Agsursuroka iti Sao ti Dios

Kasano a Magunggonaantayo Kadagiti Linteg ti Dios?

Idatag daytoy nga artikulo dagiti saludsod a nalabit nayimtuodmon. Ipakitana met ti pakabasaam kadagiti sungbat iti Bibliam. Maragsakan dagiti Saksi ni Jehova a mangilawlawag kenka kadagiti sungbat.

1. Apay a masapul nga agtulnogtayo iti Dios?

Umiso laeng nga agtulnogtayo iti Dios ta isu ti nangparsua kadatayo. Uray ni Jesus, kanayon a nagtulnog iti Dios. (Juan 6:38; Apocalipsis 4:11) Ipakpakitatayo nga ay-ayatentayo ti Dios no agtulnogtayo kadagiti lintegna.​—Basaem ti 1 Juan 5:3.

Pagsayaatantayo ti amin a linteg ni Jehova a Dios. Masursurotayo ti kasayaatan a wagas ti panagbiag ita ken no kasano a magun-odtayo dagiti agnanayon a bendision iti masanguanan.​—Basaem ti Salmo 19:7, 11; Isaias 48:17, 18.

2. Kasano a makagunggona iti salun-attayo dagiti linteg ti Dios?

No tungpalentayo ti linteg ti Dios a mangiparit iti panagbartek, maliklikantayo dagiti aksidente ken makapapatay a sakit. Makaadikto ti sobra a panaginum ken mangituggod iti minamaag nga ar-aramid. (Proverbio 23:20, 29, 30) Ipalubos ni Jehova ti natimbeng a panaginum iti arak.​—Basaem ti Salmo 104:15; 1 Corinto 6:10.

Ballaagannatayo met ni Jehova a liklikantayo ti di umiso a panagimon, di mapengdan a panagpungtot, ken dadduma pay a makadangran a kababalin. No iyaplikartayo dagiti balakadna, makagunggona dayta iti salun-attayo.​—Basaem ti Proverbio 14:30; 22:24, 25.

3. Kasano a masalaknibannatayo ti linteg ti Dios?

Iparit ti linteg ti Dios ti panagdenna dagiti di agassawa. (Hebreo 13:4) No tungpalen dagiti agassawa daytoy a linteg, nataltalged ken nataltalna ti aglawlaw para kadagiti annakda. Kasta met, ti pannakidenna iti di asawa ket masansan a mangibunga iti sakit, diborsio, kinaranggas, nasaem a rikna, ken nasinasina a pamilia.​—Basaem ti Proverbio 5:1-9.

No liklikantayo dagiti kasasaad a mangituggod iti pannakikamalala, masalakniban ti relasiontayo iti Dios ken saantay met a madangran ti sabsabali.​—Basaem ti 1 Tesalonica 4:3-6.

  4. Kasano a magunggonaantayo iti panangraemtayo iti biag?

Sumayaat ti salun-at dagidiay mangraraem iti insagut ti Dios a biag no isardengda dagiti bisio a kas iti panagsigarilio ken dadduma pay a pannakaadikto a mamagpeggad iti biag. (2 Corinto 7:1) Napateg iti Dios uray ti biag ti mayin-inaw a maladaga. (Exodo 21:22, 23) Isu a ditay koma igagara a patayen ti di pay nayanak nga ubing. Dagidiay mangraraem iti panangmatmat ti Dios iti biag agan-annadda iti trabaho, pagtaengan, ken iti panagmanehoda. (Deuteronomio 22:8) Saanda met nga isagmak ti biagda iti isports gapu ta ti biag ket sagut ti Dios.​—Basaem ti Salmo 36:9.

5. Apay a makagunggona kadatayo ti kinasagrado ti dara?

Sagrado ti dara ta kinuna ti Dios a dayta ti mangirepresentar iti biag, wenno kararua, ti maysa a parsua. (Genesis 9:3, 4) Makagunggona kadatayo ti linteg ti Dios a mamagpada iti pateg ti dara ken ti biag. Kasano? Maibatay iti dayta a linteg, pinagbalin ti Dios a posible ti pannakapakawan dagiti basoltayo.​—Basaem ti Levitico 17:11-13; Hebreo 9:22.

Yantangay perpekto ti biag ni Jesus, nakapatpateg la ketdi ti darana. Indatagna iti Dios ti pateg ti darana​—a mangirepresentar iti biagna. (Hebreo 9:12) Posible a maaddaantayo iti biag nga agnanayon gapu iti naiparukpok a darana.​—Basaem ti Mateo 26:28; Juan 3:16.

Para iti ad-adu nga impormasion, kitaem ti kapitulo 12 ken 13 daytoy a libro, Ania a Talaga ti Isursuro ti Biblia?, nga impablaak dagiti Saksi ni Jehova.