Ngmekerang e Sebechir a Rechedam el Melemolem el Kmes a Deleongel er Tir me a Rengelekir el Sechal?

“BAPA, ke milekerang e mo medengei a kmal betok el tekoi?” Ngmla ta el mkora kibetiekl er a ngelekem el sechal a loker er kau er tia el ker? Seikid el taem, e ke locha kmal mlo dmeu a rengum el chedam. Nguaisei, engdi a lsekum a ngelekem a uleltaut a mellomes el omellach er kau e dirrek el ngilai a klungiolel er ngii, e ngulterekokl el kmal mo uchul a klou el deuil a rengum. *​—Osisechakl 23:15, 24.

Chelsel aika el mereko el rak, e ngdirk sebechem el mesang a klemeriarreng er a ngelekem el sechal el kirem? Me a lechub e chelecha el lorael el mo klou, e ngmerael tia el klemeriarreng er ngii el kirem el mo kekerei? Ke mekerang e sebechem el melemolem el kmeed er a ngelekem er chelecha el lorael el mo klou el chad? A kot e bo domes a bebil el omelsemai el sebechel a chedam el mo chelebangel.

Edei el Omelsemai el Blechoel el Ngar er Ngii

1. DIAK A TAEM: Ngar er a chelsel a betok el beluu, e a rechedam a mengereker a betok el kirel a telungalek er tir. Oumesingd el taem, e aike el urerir a mo uchul e ngkirir el dibus er a blai el kemanget el taem er a chelsel a ta el sils. Ngar er a bebil er a beluu, e a rechedam a kmal di kedeb a temir el obengterir a rengelekir. A omerriter el mileketmokl er a beluu er a Furans, a miltik er ngii el kmo a rechedam a mengoit er a kesengil e ng 12 el bung er a ta el sils el omekerreu er a rengelekir.

AIKE EL KIREM EL OMDASU EL KIREL: Ngua ngera el ildisel a taem a omongoit el obengkel a ngelekem el sechal? Ngdiak el soam el omuchel er a chelsel aika el merael el mei el tang me a lechub e ngeru el sandei, el meluches a ildisel a taem el mongoit el obengkel a ngelekem el sechal er a bek el sils? Ke ulterekokl el kmal mo mechas a rengum er a ildisel.

2. DIAK A UNGIL EL KEREBAI: A rebebil el chad a dimlak a ungil el deleuill er tir el obengterir a redemerir. A Jean Marie el kiei er a beluu er a Furans a melekoi el kmo: “Ngdimlak ki blechoel el chadecheduch ngak me a demak.” Me tiang ngerang rirellii er a Jean Marie? Ngmelekoi el kmo: “Tiang a mla mo uchul a betok el mondai el dimlak kumdasu el kmo ngsebechel el mo er ngii. El uai tiang, ak metik er ngii el kmo ngmeringel er ngak el mengedecheduch er a rengelekek el sechal.” E a rekuk bebil er a rechad a kmal ungil el medengelterir a redemerir, engdi ngmekngit a deleuill er tir. A Philippe el 43 a rekil a melekoi el kmo: “A demak a mle meringel er ngii el olecholt er a bltkil a rengul el bedul ngak. Me tiaikid a uchul me ngkirek el meringel el oureor el mo olecholt er a bltikerreng el mo er a ngelekek el sechal.”

AIKE EL KIREM EL OMDASU EL KIREL: Kau, ke kongei el kmo a deleuill er kau el obengkel a demam a ngar er ngii a lerellii er a omerellem el mo er a ngelekem el sechal? Omomtab er kau, e a omerellem ngoltirakl a ungil me a lechub e ngmekngit el omerellel a demam? Ngokiu a ngera el rolel?

3. DIAK A UNGIL E TABESUL EL ULEKLATK: A bebil er a siukang a omes er a ngerechelel a chedam el omekeroul er a rengelekel el ua lak el sal klou a ultutelel. A Luca el mlukeroul er a ta er a beluu er a Western Europe  a melekoi el kmo: “Ngak a mlukeroul er a chelsel a basio el uleba uldasu el kmo a okurulir a rengalek a di urerir a rebechiil el redil.” E a kuk bebil er a siukang a melisiich er a rechedam el di mo chad er a omellach e merekong. El uai tiang, a George el mlukeroul er a chelsel a ta er a beluu er a Africa a melekoi el kmo: “A siukang er a beluak a melisiich er a uldasu el kmo a rechedam a diak el kirir el milil el obengterir a rengelekir, e le ngsebechel el rulleterir el mo diak a klisichir el mengedereder. Me ngblechoel el meringel er ngak el oldeu er a renguk el milil el obengkel a ngelekek el sechal.”

AIKE EL KIREM EL OMDASU EL KIREL: Ngera el ngerachel a kirir a rechedam el meruul er a chelsel a beluam? Te mosisechakl el mo omdasu el kmo a okurulir a rengalek a di urerir a redil? Te mosisechakl el mo meruul a ungil e oubltikerreng el mo er a rengelekir el sechal, me a lechub e ngkmal mekull el diak el kirir el meruul el uaisei?

Ke mo mekerang a lsekum e ke chedam el chelebangel er a tang me a lechub e ngbetok er aika el omelsemai? Ka momtab aika el ulekrael.

Momuchel Sel Ledirk Lekekerei a Ngelekem el Sechal

A rengalek el sechal a mechell el ngar er ngii a urungulir el sorir el mesuub el mo ua demerir. Me chelecha el dirk lekekerei a ngelekem, e bo mungil el ousbech er tia el techall el mekurulii a urungulel el soal el mo uai kau. Ngmekerang a omoruul el uaisei? E oingerang e ngungil el taem el mobengkel a ngelekem?

Bo blechoel el dmak kau me a ngelekem el meruul a tekoi er a bek el sils. El uai tiang, sel omoruul a urerem er a blai e becherei me lolengeseu er kau. Bsang a kekerei el oriik me a lechub a sebel me lousbech er ngii. Ngulterekokl el mo ungil a rengul el olengeseu er a demal, el ngii a lomes er ngii el ua kot el mesisiich el chad e dirrek el ungil el kerebai! Nglocha mo meoud el meketmokl a ureor, engdi tia el omeruul a kmal mo smisichii a deleuill er kemiu el terung, e dirrek el osisecheklii el mo meduch el meruul a ureor. A ngar er a mong el taem, e a Biblia a millisiich er a rechedam el mo obengterir a rengelekir el meruul a ureor er a bek el sils, e mo ousbech er tia el taem el mengedecheduch er a rengelekir e olisechakl er tir. (Duteronomi 6:6-9) E tiang a ungil el uleklatk el kired er chelecha el taem.

Ngdiak di moureor el obengkel a ngelekem el sechal e lemerekong, e ngdirrek el ungil a moterekokl a temem el milil el obengkel. A omilil a diak di letechall el mo oldeu a rengud e lemerekong. A omesuub a ochotii el kmo a rechedam sel loilil el obengterir a rengelekir, e te melisiich er a rengelekir el mo semeriar el meruul a tekoi e dirrek el mo bekeu.

A omilil er a delongelel a chedam me a ngelekel el sechal a dirrek el klou a lerellii. A Michel Fize el chad el merriter a tekoi a melekoi el kmo: “Ngoeak a omilil, e ngsebechel a ngalek el mo ungil el kaodengei ngii me a demal.” Sel ledak el milil, e a chedam a sebechel el olecholt er a klou el bltkil a rengul el mo er a ngelekel el okiu a tekingel me a omerellel. E sel loruul el uaisei, e ngosisecheklii a ngelekel el sechal el dirrek el mo olecholt a bltikerreng. A Andre, el chedam el kiei er a beluu er a Dois a melekoi el kmo: “Sera ledirk el kekerei a ngelekek el sechal, e aki mle blechoel el dmak el milil. Ak mle blechoel el omechull er ngii, me ngmlo meduch el olecholt er a bltkil a rengul el mei er ngak.”

A temel a cheliuaiu a ta er a ungil el taem el sebechel a chedam el melisiich er a bltikerreng er a delongelel ngii me a ngelekel el sechal. Bo blechoel el menguiu a cheldecheduch el mo er ngii, e morrenges er ngii sel louchais aike el mlo uchul a deuil a rengul me aike el mle suebek a rengul er ngii er sel sils. Sel omoruul el uaisei, e ke rullii el mo beot er ngii el melemolem el mengedecheduch er kau sel lorael el mo klou el chad.

Molemolem el Osiik Aike el Tekoi el Mdul Semeriar er Ngii

A rebebil el ngeasek el sechal a locha diak el sorir sel lolasem a redemerir el mengedecheduch er tir. Me a lsekum a ngelekem a mo melasem el chemiis el diak el soal el longer a kerim, e lak momdasu el kmo ngdiak el soal el mengedecheduch er kau. Nglocha mo kongei el orrenges er kau a lsekum ke melodech er a rolel a omongedecheduch er ngii.

A Jacques, el chedam el kiei er a Furans a metik er ngii el kmo a lebebil er a taem, e ngmeringel er ngii el mengedecheduch er a ngelekel el sechal el Jerome. Engdi ngdimlak lorrimel er a ngelekel el mo mengedecheduch, e ngbai ngildechii a rolel a longedecheduch er ngii, el oeak a bo lousekool a soccer el obengkel. Ngmelekoi el kmo: “Sel ki bo merek el exercise, e aki mo dengchokl er a chudel e olengull el telkib. Seikid el taem, e a ngelekek a mle blechoel el ouchais er ngak aike el ngar er a rengul. Me tia el blekeradel el di kemam el terung el dmak er sel taem, el diak a ngodech el chad el obengkemam, a mlo uchul e ngmlenga el mo kmes a deleuill er kemam.”

 E kuk mekerang a lsekum a ngelekem a diak el soal a sports? A Andre a dirk melatk aike el taem el ledilak ngii me a ngelekel el sechal el omes a btuch er a eanged. Ngmelekoi el kmo: “Aki ngmai a kingellam el mo er rikl sel leklebesei me aki dengchokl el mengard er a kelekolt e melekedek er kemam e melim a tea, e di omes er a eanged. Aki blechoel el mesaod el kirel Ngike el Ulemeob a btuch. E dirrek el mesaod a bebil er a tekoi el ki molatk. Aki milsaod a betok el tekoi.”​—Isaia 40:25, 26.

E kuk mekerang a lsekum ngdiak el soam el meruul a bebil er a tekoi el lesemeriar er ngii a ngelekem el sechal? A leuaisei e nglocha ungil a lak di molatk aike el tekoi el soam el meruul e lemerekong. (Filipi 2:4) A Ian el kiei er a South Africa a melekoi el kmo: “Ngak a kmal mle soak a sports e a ngelekek er a Vaughan a kuk diak. Ngmle soal a skoki me a computer. Me ak rirellak el mo semeriar aika el tekoi, me ak ulebang el mo er aike el osengelel a skoki e dirrek el uluusekool aike el klekool el ngar er a computer el kirel a skoki el obengkel. Ak melatk el kmo, kemam el dilak e dmeu a rengmam el meruul aika el tekoi a uchul, me a Vaughan a sebechel el beot er ngii el mengedecheduch er ngak el ouchais aike el soal el tekoi.”

Molisiich er Ngii el Mo Oba Ungil el Uldasu el Kirel

“Bapa, ka mesa tiang!” A ngelekem el sechal, ngmla ta el lolekoi er kau el uaisei e le ngmla suubii a beches el tekoi? Chelecha el bla bo lengeasek, e ngdirk melasem el osiik er a kengei er kau? Nglocha mla mo diak. Engdi ngkmal lousbech er a kengei er kau me bo el sebechel el mukeroul el mo ungil e melemalt el chad.

Ka molatk er a kerebai el lebilecherei a Jehovah el Dios el kirel a omerellel el mo er a ta er a rengelekel. A Jesus er a lebocha lomuchel el meruul er a ileakl el tekoi er a klengar er ngii er tia el chutem, e a Dios a ulechotii a bltkil a rengul el mo er ngii er a ledu el kmo: “Ngikang a betik ra renguk el Ngelekek, el odeuir a renguk.” (Matteus 3:17; 5:48) Ngklemerang el tekoi el kmo, ngngar er ngii a ngerechelem el mo mellach e olisechakl er a ngelekem el sechal. (Efesus 6:4) Engdi kau, ke dirrek el osiik a bek el techall el mo chemat er ngii el kirel aike el ungil el tekoi el lolekoi me aike el loruul?

A rebebil el chedam a metik er ngii el meringel er tir el chemat er a rengelekir e lolecholt er a bltkil a rengrir el mo er tir. Te locha mlukeroul er a delengchokl el rechad er a blirir a mle blechoel el melekoi a kngterir er a bai lechat er tir er a ungil el tekoi el lurruul. Me a lsekum e nguaisei, e ngkmal kirem el melasem el mo melisiich er a ngelekem el mo oba ungil el uldasu el kirel. Me ke mekerang a omoruul er tia el tekoi? A Luca el dulsaod er ngii er a uchei, a blechoel el loureor el obengkel a 15 a rekil el ngelekel el sechal el Manuel el meruul a ureor er a blai. Ngmelekoi el kmo: “A lebebil er a taem e ak dmu er a Manuel me ngmo muchelii a ureor e ngak a di mo olengeseu er ngii a lsekum e ngousbech a ngeso. Oumesingd el taem e ngsebechel el di ngii el kutmeklii a ureor. Ngmo ungil a rengul el omes er a ureor el lekiltmeklii el kmal ungil. Me sel lerellii a urerel el mo ungil, e ak chemat er ngii el kirel. Me sel kuk lak leketmeklii a urerel el mo ua sel lulemdasu er ngii, me ngak a di chemat er ngii el kirel a blakerreng er ngii el meruul er a urerel.”

Ngdirrek el sebechem el melisiich er a ngelekem el sechal sel molengeseu er ngii el mo oltaut a meklou el turrekong er a klengar er ngii. E kuk mekerang a lsekum a ngelekem a meoud el oltaut a turrekong er ngii? Me a lechub a turrekong er ngii, alta e ngdiak el mekngit, a kuk ngodech er aike el mulemdasu el kmo ngkirel el meruul? A leuaisei, e ngkirem el mo melodech er a uldesuem. A Jacques el dulsaod er ngii er a uchei a melekoi el kmo: “Ak melasem el olengeseu er a ngelekek el mo meruul a turrekong el sebechel el loltaut. Engdi aike el loruul a turrekong er ngii, el diak el turrekong er ngak. E di ngak el omeklatk er ngak el kmo, ngngii a kirel el oureor me bo el sebechel el oltaut a turrekong er ngii el oltirakl er a ungil el temel.” Me a omkerekikl el orrenges a uldesuel a ngelekem el sechal, e mchat er ngii el kirel aike el lemeduch er ngii, e molisiich er ngii el mo outekangel a chelitechetul, e ke mo ngosuir el mo oltaut a turrekong er ngii.

Ngmera el tekoi, a deleuill er kemiu a ulterekokl el mo er ngii a mondai me a omelsemai er a chelsel. Engdi omerollel a taem, e ngulterekokl a ngelekem el sechal el mo soal el melemolem el olekeed er ngii er kau. E le ka di molatk, ngtecha el chad a chetil el mo kmeed er a chad el ngii a kmal semeriar el olengeseu er ngii el mo ungil er aike el tekoi el loruul?

[Footnote]