Ifa usun ekkewe Sam Repwe Pacheöch ngeni Nöür kewe Ät?

“PAPA, pwata ina tipächemom?” Kese mäirü atun nöüm we ät a eäni ena kapas eis ngonuk? Eli lon na atun ka pwapwa pun en emön sam. Nge ika noum we ät a apwönüetä om kapasen emmwen mi mürinnö me a küna feiöch seni, iwe, ese mwääl a lap pwapwaan letipom. *​—Än Salomon Fos 23:15, 24.

Lupwen noum we ät a wattetä, a chüen mwamwareituk? Are a kisikisilo an süfölituk? Ifa usun kopwe pappacheöch ngeni noum ät atun a määritä ngeni emön mwän? Akkomw, sipwe pworausfengen usun ekkoch mettoch mi äweiresi ekkewe sam.

Ülüngät Mettoch Mi Äweires

1. NAFANGAWEN FANSOUN: Lon chommong fönü, ekkewe sam ra wisen anganga tufichin ewe famili. Lap ngeni leenien ar angang a towau seni imwer me ra angang arapakkan unusen rän. Lon ekkoch fönü, ekkewe sam ra äeä ekis chök fansoun fän iten nöür kewe. Äwewe chök, eü repot seni Franis a apasa pwe ekkewe sam ra chök nöüni kis seni 12 minich iteiten rän le tümünü nöür kewe.

EKIEKI USUN: Ifa ükükün fansoun ka äeä fän iten noum we ät? Pwata kese makketiw ükükün fansoun iteiten rän kopwe äeä le pworaus me kunou ngeni noum we lon ei wiik are pwal lon nan wiik epwe feito? Neman, kopwe mäirü le küna pwe ese naf ewe fansoun ka äeä fän iten noum we.

2. NAFANGAWEN LEENIEN ÄPPIRÜ MI MÜRINNÖ: Ekkoch mwän rese ririöch ngeni pwisin semer kewe. Iei alon Jon seni Franis: “Ause kon chiechiöch me semei we.” Iwe, ifa usun a äweiresi manauen Jon? A erä: “A efisatä osukosuk. Äwewe chök, a weires ngeniei ai upwe poputääni le pworaus ngeni pwisin nei kewe.” Nge, ekkoch mwän ra fokkun sissilei semer kewe nge ese pöchökkül ewe riri lefiler. Iei alon Filip, 43 ierin: “Ese mecheres ngeni semei an epwe pwäri ngeniei an tong, ina pwata a weires ngeniei ai upwe pwal pwäraatä tong ngeni nei we ät, nge ua chök fokkun achocho.”

EKIEKI USUN: Ka meefi pwe om riri ngeni pwisin semom we a kküü föfförum ngeni noum we ät? Ka meefi pwe ka kan äppirü än semom föfför mi öch are föfför mi ngaw? Iwe, ifa usun?

3. OSUPWANGEN KAPASEN EMMWEN MI MÜRINNÖ: Eörenien ekkoch fönü ra ekisikisaalo aüchean wisen sam le tümünü ekkewe nau. Iei alon Luca seni Iurop: “Lon fönüei we, aramas ra ekieki pwe wisen fefin chök ar repwe tümünü  nöür kewe.” Lon ekkoch fönü, ra apöchökküla ekkewe sam ar repwe fokkun tichik lon ar awora allük lon famili. Äwewe chök, iei alon George seni Afrika: “Lon fönüei we, ekkewe sam rese kan kukkunou ngeni nöür kewe pun ra lolilen ika epwe ekisikisaalo pöchökkülen wisen ewe sam. Ina pwata, iteitan a weires ai upwe pwapwaiti äm chiechi me nei we ät.”

EKIEKI USUN: Lon sopwum we, ifa wisen ekkewe sam? Ra lükü pwe wisen chök ewe fefin an epwe tümünü ekkewe nau? Are chon sopwum we ra apöchökkula ekkewe sam ar repwe chiechi me pwäraatä tong ngeni nöür kewe ät ren ar foropacher me kissiir, are ra esiita ena esin napanap?

Ika en emön sam mi küna ekkeei sokkun weires, ifa usun kopwe sopwöch? Iwe, ekieki ekkeei kapasen pesepes fan:

Poputä seni Lekükkünün Noum we Ät

Ekkewe ät ra kan mochen nikäppirü semer kewe. Ina pwata, atun mi chök kükkün, kopwe alamota an na mochen. Ifa usun kopwe föri ena? Me ineet kopwe awora fansoun fän itan?

Ika mi fich, etiwa noum we ät epwe fituk lon met ka kan föri iteiten rän. Äwewe chök, ika ka atake, kopwe ngeni efoch kükkün söföl are reik pwe epwe älisuk. Ese mwääl epwe pwapwaiti ämi angangfengen pun en ewe emön a kan ingeiti! Neman kopwe mmang le äwesi om angang nge kopwe apöchökküla ewe riri lefilemi me asukula ifa usun epwe angangöchülo. Me loom, ewe Paipel a pesei ekkewe sam pwe repwe etiwa nöür kewe ar repwe fitiir lon met ra kan föri iteiten rän me repwe äeä ena fansoun fän iten ar repwe asukuler me pworausfengen. (Tuteronomi 6:6-9) Ena emmwen a chüen lamot ngenikich.

Lükün ämi angangfengen me noum we ät, kopwe awora fansoun fän iten ämi kukkunoufengen. Me ren eü pworaus a erä pwe än emön sam kukkunoufengen me nöün we esap chök efisatä pwapwafengen, nge ewe sam a pwal pesei nöün we kükkün an epwe pwal pwora le sotuni sokkopaten mettoch mi minefö ngeni.

Än ewe sam kukkunoufengen me nöün we ät a suuki alen pwal eü mettoch mi lamot. Iei alon Michel Fize, emön chon kütta pworaus: “A mecheres ngeni emön ät an epwe pwoppworaus ngeni seman atun kukkunoufengen.” Lon ena atun, ewe sam a tongeni pwäraatä an tongei nöün we ät lon kapas me föfför. Iwe, epwe atufichi le asukula nöün we ät le pwäraalo an tong ngeni. Iei alon André, emön sam seni Tois: “Le kükkünün nei we ät itan Manuel, aua kukkunoufengen fän chommong. Ua foropachei me i a pwal käeö le tongeiei.”

Ewe sam a pwal tongeni apöchökküla ewe ririin tong lefiler me nöün we ät me mwen repwe annut. Älleani ngeni och pworaus me aüseling ngeni meefian usun an pwapwa me lolilen lon ena rän. Ika ka föri ena ka ämecheresi ngeni an epwe pwoppworaus ngonuk atun a mämmääritä.

Kükkütta Met Oua Löllö woon le Sani

Ekkoch alüwöl rese sani än emön sam achocho le pwoppworaus ngeniir. Ika noum we ät a erikirik le pölüweni om kewe kapas eis, kosap ekieki pwe ese mochen pworaus ngonuk. Neman epwe sani le pworaus ngonuk ika kopwe siwili napanapen om pworaus ngeni.

Jack, emön sam seni Franis, fän ekkoch a weires ngeni le pworaus me nöün we ät itan Jérôme. Ina popun a siwili napanapen an sotun le fos ngeni. Ese echimwa nöün we an epwe fos, nge a chök fiti le urumwot woon pwor. Iei alon Jack: “Mwirin äm urumwot, aua kan mommot woon ewe sipa me ekis asösö. Lon na atun nei we ät a kan pwäri masouen letipan. Ai lükü pokiten aua chök rüüemönülo lon ekkeei atun, iwe, a efisi och sokkun riri mi sokkolo aüchean lefilem.”

Ifa usun ika noum we ät ese sani urumwot? André, emön sam mi wor nöün mi fen määritä, a pwapwa le chechchemeni ekkewe fansoun iir me nöün na ät ra kan kakkatol ekkewe füü fän läng. Iei alon André: “Aua föri eü leenien mot lukun me mommot woon lepwin atun mi patapat, iwe, aua pwölükemilo, ün ti, me nennetä  fän läng. Aua pworausfengen usun ewe Emön mi föratä ekkewe füü. Aua pworaus usun pwisin pworausem me mettoch meinisin ese pwal lifilifil.”​—Aisea 40:25, 26.

Nge ifa usun ika kese sani le föri met noum we ät a pwapwaiti le föri? Iwe, kopwe pennükü pwisin om mochen. (Filipai 2:4) Iei alon Ian, seni Africa: Ngang ua fokkun sani pekin urumwot lap seni nei we ät itan Von. I a sani sepelin me computer. Ina pwata ua pwal föri pwe upwe sani met ekkena a pwal sani. Ua uwei i ngeni ikewe ekkewe kükkün sepelin ra chang ie pwe repwe apwapwaai chon katol me aua pwal urumwot lon computer usun angangen uwou sepelin. Ua meefi pwe pokiten aua pwapwa le förfengeni ekkena mettoch, iwe a mecheres ngeni Von an epwe fos ngeniei.”

Ämääraatä an Lükülük Woon Pwisin I

“Papa, katol mä, Papa ne!” A ina usun än noum we püchör le köruk lupwen a kerän silei och angang mi minefö ngeni? Nge ika a fen säräfö iei, a chüen mochen kopwe äfänni an angang? Neman aapw. Nge, mi chüen lamot ngeni kapasen mwareiti ika epwe määritä ngeni emön mi eäni ekiek mi mürinnö.

Ekieki än Jiowa Kot leenien äppirü a pwisin isetiw lon föfförün ngeni emön me lein nöün kewe. Atun Jises epwele poputääni eü kinikinin manauan mi aüchea woon fönüfan, Jiowa a pwäraalo ngeni aramas an tongei nöün we ren an apasa: “Iei i nei mi achengicheng, üa unusen pwapwa ren.” (Mattu 3:17; 5:48) Ewer, mei wor wisom le emiriti me asukula noum we ät. (Efisus 6:4) Nge, ka pwal kükkütta ekkewe fansoun kopwe apünga noum we ren ekkewe mettoch mi mürinnö a apasa me föri?

A weires ngeni ekkoch mwän ar repwe pwäraatä tong me eäni kapasen mwareiti. Neman ra fen määritä lon eü famili ikewe sam me in ra ekilapei mwäällir lap seni föfföröchür. Ika a pwal ina usum, mi lamot kopwe achocho le ämääraatä än noum we lükülük woon pwisin i. Ifa usun kopwe föri ena? Luca, ewe sia fen pworaus usun akkomw, ra kan angangfengen me nöün we ät itan Manuel, 15 ierin lupwen ra föri angangen lon imw. Iei alon: “Fän ekkoch, ua ereni Manuel pwe epwe poputääni och angang me upwap älisi ika a osupwang ren ai älillis. Lap ngeni, a pwisin äwesaalo an angang. Sopwöchün lon an föri an angang a efisi an menemenöch me lükülük woon pwisin i. Atun a sopwöch, ua apünga i. Ika ese kon sopwöch, ua chüen ämmeef ngeni pwe ua äfänni an achocho.”

Kopwe pwal tongeni ämääraatä än noum we ät lükülük woon pwisin i ren om älisi le tikeri met a tongeni achocho ngeni fän iten mwach kkan. Iwe, met ika ka meefi pwe noum we ät a ekis mmang le apwönüetä ekkewe mettoch a ekiekin tikeri? Nge, ifa usun ika minne a achocho ngeni a sokkolo seni met ka pwisin filatä fän itan inaamwo ika esor ngawan? Iwe, a lamot kopwe ekiekisefäli met ka ekiekin küna seni noum we. Jack ewe sia pworaus usun akkomw, a apasa: “Ua achocho le älisi nei we ät le isetiw eü mettoch epwe tongeni achocho le tikeri. Nge, ua pwal tümünüöchü pwe ena mettoch epwe achocho le tikeri esap ai nge pwisin an. Ua pwal pwisin ächema ngeniei pwe an tikeri met epwe achocho ngeni epwe longolong woon an pwisin tufich.” Ika kopwe aüseling ngeni meefien noum we ät, apünga an achocho me pesei le pworacho ngeni an kewe apwangapwang, iwe kopwe älisi i le tikeri minne a achocho ngeni.

Ren enletin, epwe wor met epwe aosukosuka me äweiresi ämi riri. Nge mwiriloon, ese mwääl noum we ät epwe mochen pacheöch ngonuk. Nge, itä iö esap mochen pacheöch ngeni emön mi älisi i le sopwöch?

[Pwóróus fan]