Hen Kwagh Ken Mkaanem Ma Aôndo

Atindi a Aôndo Nga Se a Iwasen Nena?

Ngeren ne time sha mbampin mba alaghga u vanden pinen yô, shi a tese ape ú fatyô u zuan a mbamlumun sha mbampin mba shon ken Bibilo you yô. A doo Mbashiada mba Yehova kpishi u lamen sha mbamlumun mban vea we.

1. Gba u se ungwan imo i Aôndo sha ci u nyi?

Ka kwagh u shami u ungwan imo i Aôndo tseegh, sha ci u ka un a gbe se ye. Yesu je kpa yange ungwan imo i Aôndo hanma shighe cii. (Yohane 6:38; Mpase 4:11) Atindi a Aôndo tese se kwagh u se er ve se tese ser Aôndo doo se ishima yô.—Ôr 1 Yohane 5:3.

Atindi a Yehova Aôndo a ne la cii nga se a iwasen. Nga a tese se gbenda u uma u u hembe doon hegen cii la, kua er se er ve se fatyô u zuan a averen a tsôron ken hemen yô.—Ôr Pasalmi 19:7, 11; Yesaia 48:17, 18.

2. Atindi a Aôndo nga wasen se u lun ken mkpeyol nena?

Tindi u Aôndo a we sha kwagh u msôrom ma hunden la, ngu a kura se sha bouange man uaikyôr. Msôrom ma man karen ikyaa inya la, ka ma taver or u den kpishi, shi ka ma na or nan nyôr iyol ken ieren ibume. (Anzaakaa 23:20, 29, 30) Yehova na se ian ér se maan ikyôhô, kpa a kaa ér se maan i akuma akuma tseegh.—Ôr Pasalmi 104:15; 1 Mbakorinte 6:10.

Shi Yehova ta se icin sha kwagh u iyuhe i eren, man ishima i nyoon karen ikyaa inya kua aeren a bo agen kpaa. Aluer se mba dondon kwaghwan na vough vough yô, a kpe se iyol.—Ôr Anzaakaa 14:30; 22:24, 25.

3. Tindi u Aôndo una fatyô kuran se nena?

Tindi u Aôndo yange se u yaven a or u se vese nan ga yô. (Mbaheberu 13:4) Ior mba ve vese ayol ave mba ve kuran tindi ne yô, ka ve hemba lun ken mkor, shi kwagh la ka a na mbayev vev kpaa ve hemba teman kpen ve iyol. Sha vegher ugen di yô, u yaven a or u u vese nan ga la ashighe kpishi ngu a va a angev man ivaa paven man ipila man ishimavihin, shi ngu a na icombor i hingir u lun a ormaren môm.—Ôr Anzaakaa 5:1-9.

Aluer se mba palegh akaa a aa mee se se hingir u za yaven a or u se vese nan ga la yô, se za hemen u yan ikyar vea Aôndo. Shi se er ma kwagh u una vihi mbagenev iyol ga.—Ôr 1 Mbatesalonika 4:3-6.

  4. Ka sea wa uma ikyo yô, kwagh ne a wase se nena?

Shighe u ior mba ve we ikyo sha iyua i uma i Aôndo a ne la ve de aeren, er taav u man kua akaabo agen a vihin uma ve, a a ye tor ken a ve la yô, ka i kpe ve iyol. (2 Mbakorinte 7:1) Uma u wanikyundan u ken uya la je kpa, a gba Aôndo kwagh. (Ekesodu 21:22, 23) Nahan gba u se wua wanikyundan u ken uya la sha apera ga. Shi mba ve kav mnenge u Aôndo a lu a mi sha kwagh u uma yô, ka ve palegh u eren akaa a vihin or iyol hen ijiirtom man hen ya kua shighe u ve nyer mato kpaa. (Duteronomi 22:8) Heela tseegh ga, mba veren uma ve sha zongo sha ci u anumbe a eren ga, gadia uma ka iyua i Aôndo a ne se yô.—Ôr Pasalmi 36:9.

5. Aluer se mba nengen awambe ser ka icighan kwagh yô, kwagh ne una wase se nena?

Awambe ka icighan kwagh, sha ci Aôndo kaa ér a tile sha ityough ki uma u kwagh. (Genese 9:3, 4) Tindi u Aôndo u a tese ér awambe ka uma la, ngu se a iwasen. Ngu se a iwasen nena? A bugh gbenda u den se a asorabo.—Ôr Levitiku 17:11-13; Mbaheberu 9:22.

Awambe a Yesu yange hemba lun a inja cii, sha ci u un lu or u vough. Yesu yange na Yehova kwagh u tile sha ityough ki uma na yô, ka awambe a na je la. (Mbaheberu 9:12) Awambe a na a yange i haa inya la na yô, se fatyô u zuan a uma tsôron—Ôr Mateu 26:28; Yohane 3:16.

Wea soo u seer zuan a iwanger yô, ôr ityough 12 man 13 ki takerada u Bibilo Tese Ér Nyi Jimi? la. Ka Mbashiada mba Yehova ve gber u ye.