“TAMAGU, edena dala ai gau momo oi diba?” Nega ta emu natuna mero be unai bamona ia henanadai, a? Unai negai, reana oi mamia oi be tama ta dainai oi moale. To bema emu natuna mero be emu sisiba namona ia badinaia bona anina namona ia vara, do oi moale bada. a​​—⁠Aonega Herevadia 23:​15, 24.

To idia hanaia laganidia ai, emu natuna mero be oi ia do laloa bada noho, a? O toana be ia bada ia lao dainai, oi ia laloa bada lasi, a? Edena dala ai natuna ia maragi negana amo ela bona ia bada neganai, ia oi tura henia noho diba? Mani tamadia ese idia davaria hekwakwanai haida ita laloa.

Hekwakwanai Badadia Toi

1. NEGA BE LASI: Tano momo ai, tamadia be moni gaukara idia karaia edia famili naria totona. Nega momo, hora bada be gaukara gabunai idia haorea. Gabu haida ai, tamadia be nega sisina sibona idia henia natudia ida idia noho totona. Hegeregere, vanegai France ena tahua gaukarana ta ese ia hahedinaraia, tamadia be dina ta lalonai miniti 12 bamona edia natudia idia naria.

INAI LALOA: Hora hida lalonai emu natuna mero oi bamoa? Wiki ta o rua lalonai, emu natuna ida dina ta ta ai umui gaukara hebou negadia oi torea. Reana do oi hoa badina oi itaia nega bada oi gaukaralaia lasi emu natuna bamoa totona.

2. HAHEITALAI NAMONA BE LASI: Tatau haida be edia tamana ida idia hetura namonamo lasi. France ai ia noho tauna, Jean-Marie ia gwau: “Egu tamana ida gau momo ai karaia hebou lasi.” Unai ese dahaka ia havaraia? Jean-Marie ma ia gwau: “Lau laloa lasi hekwakwanaidia idia havaraia, hegeregere lau hekwarahi egu natudia ida ai herevahereva namonamo totona.” Tatau ma haida be edia tamadia idia diba namonamo, to idia tura henidia lasi. Philippe, ena mauri lagani be 43, ia gwau: “Egu tamana ese lau dekenai lalokau ia gwauraia be auka. Unai dainai, egu natudia dekenai lalokau hahedinaraia totona lau hekwarahi.”

INAI LALOA: Oi mamia emu tamana ese oi ia kara henia dalana hegeregerena, emu natuna danu unai bamona oi kara henia, a? Danu emu tamana ena kara namodia o dikadia oi badinaia noho, a? Edena dala ai?

3. SISIBA NAMODIA BE LASI: Gabu haida ai, taunimanima idia laloa tamana ena maduna natudia naria karana dekenai be anina lasi. Western Europe tanona ai ia bada tauna, Luca, ia gwau: “Lau bada tanona ai, taunimanima idia laloa natudia naria karana be hahine ena gaukara.” Gabu ma haida ai, tamadia idia hagoadaia, natudia dekenai matahakani aukana idia henia, to gau ma  haida idia karaia lasi. Hegeregere, Africa tanona ta ai ia bada tauna, George, ia gwau: “Egu gabu dekenai, tamadia be edia natudia ida idia gadara lasi, tamana ena siahu ia hamaragia garina. Unai dainai hanaihanai lau hekwarahi egu natudia edia hebamo karana lau moalelaia totona.”

INAI LALOA: Emu gabu taudia idia laloa, tamadia edia maduna be dahaka? Idia laloa natudia naria karana be sinana ena maduna, a? Tamadia idia hagoadaia edia natudia dekenai lalokau idia hahedinaraia, o idia laloa unai be anina lasi, a?

Bema oi be tamana ta bona unai bamona hekwakwanai oi davaria, edena dala ai unai do oi hanaia? Henunai idia noho heduru herevadia oi laloa.

Idia Maragi Neganai Tura Henidia Matamaia

Toana be natudia memero idia ura edia tamadia idia tohotohoa. Unai dainai emu natuna mero ia do matamata neganai, oi durua emu kara namodia ia tohotohoa totona. Edena dala ai unai oi karaia diba? Bona edena negai emu natuna ida gau haida umui karaia hebou diba?

Bema mai dalana, emu natuna mero ida dina ta ta gaukaradia umui karaia hebou. Hegeregere, bema gaukara haida oi karaia, emu natuna oi noia oi ia durua totona. Gabu oi daroa neganai, emu natuna mero dekenai puriki oi henia, o guri oi geia neganai, ia dekenai savolo maragina ta oi henia, oi ia durua totona. Momokani, natuna be do ia moale ena tamana ida ia gaukara hebou totona, badina ia itaia ena tamana be haheitalai namona! Reana emui gaukara do umui haorea haraga lasi, to umui gaukara hebou dainai unai ese emui hetura karana do ia hagoadaia, bona gaukara karaia namonamo dalana do oi hadibaia. Idaunegai, Baibel ese tamadia ia hagoadaia edia natudia ida dina ta ta gaukaradia idia karaia hebou, bona unai nega do idia gaukaralaia idia herevahereva bona hadibadia totona. (Deuteronomi 6:​6-9) Hari unai sisiba be mai anina bada.

Emu natuna mero ida oi gaukara hebou sibona lasi, to danu nega oi atoa umui gadara hebou totona. Gadara ese dala ia kehoa emu natuna mero ida oi moale hebou totona. To danu, tahua gaukaradia ese idia hahedinaraia, tamadia be natudia ida idia gadara hebou neganai, natudia idia hagoadaia gaukara idauidau idia karaia bona idia gari lasi.

Tamana bona natuna mero idia gadara hebou ese mai anina bada gauna ma ta ia havaraia. Tahua gaukara ia karaia tauna ta, Michel Fize, ia gwau: “Gadara lalonai natuna mero be tamana ida ia herevahereva namonamo diba.” Gadara negadiai, tamana be ena hereva bona kara amo natuna dekenai lalokau ia hahedinaraia diba. Unai amo iena natuna dekenai lalokau hahedinaraia dalana ia hadibaia. André, Germany ai ia noho tamana ta, ia gwau: “Egu natuna mero ia maragi neganai, nega momo ai gadara hebou. Ia lau rosia, bona ia ese lau dekenai unai bamona lalokau karana ia hahedinaraia danu.”

Danu mahuta negadiai, tamana ese ena natuna lalokau henia karana ia hagoadaia diba. Hanaihanai natuna dekenai sivarai ta oi duahia, bona natuna ese dina ai ia moalelaia bona laloa gaudia ia gwauraia neganai oi kamonai henia be namo. Bema unai bamona oi karaia, natuna ia bada neganai oi ia hereva henia be auka lasi.

Emui Ura Gaudia Karaia Hebou Noho

Reana memero matamatadia haida idia ura lasi edia tamadia ese idia hereva henia. Bema emu natuna mero ia ura lasi emu henanadai ia haerelaia, namo lasi oi laloa hanaihanai unai bamona do ia karaia. Bema ia oi hereva henia dalana oi haidaua, reana do ia ura ena lalohadai ia gwauraia.

Jacques, France ai ia noho tamana ta, ia davaria nega haida ena natuna mero, Jérôme ida ia herevahereva be auka. To ena natuna ia fosia lasi ia hereva totona, ia be dala ma ta ia tohoa​​—⁠ia ida soka gadara idia karaia. Jacques ia gwau: “Ai gadara murinai, ava latanai ai helai bona ai laga-ani sisina. Unai negai egu natuna mero ese ena lalohadai ia gwauraia. Ai rua sibona ai noho dainai, unai ese ai huanai hetura karana namona ia havaraia.”

Dahaka do oi karaia bema emu natuna mero be spot gadara ia ura henia lasi? André be ena  natuna mero ida hora momo lalonai guba ena hisiu idia raraia negadia ia laloa. André ia gwau: “Hanuaboi ena keru negadiai emai sea ai atoa, keru dabuadia ai karaia, ti kapusi ai dogoatao, bona guba ai raraia. Hisiu ia karaia Tauna ai herevalaia. Ai dekenai idia vara gaudia, bona ma gau haida ai herevalaia.”​​—⁠Isaia 40:​25, 26.

Bema oi ura lasi emu natuna ia ura henia gaudia haida oi karaia be edena bamona? Unai neganai namona be emu ura gaudia haida oi dadaraia. (Filipi 2:⁠4) Ian, South Africa ai ia noho tauna, ia gwau: “Lau be spot gadara lau ura henia bada, to egu natuna Vaughan be unai ia ura henia lasi, ia be peleini bona kompiuta ia ura henia. Unai dainai, unai gaudia lau ura henia danu. Peleini gabudia dekenai ia lau abia lao bona peleini taria daladia be kompiuta dekenai ai gadaralaia. Lau laloa gau idauidau ai karaia hebou dainai, Vaughan be lau dekenai ena lalohadai ia herevalaia diba.”

Ena Lalogoada Karana Habadaia

“Tamagu, itaia!” Emu natuna mero maragi be gau matamatana ta ia karaia neganai, unai bamona ia boiboi, a? Bema hari ia bada vadaeni, emu lalonamo ia tahua noho, a? Reana lasi. To emu lalonamo ia abia be namo unai amo ia bada neganai taunimanima namona ai ia lao.

Iehova Dirava ese ena natuna ta ia kara henia ena haheitalai mani oi laloa. Iesu be tanobada ai mai anina bada gaukarana ta ia ura hamatamaia neganai, Dirava ese ena lalokau ia dekenai ia gwauraia hedinarai, ia gwau: “Inai be egu Natuna, egu lalokau, ia lau lalonamo henia.” (Mataio 3:17; 5:48) Momokani, emu maduna be emu natuna mero oi matahakani henia bona hadibaia. (Efeso 6:⁠4) To ia karaia bona herevalaia gau namodia dainai oi hanamoa, a?

Tatau haida ese edia natudia dekenai lalokau idia hahedinaraia be auka. Reana idia tubu daekau ruma besena lalonai edia tama sina ese edia kerere idia herevalaia momo to edia gaukara namodia idia herevalaia lasi. Bema unai be oi dekenai ia vara, oi hekwarahi be namo, emu natuna ena lalogoada karana habadaia totona. Edena dala ai unai oi karaia diba? Matamanai ai herevalaia tauna, Luca, be hanaihanai ena natuna mero, Manuel​—⁠ena mauri lagani 15​—⁠ida ruma gaukaradia idia karaia hebou. Luca ia gwau: “Nega haida Manuel lau hamaoroa ia sibona ese gaukara ta do ia karaia bona bema heduru ia ura, ia do lau durua. Nega momo sibona ena gaukara ia hagugurudia. Ia karaia gaudia dainai ia moale bona ena lalogoada karana ia habadaia. Ena gaukara ia hagugurudia neganai ia lau hanamoa. Bema ia laloa ena gaukara ia karaia namonamo lasi, ia lau hadibaia ena hekwarahi lau laloa bada.”

Danu emu natuna ena lalogoada karana oi habadaia diba, bema ia oi durua mauri lalonai mai anina bada tahua gaudia ia hagugurua. To, bema emu natuna ese emu ura dalanai tahua gaudia ia hagugurua haraga lasi, dahaka do oi karaia? O bema iena tahua gaudia, ena be idia dika lasi, to oi ese ia totona oi abia hidi tahua gaudia amo idia idau, be edena bamona? Bema unai bamona, namona be unai gaudia oi laloa lou. Matamanai ai herevalaia tauna, Jacques, ia gwau: “Egu natuna mero lau durua ia hagugurua diba tahua gaudia ia atoa totona. To danu, lau hahedinaraia unai be iena tahua gaudia, lauegu lasi. Bona lau laloa namona be iena goada o diba hegeregerena unai tahua gaudia ia hagugurua.” Bema emu natuna ena lalohadai oi kamonai, ia karaia namonamo gaudia dainai oi hanamoa, bona oi hagoadaia iena manoka gaudia ia hanaia totona, ia do oi durua ena tahua gaudia ia hagugurua totona.

Momokani, oi bona emu natuna huanai hekwakwanai do idia vara, to gabeai emu natuna ia bada neganai oi do ia tura henia noho, badina vaia bema ta ita durua, unai tauna be do ia ura ita ia tura henia.

[Footnote]