Diospa Palabranmanta yachay

¿Imaynatam yanapawanchik Diospa kamachikuyninkuna?

Kay yachachikuymi kikikipa Bibliaykiwan wakin tapukuynikita contestasunki. Munaptikiqa Jehová Diospa testigonkunam kay tapukuykunamanta yachanaykipaq yanapasunkiman.

1. ¿Imanasqataq Diosta kasukunanchik?

Diosqa unanchawaqninchikmi, chaymi kasukunanchik. Jesuspas paytam kasukun (Juan 6:38; Apocalipsis 4:11). Diospa kamachisqankunata kasukuspam kuyasqanchikta qawachinchik. (Leey 1 Juan 5:3.)

Lliw kamachikuyninkunaqa allinninchikpaqmi. Yachachiwanchikmi kay tiempopi chaynataq hamuq tiempopipas allinta kawsananchikpaq. (Leey Salmo 19:7, 11 hinaspa Isaias 48:17, 18.)

2. ¿Imaynatam saludninchikpi Diospa kamachikuyninkuna yanapawanchik?

Trago tomayman mana qokurunapaq Diospa kamachikuynin kasukuyqa librawanchikmi accidentekunamanta chaynataq wañuyman apaq onqoykunamantapas. Llumpay trago tomayman qokuruqqa mana allinkunatam ruran (Proverbios 23:20, 29, 30). Jehová Diosqa manam harkawanchikchu pisilla tomaytaqa. (Leey Salmo 104:15 hinaspa 1 Corintios 6:10.)

Diosqa consejawanchiktaqmi mana celoso otaq celosa kanapaq, chaylla mana piñakuq kanapaq hinaspa huk mana allin ruraykunamantapas. Kamachikuyninkunata kasukuspaqa allin saludniyoqmi kasunchik. (Leey Proverbios 14:30 hinaspa 22:24, 25.)

3. ¿Imaynatam Diospa kamachikuynin librawanchik huchapakuymanta?

Diosqa manam munanchu casado kachkaspa hukwan pierdekuytaqa (Hebreos 13:4). Diospa kamachikuyninkunata kasukuq warmi-qariqa hawkam kawsakunku, wawa-churinkutapas allintam uywanku. Chaymantapas hukwan pierdekuyqa casado vidapim rikurichin onqoyta, divorciakuyta, maqanakuyta hukmanyayta hinaspa warmakunapas taytallanwan otaq mamallanwanmi wiñanku. (Leey Proverbios 5:1-9.)

Casado vidapaq Diospa kamachisqanta kasukuspaqa paywan amistadninchiktam waqaychanchik, runamasinchiktapas manam ñakarichisunchu. (Leey 1 Tesalonicenses 4:3-6.)

  4. ¿Imaynatam yanapawanchik pipa vidantapas respetayqa?

Diospa qosqan vidata respetaq runakunaqa cuerponku dañaq viciokunatam saqenku, cigarro pitayta hinaspa imaymana drogakunatapas (2 Corintios 7:1). Wiksapi wawapa vidantapas Diosqa yuyayniyoq runapa vidanta hinam qawan (Exodo 21:22, 23). Chaymi mana wañuchinachu wiksapi kaq wawataqa. Diospa vida qosqanta respetaq runaqa manam munanchu pipa vidanpas peligropi kananta: llamkayninpi, wasinpi chaynataq carronpipas (Deuteronomio 22:8). Manataqmi vidankutaqa peligropi churankuchu kusirikuykunata maskaspankuqa, reqsikunkum vidaqa Diospa qosqan kasqanta. (Leey Salmo 36:9.)

5. ¿Ima yachananchiktam Diosqa munan yawarmanta?

Diosqa yawartapas ancha valorniyoqtam qawan, yawarninchik kaptinmi runapas chaynataq animalkunapas kawsanchik (Genesis 9:3, 4). Diospa kamachisqanman hinaqa, yawarpas chaynataq vidapas ancha valorniyoqmi. ¿Imaynatataq yanapawanchik? Huchanchikmanta pampachasqa kanapaqmi Diosqa chaynata tantearqa. (Leey Levitico 17:11-13 hinaspa Hebreos 9:22.)

Mana huchayoq kasqanraykum Jesuspa yawarninqa ancha valorniyoq karqa. Runakunarayku wañuspanmi yawarninta ofrendata hina Jehová Diosman qorqa (Hebreos 9:12). Rantinchikpi wañuspa yawarninta chaqchusqanwanmi wiñay kawsayta chaskisunchik. (Leey Mateo 26:28 hinaspa Juan 3:16.)

Astawan yachayta munaspaqa qawariy ¿Imatapunim Bibliaqa yachachin? libropa 12 hinaspa 13 kaq yachachikuyninta, kay libroqa Jehová Diospa testigonkunapa rurasqanmi.