Tyäˈädë artikulo yëˈë mbudëkëyanëp ets mä mBiiblyë xypyäädët wiˈix yaˈˈatsoojëmbity tijaty mnayajtëëjëp. Ets Pën mtsojkënyëˈajtypy mbäät mëdë Jyobaa tyestiigë xyˈëxpëktë.

1. ¿Tiko mbäät nmëmëdoˈojëmë Dios?

Oy ko nmëmëdoˈojëm, pes yëˈë diˈib të xyajkojëm. Axtë Jesus, xëmë tmëmëdooyë Dios (Fwank 6:38; Diˈibʉ Jatanʉp [Apocalipsis] 4:11). Ets ko nmëmëdoˈojëmë Diosë yˈanaˈamën, ja mä ndukˈijxëm ko ntsojkëm. (Käjpxë 1 Fwank 5:3.)

Tukëˈëyë yˈanaˈamën yëˈë parë ndukˈoyˈäjtëm. Xytyukniˈˈijxëm wiˈix mbäät mas oy njukyˈäjtëm tyam ets wiˈix mbäät nˈaxäjëm ja kunuˈkxën mä tiempë myiny kyëdaˈaky. (Käjpxë Salmo 19:7, 11 etsë Isaías 48:17, 18.)

2. ¿Wiˈix ndukˈoyˈäjtëmë Diosë yˈanaˈamën parë nˈoyˈäjt nmëkˈäjtëm?

Diosë yˈanaˈamën yajkubojkypy ko jäˈäy myëˈuuky, ets ndukˈoyˈäjtëm parë kyaj muum nˈayoˈonbatëm o xypyatëmë yuu päˈäm diˈib yaˈoˈkp. Ko jäˈäy yˈukniˈigyë mbäät jyëmbity extëm tuˈugë bisië o mbäät tijaty ttuundëgoy (Proverbios 23:20, 29, 30). Jyobaa nyasˈijxëp ets nˈukëm, per kyaj nyajniˈigyëm. (Käjpxë Salmo 104:15 etsë 1 Korintʉ 6:10.)

Dios nan xyˈanmäˈäyëm ets kyaj pën nˈaxëkˈijxëm, nˈawäˈändakëm o nmëdäjtëmë jäˈäyˈäjtën diˈib axëktuump. Ko nbaduˈunëmë kyäjpxwijën, ta oy mëk nyajpatëm. (Käjpxë Proverbios 14:30 etsë 22:24, 25.)

3. ¿Wiˈix xykyuwäˈänëmë Diosë yˈanaˈamën?

Diosë yˈanaˈamën jyënaˈany ko yëˈëyë mbäädë jäˈäy yˈit tsyëënëdë diˈib të pyëktë (Ebreeʉsʉty 13:4). Ko kasäädë jäˈäy tmëmëdowdë tyäˈädë anaˈamën, ta mas seguurë nyayjawëdë ets mbäät tsuj yajxon ja uˈunk ënäˈk yeeky pyety. Ja tuk peky, ko jäˈäy yˈity tsyëënë mët diˈib kyaj të pyeky, mbäädë päˈäm pyaatyëty, yaˈˈajääywyäˈkxtë, axëëk nyaytyunëdë, xëmë yˈaxëktunëdë ti të tyuny të jyatyëty ets mbäät niduˈuk tmëwëˈëmë ja fyamilyë. (Käjpxë Proverbios 5:1-9.)

Ko nmëmëdoˈojëmë tyäˈädë anaˈamën ets njëjpkudijëm diˈib mbäät xyajtëgoˈoyëm, ta oy nˈijtëm mëdë Dios ets kyaj nyäjkëmë jäj jëmuˈumën. (Käjpxë 1 Tesalónikʉ 4:3-6.)

  4. ¿Wiˈix ndukˈoyˈäjtëm ko nmëjˈijxëmë jukyˈäjtën?

Pënaty myëjˈijxtëbë jukyˈäjtën diˈibë Dios të xynyamoˈoyëm, myastuttëbë bisië extëmë juˈuky o tijaty yaˈˈaxëˈkëbë niniˈkx këbäjk (2 Korintʉ 7:1). Dios mëj tˈixyë jukyˈäjtën, axtë uˈunk diˈib apenë kojpnëm tyääk jodoty (Éxodo 21:22, 23). Pääty kyaj mbäät nyaˈoˈkëmë uˈunk diˈib kyajnëm myaxuˈunkˈaty. Pënaty myëjˈijxtëbë jukyˈäjtën extëmë Dios, nan kyuentˈäjttëp tijaty mbäät yˈayoˈonbëjtaˈaky mä tyuny, mä jyëën tyëjk ets mä kyarrë (Deuteronomio 22:8). Nan kyaj ttukˈëyëˈëk ttukuyattë diˈib mbäät yˈayoˈon moˈoyëdë, pes nyijäˈädëp ko jukyˈäjtën yëˈë Dios të xynyamoˈoyëm. (Käjpxë Salmo 36:9.)

5. ¿Wiˈix ndukˈoyˈäjtëm ko nmëjˈijxëmë neˈpyny?

Neˈpyny nan mëj yˈity mët ko Dios jyënaˈany ko yëˈë yˈandijpyë jukyˈäjtën (Génesis 9:3, 4). Ndukˈoyˈäjtëm ko Diosë yˈanaˈamën jyënaˈany ko neˈpyny duˈun tsyoobääty extëmë jukyˈäjtën. ¿Tiko? Yëˈko mët yëˈëgyëjxmë Dios tmeˈkxy ja poky kaytyey. (Käjpxë Levítico 17:11-13 etsë Ebreeʉsʉty 9:22.)

Jesusë nyeˈpyny mas mëj nyajxy mët ko wäˈäts jäˈäyë nety. Ko Jesus tkëyajkyë jyukyˈäjtën mët yëˈëgyëjxmë naxwinyëdë jäˈäy, ta tkëyajky Dios wyindum ja nyeˈpyny, diˈib yˈandijpy ja jyukyˈäjtën (Ebreeʉsʉty 9:12). Ko ojts ttemy dyeky ja nyeˈpyny, ta mbäät nbatëm ja jukyˈäjtënë winë xëë. (Käjpxë Matewʉ 26:28 etsë Fwank 3:16.)

Pën mˈaknijawëyaampy, ixë kapitulo 12 etsë 13 mä tyäˈädë liibrë, ¿Ti tëyˈäjtën jantsy tukniˈijxëbë Biiblyë?, diˈib yajpëtsëëmdëbë Jyobaa tyestiigëty.