Longuka na Ndinga ya Nzambi

Inki Mutindu Bansiku ya Nzambi Kenatilaka Beto Mambote?

Disolo yai kebasisaka bangyufula yina ziku nge mekudiyulaka mpi yo kemonisaka kisika nge lenda baka bamvutu na Biblia na nge. Bambangi ya Yehowa tasepela na kusolula ti nge na yina metala bangyufula yango.

1. Sambu na nki beto fwete lemfukila Nzambi?

Yo mefwana nde beto lemfukila Nzambi sambu yandi megangaka beto. Yezu mpi vandaka kulemfukila Nzambi ntangu yonso. (Yoane 6:38; Kusonga 4:11) Bansiku ya Nzambi kepesaka beto nzila ya kumonisa nde beto kezolaka yandi.​—Tanga 1 Yoane 5:3.

Bansiku yonso ya Yehowa kevandaka sambu na mambote na beto. Yo kelongaka beto mutindu ya kuzinga mbote bubu yai mpi mutindu beto lenda baka mambote ya kimakulu na makwisa.​—Tanga Nkunga 19:8, 12; Yezaya 48:17, 18.

2. Inki mutindu bansiku ya Nzambi kenatilaka beto mambote na nitu?

Nsiku ya Nzambi ya kebuyisaka kulauka malafu ketaninaka beto na bamaladi yina kefwaka bantu mpi na bisumbula. Kulutisa ndilu na kunwa malafu kele mbi mpi yo kepusaka muntu na kusala mambu ya mbi. (Bingana 23:20, 29, 30) Yehowa kepesaka beto nzila ya kunwa malafu kansi beto fwete vanda ti bukati-kati.​—Tanga Nkunga 104:15; 1 Korinto 6:10.

Yehowa kekebisaka beto mpi na yina metala kimpala, makasi ya mingi, mpi bifu yankaka. Kana beto kesadila ndongisila na yandi, beto tavanda ti mavimpi ya mbote.​—Tanga Bingana 14:30; 22:24, 25.

3. Inki mutindu bansiku ya Nzambi lenda tanina beto?

Nsiku ya Nzambi kebuyisaka kuvukisa nitu na nganda ya makwela. (Baebreo 13:4) Bankwelani yina kelemfukaka na nsiku yai kevandaka na lutaninu ya ngolo mpi na bangwisana ya mbote ti bana na bo. Kansi, mbala mingi kusala bizumba na nganda ya makwela, kenataka maladi, kefwaka makwela, kepesaka mpasi ya mawi, mpi yo kesalaka nde kibuti mosi mpamba kusansa bana.​—Tanga Bingana 5:1-9.

Kana beto buya mambu yina lenda pusa beto na kusala bizumba na nganda ya makwela, beto tatanina bangwisana na beto ti Nzambi. Beto kebuyaka mpi kusadila bankaka mambu ya mbi.​—Tanga 1 Tesalonika 4:3-6.

  4. Inki mutindu kuzitisa luzingu kenatilaka beto mambote?

Bantu yina kezitisaka luzingu yina kele dikabu ya mekatukaka na Nzambi kevandaka ti mavimpi ya mbote ntangu bo kebuyaka mambu ya mbi bonso kunwa makaya mpi kusala mambu yina ketulaka luzingu na kigonsa. (2 Korinto 7:1) Nkutu, Nzambi kebakaka na mbalu luzingu ya mwana ya ndwelo yina keyela na kati ya divumu. (Kubasika 21:22, 23) Yo yina, beto fwete fwa ve na luzolo yonso mwana yina mebutukaka ntete ve. Dyaka, bantu yina kesepelaka ti luzingu bonso Nzambi, kebakaka bangidika sambu na kuditanina na kisalu, na nzo mpi na kamio. (Kulonga 22:8) Bo kesalaka ve bansaka yina ketulaka luzingu na bo na kigonsa sambu luzingu kele dikabu ya mekatuka na Nzambi.​—Tanga Nkunga 36:10.

5. Inki mutindu busantu ya menga kenatilaka beto mambote?

Menga kele santu sambu Nzambi ketuba nde luzingu to moyo ya konso kigangwa, kevandaka na menga. (Kuyantika 9:3, 4) Nsiku ya Nzambi, yina kemonisaka mbalu ya menga yina kele na luzingu, kenatilaka beto mambote. Inki mutindu? Yo kepesaka beto dibaku ya kubaka ndolula ya masumu.​—Tanga Levi 17:11-13; Baebreo 9:22.

Menga ya Yezu vandaka na mbalu mingi sambu yandi vandaka muntu ya kukuka. Yezu pesaka Nzambi kima mosi yina vandaka kumonisa luzingu na yandi, disongidila menga na yandi. (Baebreo 9:12) Menga na yandi yina kutyamukaka mepesaka beto dibaku ya kubaka luzingu ya mvula na mvula.​—Tanga Matayo 26:28; Yoane 3:16.

Sambu na kuzaba mambu mingi, tala kapu 12 mpi 13 ya mukanda yai, Inki Biblia Kelongaka Mpenza?, yina Bambangi ya Yehowa mebasisaka.