Ino ty Hagnampe o Raeo Hifandrambe Soa amy ty Ana’e Lahilahy?

“AKORE ty nahaia i Baba izay?” Va’e fa nirehake hoe izay tama’o i ana-dahi’oy. Va’e mba nirehareha kede zay rehe tamy izay. Faie azo antoke fa tena nifale rehe naho fa nankatoave’e i torohevetse nimea’o azey sady nandrambe soa tamy izay reke. *​—Ohabolana 23:15, 24.

Faie mbe manahake ty taloha avao vao ty fihevera i ana-dahi’oy azo tie amy izao? Sa nanjare niova zay naho fa nihabey reke? Ino ty hagnampe anareo hifandrambe soa avao ndra tie fa mihabey aza reke? Andao heike tikagne handineke olagne tsiampeampe atrehe ty rae.

Olagne telo mateteke miseho

1. TSY MANAM-POTOAGNE: Amy ty tane maro, le i rangahey ty tena mampilitse vola an-tragno ao. Mateteke areke iareo tsy an-tragno ao agnate i tontolo androy noho ty asa’e. Zara’e naho mba miarake amy ty ana’e ty rae amy ty tane ila’e agne. Trea tamy ty famotopotoragne ta Fransa agne ohatse fa latsake ty 12 minitra isan’andro ty fotoagne iaraha o raeo amy ty ana’e.

SAINTSAIGNO ZAO: Lera fire eo ho eo ty mba iaraha’o amy i ana-dahi’oy? Amy heregnandro ndra tapa-bolagne ho avio, le sorato ty fotoagne lani’o iarahagne ama’e. Va’e tsy hampino azo ty raha hosorate’o.

2. TSY NISY NAGNOMEY MODELY: Tsy le nifandrambe tamy ty lahilahy ila’e ty rae’e tie taloha. Hoe ty Jean-Marie, a Fransa agne: “Tsy le niarake tamako ty Babako.” Ino ty voka izay tama’e? Hoe reke: “Niterake olagne tsy nampoizeko zay. Manjare sarotse amako ohatse tie amy izao ty mirehake raha mahaliagne amy i ana-dahiko rey.” Misy ka ty mba mahafantatse soa i baba’e avao, faie tsy mifandrambe soa ama’e sasa. Hoe ty Philippe, 43 taogne: “Tsy mba naneho hatea tamako ty Babako tie taloha, le manjare sarotse amako ka ty maneho hatea amy i ana-dahikoy tie amy izao.”

SAINTSAIGNO ZAO: Misy voka’e amy ty fifandrambesa’o amy i ana-dahi’oy vao ty nififandrambesa i baba’o tama’o? Ty toetse soa i Baba’o vao ty tsikombe’o sa ty toetse rati’e?

3. TSY MBA MAHAY MANORO HEVETSE: Tsy le heveregne ho lahibey ty andraiky ty rae amy ty fitezagne ty ana’e amy ty tane ila’e agne. Hoe ty Luca, nibey tamy ty tanàgne raike ta Eropa ahandrefagne agne: “Maro ty ndaty nihevetse ty ama’ay agne, fa asa o reneo ze o mikarakara ajaja zao.” Amy ty kolontsaigne hafa ka, le risihegne hasiake naho hanao didy jadogne avao o raeo, le izay. Nirehake ohatse ty George, nibey ta Afrika agne tie: “Tsy mba miarake mihisa amy ty ana’e zao ty rae ty ama’ay agne. Nao va’e hampihegne ty fahefagne anagna’e zao zay. Manjare tena tsy mba mahay miarake amy i ana-dahikoy raho tie amy izao.”

SAINTSAIGNO ZAO: Ino ty hevere o ndatio fa andraiky ty rae tie ama’areo agne? Hevere iareo fa asa o reneo avao vao ty fitezagne? Risihegne haneho hatea amy ty ana-dahi’e vao o raeo sa hevere o ndatio ho tsy azo atao zay?

Ino ty azo’o atao naho rae rehe le manjò azo ty raike ndra ty maromaro amo o olagne rehoe? Dineho ty soso-kevetse retoagne:

Miaraha ama’e amy ireke mbe kedey

Fa fagniriagne agnate o anake lahilahio ao ty mangalake tahake an-drae’e. Hararaoto areke zay, amy ireke mbe kedey. Akore ty hanoagne izay, sady ombia rehe ro afake miarake ama’e?

Ampandrambeso anjara amy ty raha atao’o i ana-dahi’oy naho mbe azo atao. Naho manao raharaha ohatse rehe, le ampagnampeo azo reke. Meo famafa kedekede reke naho mamafa tragno rehe, ndra fangaly kedekede naho mamboatse zaridaigne rehe. Azo antoke fa ho fale reke miara-miasa amy i modeli’ey. Va’e ho elaela i raha atao’oy vaho ho vita, faie manjare hitombo ty fifandrambesa’areo. Ho afake hagnampe aze hahay hinday ty tegna’e rehe tie amy izay. Nirisihe o Baibolio ty rae tie taloha mba hitaogne i ana’ey hiarake hanao ty raha fatao iareo andavanandro, le hagnararaotse izay mba hirehafagne naho hampianaragne iareo. (Deoteronomia 6:6-9) Mbe mahasoa avao ze torohevetse zay hatrake amy izao.

Ankoatse izay, le manokagna fotoagne hiarahagne mihisa amy i ana’oy. Faie tsy tihoe mba hahazoagne fahafinaretagne avao ty anto’e ihisagne. Aseho o fikarohagneo fa manjare tsy matahotahotse naho tea miana-draha vaovao o ajajao naho fa miarake mihisa ama’e ty baba’e.

Mbe soa mandikoatse izay aza ty voka’e naho miara-mihisa amy i ana’ey ty baba’e. Hoe ty Michel Fize, mpikaroke: “Mirehake soa amy i baba’e o ajaja lahilahio naho fa miarake mihisa iareo.” Afake maneho hatea i ana’ey amy ty rehake naho ty atao ty baba’e amy i fotoagne rey. Mampianatse i ana’ey haneho hatea ka reke amy izay. Hoe ty André, an’Alemaigne agne: “Niarake nihisa avao zahay amy i ana-dahikoy tamy ireke mbe nikedey. Namihigne aze raho, le mba nianatse naneho hatea ahy ka reke.”

Afake magnamafe ty fifandrambesa’e amy i ana-dahi’ey ka ty baba’e, aloha ty hiroroa iareo. Amakio tantara avao ohatse reke. Tsanogno ka reke naho fa mitantara ty hafalea’e ndra ty raha manahiragne aze tagnate i androy. Naho manao izay rehe, le hirehake ama’o avao reke ndra tie fa mihabey aza.

Miaraha avao manao ty raha tea’areo

Tsy te hirehake ty ajaja ila’e ndra tie mikezake mirehake ama’e aza ty baba’e. Naho magnontane aze ohatse rehe, faie hoe mipay fomba hialagne avao zay reke, le ko le avy le mihevetse tie tsy te hirehake reke. Va’e hirehake avao reke naho fa ovà’o ty fomba irehafa’o ama’e.

Trea i Jacques, a Fransa agne, fa sarotse kindraike ty mirehake amy i Jérôme, i ana-dahi’ey. Faie tsy sinere’e hirehake reke, fa novà’e ty fomba nagnatogna’e aze, le niarake nihisa laboly tama’e reke. Hoe ty Jacques: “Niarake nipetrapetrake naho nangalake aigne tamy i bozakey teo zahay naho fa boake nihisa. Nirehake ty tam-po’e tao i anakoy tamy i fotoagne rey. Naho ty heveko, le fanta’e fa aze raike raho amy i fotoagne rey. Izay ty tena nampifandrambe bey anay.”

Akore naho tsy tea sporo i ana’oy? Tsiaro i André avao ty fotoagne niaraha iareo amy i ana’ey nandineke o kintagneo. Hoe reke: “Nipetrapetrake tamy ty seza tan-tokotane teo zahay tamy i halegne manintsinintsỳ. Nanao nafana soa zahay sady ninogne dité sady nandineke i lagnitsey. Nirehake ty miomba i Mpamorogne i kintagney zahay. Nirehake ty miomba ty fiaigna’ay manokagne ka zahay. Fa ho nitsitsike nifampirehafa’ay iaby ze kila raha.”​—Isaia 40:25, 26.

Faie akore naho tsy tea’o ty raha ila’e mahaliagne i ana’oy? Mila mandefetse rehe naho izay. (Filipianina 2:4) Hoe ty Ian, Afrika Atimo agne: “Tena tea sporo raho faie tsy hoe izay ty Vaughan anako. Rapolany naho ordinatera ty mba nahaliagne aze. Nikezake ty ho liagne tamy irey ka areke raho. Nienteko nagnente fampisehoagne minday rapolany areke reke. Niarake nanao fihisagne minday rapolany tamy ty ordinatera ka zahay. Nanjare tsy nihafahafa tamako i anakoy naho fa nirehake, noho i raha nahafinaritse niaraha’ay rey.”

Ampeo hatoky tegna reke

“Henteo moa toy Baba!” Fa nirehake izay tama’o vao i ana-dahi’oy, naho fa nisy raha vaovao hai’e? Mbe mipay fankasitrahagne ama’o hoe izay vao reke ndra tie fa tanora aza? Va’e fa tsy manao izay sasa reke, faie tena ilae’e zay naho tea’o hanjare ndaty bey matotse reke.

Mba dineho moa ty fomba nifandrambesa i Jehovah Andrianagnahare tamy i ana’ey! Hanomboke hanao ty raha tena miambake tamy ty fiaigna’e tan-tane etoa ty Jesosy tamy izay. Hoe ty Jehovah tama’e: “Io i Anak’isoko sady ikokoakoy.” (Matio 3:17; 5:48) Maregne fa toko’e handilo sady hampianatse i ana’oy rehe. (Efesianina 6:4) Faie mba ankasitraha’o ka vao ty raha soa rehafe’e naho atao’e?

Sarotse amy ty lahilahy ila’e ty mankasitrake naho maneho hatea amy ty ana’e. Va’e nizatse nagninje avao ty rae aman-drene’e tie taloha fa tsy mba nidera aze. Naho izay ty raha niaigna’o, le mila mikezake mafe rehe mba hagnampe i ana’oy hatoky tegna. Amy ty fomba akore? Miarake manao raha avao ty Luca, i nirehafegne taloha teoy naho i Manuel ana-dahi’e 15 taogne. Hoe ty Luca: “Kindraike le ampanoveko raha irerike heike ty Manuel, le rehafeko reke tie hagnampe aze raho naho ilae’e. Mateteke ro vita’e raike avao i rahay sady afa-po naho matoky tegna reke. Deraeko reke naho fa mete ty raha natao’e. Faie naho fa tsy arake ty nieretsereta’e aze ty raha miseho le tsy vita’e soa i rahay, le mbe ampahafantareko aze avao tie ankasitrahako ty kezake natao’e.”

Afake magnampe ty ana’o hatoky tegna ka rehe naho magnampe aze hagnatratse tanjogne. Faie akore naho tsy tratse malaky arake ty nieretsereta’o aze i tanjogney? Akore naho tsy arake ty iteava’o aze ty tanjogne filie’e, ndra tie tsy raty aza? Mila mandefetse rehe amy izay. Hoe ty Jacques, i nirehafegne taloha teoy: “Mikezake magnampe ty anako hanagne tanjogne azo tratraregne raho. Faie ataoko azo antoke ka fa tanjo’e i rahay fa tsy tanjoko. Tadidieko avao naho fa avy eo fa mila mikezake magnatratse i tanjogney arake ze fahaia’e reke.” Magnampe ty ana’o hagnatratse i tanjo’ey rehe naho mitsanogne ty heve’e sady midera ty raha soa vita’e sady mandrisike aze handrese olagne.

Ie aloha va’e hisy olagne avao ty fifandrambesa’areo! Faie manjare ho tea i ana’oy ty hiarake ama’o naho fa ela ty ela. Toe ia ka moa ty tsy tea hiarake amy ty ndaty hagnampe aze hahatomombagne ty raha atao’e amy ty fiaignagne?

[Fagnamarehagne ambane peje]