E artíkulo akí ta trata algun pregunta ku kisas bo tin i ta mustra bo unda pa haña e kontestanan den bo Beibel. Si bo ta deseá, Testigunan di Yehova gustosamente lo trata e preguntanan akí ku bo.

1. Dikon nos mester obedesé Dios?

Ta na su lugá pa nos obedesé Dios pasobra ta é a krea nos. Hesus mes a obedesé Dios henter su bida. (Huan 6:38; Revelashon 4:11) Ademas, obedesiendo e leinan di Dios, nos ta demostrá ku nos ta stim’é.—Lesa 1 Huan 5:3.

Tur Yehova Dios su leinan ta bon pa nos. Nan ta siña nos e mihó manera pa biba awor i ta mustra nos kon nos por haña rekompensa ku ta dura pa semper.—Lesa Salmo 19:7 i 11; Isaías 48:17 i 18.

2. Kon e leinan di Dios ta yuda nos keda salú?

Dios su leinan ku ta prohibí buracheria ta protehá nos di malesa i aksidente fatal. Bebementu di mas por hasi hende adikto i pone nan kometé bobedat. (Proverbionan 23:20, 29, 30) Yehova ta permití nos bebe alkohòl, basta ta na un midí.—Lesa Salmo 104:15; 1 Korintionan 6:10.

Yehova ta spièrta hende tambe kontra yalusí, rabia deskontrolá i otro aktitutnan destruktivo. Mas nos sigui su konsehonan, mas mihó esei ta pa nos salú.—Lesa Proverbionan 14:30; 22:24 i 25.

3. Kon e leinan di Dios por protehá nos?

Dios su lei ta prohibí relashon seksual pafó di matrimonio. (Hebreonan 13:4) Parehanan ku obedesé e lei akí ta sinti nan mas sigur i ta krea un mihó ambiente pa lanta nan yunan. Di otro banda, hopi bes relashon seksual pafó di matrimonio ta resultá den malesa, divorsio, violensia, trouma emoshonal i mayornan soltero.—Lesa Proverbionan 5:1-9.

Ora nos ta evitá situashonnan ku por pone nos kai den tentashon i tene relashon seksual pafó di matrimonio, nos ta protehá nos amistat ku Dios. Ademas, nos ta evitá di hasi otro hende daño.—Lesa 1 Tesalonisensenan 4:3-6.

 4. Kon rèspèt pa bida ta benefisiá nos?

Hende ku ta respetá bida, e regalo ku Dios a duna nos, ta disfrutá di un mihó salú ora nan stòp ku mal hábitonan manera humamentu i otro adikshon ku ta pone bida di hende na peliger. (2 Korintionan 7:1) Asta e bida di un bebi den matris di su mama ta balioso pa Dios. (Éksodo 21:22, 23, NW) Pues, nos no mester kometé aborto. Ademas, hende ku ta balorá Dios su punto di bista enkuanto bida ta tuma medidanan di siguridat na trabou, na kas i ora nan ta kore outo. (Deuteronomio 22:8) Es mas, nan no ta riska nan bida djis pa plaser, pasobra bida ta un regalo di Dios.—Lesa Salmo 36:9.

5. Kon e echo ku sanger ta sagrado ta benefisiá nos?

Sanger ta sagrado pasobra Dios ta bisa ku esaki ta representá bida, òf alma, di un kriatura. (Génesis 9:3, 4) Segun e lei di Dios, bida tin e mesun balor ku sanger, i e lei akí ta benefisiá nos. Kon asina? E ta hasi posibel ku nos por haña pordon pa nos pikánan.—Lesa Levítiko 17:11-13; Hebreonan 9:22.

Hesus su sanger tin un balor spesial pasobra Hesus tabata perfekto. Hesus a duna Dios algu ku a representá su bida, esta, su sanger. (Hebreonan 9:12) E echo ku el a drama su sanger a habri kaminda pa nos por haña bida eterno.—Lesa Mateo 26:28; Huan 3:16.

Pa mas informashon, wak kapítulo 12 i 13 di e buki akí, publiká pa Testigunan di Yehova.