Il-Missirijiet Kif Jistgħu Jibqgħu Qrib Uliedhom Subien?
“PA, KIF taf daqshekk?” Ibnek qatt issorprendiek b’mistoqsija bħal din? Dak iż-żmien, int x’aktarx li ħassejtek kburi li int missier. Imma kieku ibnek aġixxa fuq dak li għedtlu—kieku applika l-pariri għaqlin li tajtu u ħasad il-benefiċċju—bla dubju qalbek kienet timtela b’ferħ saħansitra akbar. a—Proverbji 23:15, 24.
Madankollu, matul is-snin, ibnek baqaʼ jammirak bħalma kien jagħmel fil-passat? Jew donnu jidher li hekk kif jikber, ir-rispett lejk dejjem qed jonqos? Kif tistaʼ tibqaʼ qrib ibnek hekk kif minn tifel isir raġel? L-ewwel, ejja nikkunsidraw ftit mill-isfidi li jiffaċċjaw il-missirijiet.
Tliet Sfidi Komuni
1. NUQQAS TAʼ ĦIN: F’ħafna pajjiżi, il-missirijiet jaqilgħu l-biċċa l-kbira mid-dħul għall-familja. Spiss, xogħolhom jirrikjedi li ma jkunux id-dar għall-biċċa l-kbira mill-jum. F’xi postijiet, il-missirijiet ftit li xejn iqattgħu ħin maʼ wliedhom. Pereżempju, stħarriġ li sar dan l-aħħar fi Franza sab li l-missirijiet hemmhekk iqattgħu bħala medja inqas minn 12-il minuta kuljum jieħdu ħsieb uliedhom.
AĦSEB DWAR DAN: Kemm tqattaʼ ħin maʼ ibnek? Fil-ġimgħa jew fil-ħmistax li ġejjin, għala ma tniżżilx l-ammont taʼ ħin totali li tqattaʼ miegħu kuljum? Ir-riżultati jistgħu jissorprenduk.
2. NUQQAS TAʼ EŻEMPJU TAJJEB: Xi rġiel ftit li xejn kellhom kuntatt maʼ missierhom stess. “Ma tantx kelli kuntatt maʼ missieri,” jgħid Jean-Marie, li jgħix fi Franza. Jean-Marie kif ġie effettwat? “Dan ħalaqli problemi li qatt ma immaġinajt,” jgħid hu. “Perkażu, insibha diffiċli biex ikolli konversazzjonijiet siewja maʼ wliedi stess.” F’każi oħrajn, l-irġiel jafuh sew lil missierhom, imma r-relazzjoni taʼ bejn missier u iben ma tantx hi tajba. Philippe, li għandu 43 sena, jgħid: “Missieri kien isibha diffiċli biex jurini affezzjoni. Minħabba f’hekk, ikolli naħdem iebes biex nuri iktar affezzjoni maʼ ibni.”
AĦSEB DWAR DAN: Tħoss int li r-relazzjoni li għandek maʼ missierek teffettwa l-mod kif tittratta lil ibnek? Innotajt li qed issegwi d-drawwiet tajbin jew ħżiena taʼ missierek? Kif?
3. NUQQAS TAʼ PARIRI BILANĊJATI: Xi kulturi jċekknu l-irwol tal-missier fit-trobbija tat-tfal. “Fejn trabbejt jien,” jgħid Luca, li trabba f’pajjiż fl-Ewropa tal-Punent, “in-nies kienu jħossu li t-trobbija tat-tfal kienet xogħol il-mara.” F’kulturi
oħrajn, il-missirijiet jiġu inkuraġġiti biss biex jiddixxiplinaw b’mod strett lil uliedhom, u xejn iktar. Pereżempju, George trabba f’pajjiż Afrikan. Hu jgħid: “Fil-kultura tiegħi, il-missirijiet ma jilagħbux maʼ wliedhom għax jibżgħu li dan se jnaqqas mill-awtorità tal-missier. Għalhekk, dejjem sibtha diffiċli biex sempliċement ingawdi l-kumpanija taʼ ibni.”AĦSEB DWAR DAN: Fil-komunità tiegħek, il-missirijiet liema rwol huma mistennijin li jkollhom? Jiġu mgħallmin biex iħarsu lejn it-trobbija tat-tfal bħala x-xogħol tal-mara? Huma l-missirijiet inkuraġġiti biex jesprimu l-imħabba u l-affezzjoni għal uliedhom subien, jew huma ideat bħal dawn meqjusin bħala banali?
Jekk int missier li tiffaċċja waħda jew iktar minn dawn l-isfidi, kif tistaʼ tirnexxi? Ikkunsidra s-suġġerimenti li ġejjin.
Ibda Waqt li Ibnek Ikun Għadu Żgħir
Is-subien donnhom jitwieldu bix-xewqa li jimitaw lil missierhom. Għalhekk, waqt li ibnek ikun għadu żgħir, ħu vantaġġ minn din ix-xewqa. Kif tistaʼ tagħmel dan? U meta tistaʼ ssib il-ħin biex tqattgħu miegħu?
Kull meta jkun possibbli, inkludi lil ibnek fl-attivitajiet tiegħek taʼ kuljum. Pereżempju, jekk qed tagħmel xi faċendi, qabbdu jgħinek. Agħti lil ibnek xkupa żgħira jew pala ċkejkna. Bla dubju, hu se jitgħaxxaq jaħdem maġenb l-eroj u l-mudell tiegħu, missieru! Forsi l-faċendi tiegħek jieħdu ftit iktar ħin; imma se ssaħħaħ ir-rabta taʼ bejnietkom, u se tkun qed tgħallmu attitudni tajba lejn ix-xogħol. Żmien twil ilu, il-Bibbja inkuraġġiet lill-missirijiet biex jinkludu lil uliedhom fl-attivitajiet tagħhom taʼ kuljum u biex jużaw dawn l-okkażjonijiet ħalli jikkomunikaw magħhom u jgħallmuhom. (Dewteronomju 6:6-9) Dan il-parir għadu jgħodd.
Minbarra li taħdem maʼ ibnek, agħmel il-ħin biex tilgħab miegħu. Il-logħob ma jipprovdilkomx biss opportunità biex tieħdu pjaċir flimkien. Ir-riċerka turi li meta l-missirijiet jilagħbu mat-tfal żgħar tagħhom, huma jinkuraġġuhom biex ikunu iktar avventurużi u qalbenin.
Il-logħob bejn missier u iben għandu funzjoni saħansitra iktar importanti. “Huwa permezz tal-logħob,” jgħid ir-riċerkatur Michel Fize, “li tifel jikkomunika l-aħjar maʼ missieru.” Waqt il-logħob, missier jistaʼ jesprimi l-affezzjoni lejn ibnu kemm bil-kliem kif ukoll bl-azzjoni. Meta jagħmel dan, hu jgħallem lil ibnu kif jesprimi l-affezzjoni wkoll. “Meta ibni kien għadu żgħir,” jgħid André, missier li jgħix il-Ġermanja, “spiss konna nilagħbu flimkien. Kont inħaddnu miegħi, u hu tgħallem jesprimi mħabbtu lejja.”
Ħin ieħor meta missier jistaʼ jsaħħaħ ir-rabtiet taʼ mħabba maʼ ibnu hu qabel l-irqad. Regolarment aqralu xi storja, u isimgħu jesprimi l-ferħ u t-tħassib tiegħu dwar il-ġurnata. Jekk tagħmel dan, se tagħmilhielu iktar faċli biex ikompli jiftaħ qalbu miegħek hekk kif jikber.
Ibqaʼ Sus Wara Dak li t-Tnejn Tħobbu Tagħmlu
Xi subien adoloxxenti għandhom mnejn ikunu indifferenti meta missierhom jipprova jikkomunika magħhom. Jekk ibnek ikun jidher li qed jevita l-mistoqsijiet tiegħek, tikkonkludix li ma jrid ebda konversazzjoni. Forsi jkun iktar lest li jiftaħ qalbu miegħek jekk tadatta l-mod kif tikkomunika miegħu.
Jacques, missier li jgħix fi Franza, kultant kien isibha diffiċli biex jikkomunika maʼ ibnu, Jérôme. Imma minflok ma sforza lil ibnu biex jitkellem, hu adatta l-metodu tiegħu—kien jilgħab il-futbol miegħu. “Wara l-eżerċizzju fiżiku tagħna,” jgħid Jacques, “konna noqogħdu bilqiegħda fuq il-ħaxix u nistrieħu ftit. Ibni spiss kien jiftaħ qalbu dak il-ħin. Is-sempliċi fatt li konna flimkien u, naħseb jien, il-fatt li kien jaf li setaʼ jqattaʼ xi ħin waħdu miegħi, għenu biex tiżviluppa rabta speċjali bejnietna.”
Xi ngħidu jekk ibnek ma jħobbux l-isports? André jiftakar b’għożża s-sigħat li qattaʼ jħares Isaija 40:25, 26.
lejn il-kwiekeb maʼ ibnu. “Fl-arja kiesħa tal-lejl konna narmaw id-dekċers,” jgħid André. “Imbagħad konna nitgeżwru biex nisħnu u, b’tazza te f’idejna, inħarsu lejn is-sema billejl. Konna nitkellmu dwar il-Wieħed li ħalaq il-kwiekeb. Konna nitkellmu dwar kwistjonijiet persunali. Konna nitkellmu kważi dwar kollox.”—Xi ngħidu jekk int ma tiħux pjaċir tagħmel xi affarijiet li jinteressaw lil ibnek? F’dan il-każ, forsi trid tqattaʼ xi ħin tagħmel xi affarijiet li ma tiħux pjaċir tagħmilhom. (Filippin 2:4) “Jien kont ferm iktar interessat fl-isports milli kien ibni Vaughan,” jgħid Ian, li jgħix fl-Afrika t’Isfel. “Hu kien iħobb l-ajruplani u l-kompjuters. Għalhekk, bdejt ninteressa ruħi f’dawk l-affarijiet ukoll, billi kont nieħdu għal wirjiet tal-ajruplani u konna nilagħbu logħba fuq il-kompjuter li fiha tkun qisek qed issuq ajruplan. Inħoss li peress li konna nieħdu sehem flimkien f’attivitajiet pjaċevoli, Vaughan kien iħossu iktar komdu jitkellem miegħi.”
Ibnilu l-Fiduċja Fih Innifsu
“Ara, pa, ara!” It-tifel ċkejken tiegħek qatt qallek xi ħaġa bħal din meta tgħallem jagħmel xi ħaġa ġdida? Jekk issa sar adoloxxent, għadu jurik li jrid l-approvazzjoni tiegħek? Forsi le. Imma żgur li jeħtieġha biex jikber u jsir adult bilanċjat.
Innota l-eżempju li ħalla Alla Ġeħova nnifsu meta ttratta maʼ wieħed minn uliedu. Meta Ġesù kien wasal biex jibda fażi speċjali taʼ ħajtu fuq l-art, Alla esprima pubblikament l-affezzjoni tiegħu lejh, billi qal: “Dan hu Ibni, il-maħbub, li lilu jien approvajt.” (Mattew 3:17; 5:48) Huwa minnu li int għandek l-obbligu li tiddixxiplina u tgħallem lil ibnek. (Efesin 6:4) Imma tfittex ukoll opportunitajiet biex tesprimi l-approvazzjoni tiegħek għall-affarijiet tajbin li jgħid u jagħmel?
Xi rġiel isibuha taʼ sfida biex jesprimu l-approvazzjoni u l-affezzjoni. Għandhom mnejn trabbew f’familji li fihom il-ġenituri tagħhom kienu jenfasizzaw l-iżbalji minflok is-suċċessi. Jekk dan hu minnu fil-każ tiegħek, se jkollok bżonn tagħmel sforz kontinwu biex tibni l-fiduċja taʼ ibnek fih innifsu. Kif tistaʼ tagħmlu dan? Luca, ikkwotat qabel, jaħdem regolarment maʼ ibnu Manuel, li għandu 15-il sena, hekk kif jagħmlu l-faċendi fid-dar. “Kultant,” jgħid Luca, “lil Manuel ngħidlu biex jibda biċċa xogħol waħdu u li se ngħinu jekk ikollu bżonni. Ġeneralment, ilesti x-xogħol waħdu. Is-suċċessi tiegħu jagħtuh sodisfazzjon u jkabbrulu l-fiduċja fih innifsu. Meta jirnexxi, infaħħru. Meta ma jmurx tajjeb daqskemm xtaq, jien xorta ngħidlu li napprezza l-isforz tiegħu.”
Tistaʼ wkoll tkabbar il-fiduċja taʼ ibnek fih innifsu billi tgħinu jilħaq miri akbar f’ħajtu. Iżda, xi ngħidu jekk ibnek idum iktar milli tixtieq biex jilħaq il-miri? Jew xi ngħidu jekk il-miri tiegħu, għalkemm mhux ħżiena, ikunu differenti minn dawk li kont tagħżel int għalih? F’dan il-każ, forsi jkollok bżonn tirrivedi dak li tistenna minnu. Jacques, ikkwotat qabel, jgħid: “Nipprova ngħin lil ibni jagħmel miri li jistaʼ jilħaqhom. Imma nipprova wkoll inkun ċert li huma l-miri tiegħu, mhux tiegħi. Imbagħad infakkar lil nnifsi li għandu bżonn jirsisti biex jilħaq il-miri tiegħu bil-pass tiegħu stess.” Jekk tagħti widen għall-opinjonijiet taʼ ibnek, tfaħħru għal dak li jagħmel sew, u tinkuraġġih biex jegħleb il-fallimenti tiegħu, tkun qed tgħinu jilħaq il-miri tiegħu.
Realistikament, ir-relazzjoni tagħkom se jkollha l-problemi u l-isfidi tagħha. Imma fl-aħħar mill-aħħar, ibnek x’aktarx li se jkun irid jibqaʼ qribek. Wara kollox, min ma jixtieqx li jibqaʼ qrib xi ħadd li jgħinu jirnexxi?
[Nota taʼ taħt]
a Waqt li dan l-artiklu jiffoka fuq ir-rabta unika bejn il-missirijiet u l-ulied subien, il-prinċipji diskussi japplikaw ukoll għar-relazzjoni bejn il-missirijiet u l-ulied bniet.