka ena karoa 12 bona 13 itaia, Iehova ena Witnes taudia ese idia karaia. Baibel be Dahaka ia Hadibaia?