Aʻoaʻoga a le Tusi Paia

E Faapefea Ona Aogā iā i Tatou Tulafono a le Atua?

O loo talanoaina i lenei mataupu fesili atonu e te fia malamalama i ai, ma mau o le Tusi Paia e maua ai tali. E fiafia Molimau a Ieova e tou te talanoa i tali o na fesili.

1. Aiseā e ao ai ona tatou usiusitaʻi i le Atua?

E ao ona usiusitaʻi i le Atua ona o ia na foafoaina i tatou. (Ioane 6:38; Faaaliga 4:11) Ua aumaia e tulafono a le Atua se avanoa e faamaonia atu ai lo tatou alofa mo ia.—Faitau le 1 Ioane 5:3.

O tulafono uma a Ieova le Atua e mo lo tatou lelei. E aʻoaʻoina ai i tatou ina ia iloa le auala sili e ola ai i le taimi nei, ma pe faapefea foʻi ona maua le taui o le ola e faavavau i le lumanaʻi.—Faitau le Salamo 19:7, 11; Isaia 48:17, 18.

2. E faapefea ona aogā tulafono a le Atua i lo tatou soifua mālōlōina?

O le tulafono a le Atua e faatatau i le faasā o le onā, ua puipuia ai i tatou mai faamaʻi oti ma faalavelave faafuaseʻi. O le inu tele o se masaniga leaga ma e iʻu atu ai i amioga lē pulea. (Faataoto 23:20, 29, 30) O loo faatagaina e Ieova i tatou ina ia inu i le ʻava malosi, ae ia faia i se auala e fuafua lelei.—Faitau le Salamo 104:15; 1 Korinito 6:10.

Ua lapataʻia foʻi i tatou e le Atua ina ia ʻalofia le lotoleaga, le lē pulea o le ita, ma isi uiga matuā leaga. E iai ni aogā i lo tatou soifua mālōlōina, pe afai e tatou te faatatauina fautuaga a le Atua i le tele e mafai ai.—Faitau le Faataoto 14:30; 22:24, 25.

3. E faapefea i tulafono a le Atua ona puipuia ai i tatou?

E faasā i le tulafono a le Atua le faia o feusuaʻiga i fafo atu o le faaipoipoga. (Eperu 13:4) O ulugalii e usitaʻia lenei tulafono e la te lagona le saogalemu ma e ola aʻe le la fanau i se siʻomaga lelei. I le isi itu, o le faia o feusuaʻiga i fafo atu o le faaipoipoga e masani ona iʻu atu ai i faamaʻi, teteʻa, sauā, lagona mafatia po o le avea ma se matua nofo toʻatasi.—Faitau le Faataoto 5:1-9.

O le ʻalofia o tulaga e faaosoosoina ai i le faia o feusuaʻiga i fafo atu o le faaipoipoga, o le a puipuia ai la tatou faauōga ma le Atua, ma ʻalofia ai foʻi le faatigā i isi.—Faitau le 1 Tesalonia 4:3-6.

 4. E faapefea i le faatāua o le ola ona aogā iā i tatou?

O i latou e faatāua le meaalofa a le Atua o le ola, o le a fiafia i le mauaina o se soifua e mālōlōina, pe a latou tuua masaniga e pei o le ulaula ma isi masaniga e lamatia ai. (2 Korinito 7:1) E oo lava i se pepe o loo faatoʻā afuafua, e tāua tele lona ola i le Atua. (Esoto 21:22, 23) E lē tatau la ona tatou faia ma le loto iai se mea e oti ai se pepe e leʻi fanau mai. E lē gata i lea, o ē e faaaloalogia le silafaga a le Atua i le ola, e latou te faaeteete ina ia saogalemu a o iai i le galuega, i le fale, ma pe a faimalaga i taavale. (Teuteronome 22:8) E latou te lē tuua foʻi o latou ola i se tulaga lamatia ona o taaloga, ona o le ola o se meaalofa mai i le Atua.—Faitau le Salamo 36:9.

5. E faapefea i le paia o le toto ona aogā iā i tatou?

E paia le toto auā na fetalai le Atua o le ola lea o se meafaiola. (Kenese 9:3, 4) E aogā tele iā i tatou le tulafono a le Atua, lea ua iloa ai e tutusa le tāua o le toto ma le ola. E faapefea? E mafai ona faamagaloina ai agasala.—Faitau le Levitiko 17:11-13; Eperu 9:22.

E sili ona tāua le toto o Iesu ona e lelei atoatoa. Na tuuina atu e Iesu i le Atua se mea na fai ma sui o lona ola—o lona toto lea. (Eperu 9:12) O lona toto na maligi ua mafai ai ona tatou maua le ola e faavavau i le lumanaʻi.—Faitau le Mataio 26:28; Ioane 3:16.

Mo nisi faamatalaga, tagaʻi i le mataupu e 12 ma le 13 o lenei tusi, O ā Aʻoaʻoga Moni a le Tusi Paia? lomia e Molimau a Ieova.