Mụta Ihe N’okwu Chineke

Olee Otú Iwu Chineke Si Abara Anyị Uru?

Isiokwu a jụrụ ajụjụ ndị o nwere ike ịbụ na ị jụọla, ọ ga-egosikwa gị ebe ndị i nwere ike ịgụ na Baịbụl gị ga-aza gị ajụjụ ndị ahụ. Obi ga-adị Ndịàmà Jehova ụtọ ịkọwara gị azịza ha.

1. Olee ihe mere anyị ji kwesị irubere Chineke isi?

Anyị kwesịrị irubere Chineke isi n’ihi na ọ bụ ya kere anyị. Jizọs na-erubedịrị Chineke isi mgbe niile. (Jọn 6:38; Mkpughe 4:11) Otú anyị ga-esi gosi na anyị hụrụ Chineke n’anya bụ idebe iwu ya.—Gụọ 1 Jọn 5:3.

Iwu niile Jehova Chineke nyere anyị bụ maka ọdịmma anyị. Ha na-akụziri anyị otú kacha mma anyị ga-esi na-ebi ndụ ugbu a, nakwa ihe anyị ga-eme ka anyị wee nweta ngọzi Chineke n’ọdịnihu.—Gụọ Abụ Ọma 19:7, 11; Aịzaya 48:17, 18.

2. Olee otú iwu Chineke si enyere anyị aka inwe ezigbo ahụ́ ike?

Chineke nyere iwu ka anyị ghara ịṅụbiga mmadụ ókè. Ọ bụrụ na anyị edebe iwu a, anyị agaghị arịa ọrịa ọjọọ ma ọ bụ nwee ihe mberede ndị ịṅụ oké mmanya na-akpata. Ịṅụ oké mmanya na-eri mmadụ ahụ́, ọ na-emekwa ka mmadụ mewe omume ọjọọ. (Ilu 23:20, 29, 30) Jehova kwuru na anyị nwere ike ịṅụ mmanya, ma ọ chọghị ka anyị na-aṅụbiga ya ókè.—Gụọ Abụ Ọma 104:15; 1 Ndị Kọrịnt 6:10.

Jehova dọkwara anyị aka ná ntị ka anyị ghara ịna-ekwo ekworo, ịna-ewe iwe ọkụ, ma ọ bụ ịna-akpa àgwà ọjọọ ndị ọzọ bụ́ ndị nwere ike inye anyị nsogbu n’ahụ́. Ọ bụrụ na anyị ejisie ike na-eme ihe Chineke kwuru, ahụ́ ga-esi anyị ike.—Gụọ Ilu 14:30; 22:24, 25.

3. Olee otú iwu Chineke si echebe anyị?

Iwu Chineke kwuru na mmadụ na onye na-abụghị di ya ma ọ bụ nwunye ya inwe mmekọahụ bụ ihe ọjọọ. (Ndị Hibru 13:4) Di na nwunye ndị na-erube isi n’iwu a na-aka ebi n’udo, ha ga-enwekwa ike ịzụ ụmụ ha n’ezinụlọ ebe obi ga-eru ụmụ ha ala. Ma, ọ bụrụ na di ma ọ bụ nwunye akwaa iko, o nwere ike ịkpatara ha obi mgbawa, ịlụ ọgụ, ọrịa, mee ka ha gbaa alụkwaghịm, ma ọ bụdị mee ka ọ bụrụ otu onye ga-azụwazi ụmụ ha.—Gụọ Ilu 5:1-9.

Ọ bụrụ na anyị ana-ezere ihe ndị nwere ike ime ka anyị kwaa iko, anyị na Chineke ga na-adị ná mma, anyị agaghịkwa emejọ ndị ọzọ.—Gụọ 1 Ndị Tesalonaịka 4:3-6.

  4. Olee otú iji ndụ akpọrọ ihe si abara anyị uru?

Ọ bụrụ na onye na-aṅụ sịga ma ọ bụ onye àgwà ọjọọ ọ bụla ọzọ riri ahụ́ abịa ghọta na ya kwesịrị iji ndụ Chineke nyere ya kpọrọ ihe ma kwụsịkwa àgwà ọjọọ ahụ, ahụ́ ga-ebido dịwa ya mma. (2 Ndị Kọrịnt 7:1) Chineke jidị ndụ nwa e bu n’afọ kpọrọ ihe. (Ọpụpụ 21:22, 23) N’ihi ya, anyị ekwesịghị ịkpachara anya gbuo nwa e bu n’afọ. Ndị ji ndụ Chineke nyere anyị kpọrọ ihe na-akpachapụkwa anya mgbe ha na-arụ ọrụ, mgbe ha nọ n’ụlọ, nakwa mgbe ha na-anya ụgbọala, ka ha ghara imerụ onwe ha ma ọ bụ ndị ọzọ ahụ́. (Diuterọnọmi 22:8) Ha anaghịkwa eme egwuregwu ndị nwere ike imerụ ha ahụ́, ma ọ bụ gbuo ha, n’ihi na ha maara na ndụ bụ onyinye si n’aka Chineke.—Gụọ Abụ Ọma 36:9.

5. Olee otú ihe Chineke kwuru banyere ọbara si abara anyị uru?

Ọbara dị nsọ n’ihi na Chineke kwuru na ọ bụ ndụ, ma ọ bụ mkpụrụ obi, nke ihe e kere eke. (Jenesis 9:3, 4) Iwu Chineke, bụ́ nke kwuru na ọbara na ndụ bụ otu ihe, na-abara anyị uru. Olee otú o si abara anyị uru? Ọ bụ n’iwu ahụ ka Chineke gbakwasịrị ụkwụ na-agbaghara anyị mmehie anyị.—Gụọ Levitikọs 17:11-13; Ndị Hibru 9:22.

Ọbara Jizọs bụ ọbara kacha oké ọnụ ahịa n’ihi na Jizọs zuru okè. Mgbe Jizọs chụchara ndụ ya n’àjà maka ụmụ mmadụ, ọ gara gosi Chineke uru nke ọbara ya, bụ́ nke nọchiri anya ndụ ya. (Ndị Hibru 9:12) Ọ bụ ọbara ya mere anyị ji nwee olileanya ịdị ndụ ebighị ebi.—Gụọ Matiu 26:28; Jọn 3:16.

Ọ bụrụ na ị chọrọ ịmatakwu banyere ihe a kọrọ n’isiokwu a, gụọ Gịnị n’Ezie Ka Bible Na-akụzi? isi nke 12 na nke 13 nke akwụkwọ a Ndịàmà Jehova bipụtara.