Olsem Wanem Ol Papa i Ken Pas Gut Wantaim Pikinini Man Bilong Ol?

“PAPA, hau na yu save gut tru long mekim ol samting?” Ating pikinini man bilong yu i bin givim kain askim olsem long yu? Long dispela taim, ating yu amamas long i stap papa, a? Tasol sapos pikinini i mekim narapela samting moa​—⁠sapos em i bihainim ol skultok bilong yu na dispela i helpim em​—⁠ating bai yu amamas moa yet. a​—⁠Sindaun 23:​15, 24.

Nau taim pikinini man i kamap bikpela pinis, em i amamas yet long yu na tingim yu olsem gutpela piksa em i ken bihainim? O em i no tingim yu moa? Olsem wanem yu ken pas gut yet wantaim em taim em i kamap bikpela man? Orait pastaim yumi ken toktok long sampela hevi i save painim ol papa.

Tripela Hevi

1. I NO GAT TAIM: Long planti kantri, ol papa yet i save wok mani bilong lukautim famili. Planti ol i mas i stap long ples wok long de olgeta. Long sampela hap, ol papa i no save stap tumas wantaim ol pikinini bilong ol. Wanpela wok painimaut long Frans i kamapim olsem long olgeta wan wan de ol papa i save lusim liklik hap taim tasol, olsem 12-pela minit, long lukautim ol pikinini bilong ol.

SAMTING BILONG TINGIM: Yu save lusim hamas taim wantaim pikinini man bilong yu? Insait long wanpela o tupela wik, raitim hamas minit o aua yu lusim long toktok o mekim ol samting wantaim em long olgeta de. Ating bai yu kirap nogut long hamas taim yu bin lusim long mekim olsem.

2. I NO STAP GUTPELA PIKSA: Sampela man i no bin stap o toktok liklik wantaim papa bilong ol. Jean-Marie, long Frans, em i tok: “Mi no bin toktok o mekim ol samting wantaim papa bilong mi.” Dispela i bin mekim wanem long Jean-Marie? Em i tok: “Dispela i bin kamapim sampela hevi mi no bin ting bai kamap. Olsem: Mi save hatwok long toktok gut wantaim ol pikinini man bilong mi.” Long sampela famili, ol pikinini man i save gut long papa bilong ol, tasol ol i no save pas gut wantaim narapela narapela. Philippe, em i gat 43 krismas, em i tok: “Papa bilong mi i hatwok long tokaut olsem em i laikim mi o mekim sampela pasin olsem. Olsem na mi mas subim skin na wok strong long mekim gut long pikinini man bilong mi na soim em olsem mi laikim em tru.”

SAMTING BILONG TINGIM: Yu pilim olsem pasin papa i bin mekim long yu i stiaim pasin yu mekim long pikinini man bilong yu? Yu lukim olsem yu wok long bihainim ol gutpela pasin o pasin nogut bilong papa bilong yu?

3. I NO GAT GUTPELA SKULTOK: Sampela lain i ting papa i no gat wok long mekim bikpela long ol pikinini. Luca, em i kamap bikpela long Westen Yurop, em i tok: “Long ples bilong mi, ol man i  ting em wok bilong mama long lukautim ol pikinini.” Na long sampela kantri, ol man i ting wok bilong ol papa em bilong bosim strong ol pikinini, na em tasol. George i bin kamap bikpela long Afrika, em i tok: “Long ples bilong mi, ol papa i no save pilai wantaim ol pikinini bilong ol, nogut dispela i daunim wok bos bilong papa. Olsem na mi hatwok long kisim amamas long i stap na toktok wantaim pikinini man bilong mi.”

SAMTING BILONG TINGIM: Long hap bilong yu, ol papa i gat wanem wok? Ol i bin lain olsem em i wok bilong ol mama long lukautim ol pikinini? Ol papa i redi long soim pasin laikim long pikinini o ol i surik long mekim olsem, long wanem, ol man i luk daun long dispela pasin?

Sapos yu wanpela papa i gat kain hevi olsem, orait olsem wanem yu inap winim ol dispela hevi? Tingim ol dispela tok i stap daunbilo.

Skulim Pikinini Man Taim Em i Liklik Yet

Oltaim ol pikinini man i save laik bihainim pasin bilong papa bilong ol. Olsem na taim pikinini man i liklik yet, mekim wok long dispela laik bilong em. Yu ken mekim olsem wanem? Na yu ken stap wantaim pikinini long wanem ol taim?

Sapos inap, larim pikinini tu i insait long ol wok yu save mekim long olgeta de. Olsem: Sapos yu mekim sampela wok long haus, singautim em long helpim yu. Givim wanpela brum o liklik savol long liklik pikinini man bilong yu. Ating em bai amamas tru long wok wantaim papa bilong em husat i stap olsem gutpela piksa long em! Tru, ating yu mas lusim sampela haptaim moa long pinisim wok bilong yu, tasol dispela bai helpim yu long pas gut wantaim pikinini, na yu skulim em long mekim ol wok. Long bipo yet, Baibel i bin tokim ol papa long wok gut wantaim ol pikinini long ol wok samting ol i mekim long olgeta wan wan de, na insait long dispela taim ol i ken toktok gut wantaim ol pikinini na skulim ol. (Lo 6:​6-9) Dispela tok i stret tu long bihainim long taim bilong yumi.

Na tu, makim haptaim bilong pilai wantaim pikinini. Tru, pilai em i rot bilong kisim amamas wantaim, tasol em i gat narapela wok tu. Wanpela wok painimaut i soim olsem, taim papa i pilai wantaim ol liklik pikinini bilong em, dispela i save kirapim ol pikinini long traim ol narapela narapela samting na ol i no pret long mekim.

Na taim papa na pikinini man i pilai wantaim, dispela i mekim wanpela bikpela samting. Man bilong skelim dispela, em Michel Fize, i tok: “Long rot bilong pilai, pikinini man i save toktok gut wantaim papa bilong em.” Taim ol i pilai, papa inap kamapim pasin laikim bilong em long pikinini long ol tok bilong em na ol samting em i mekim. Long dispela rot em i skulim pikinini tu long kamapim pasin laikim bilong em. André, em wanpela papa i sindaun long Jemani, i tok: “Taim pikinini man bilong mi i liklik yet, planti taim mipela i save pilai wantaim. Mi save holimpasim em na em i lain long mekim wankain pasin laikim long mi.”

Taim bilong slip tu em taim bilong papa i ken strongim pasin laikim namel long em na pikinini man. Long olgeta nait, ritim wanpela stori long em, na putim yau taim em i toktok long ol amamas na wari bilong em long dispela de. Sapos yu mekim olsem, em bai i no lusim pasin bilong toktok gut wantaim yu taim em i kamap bikpela.

Mekim Ol Samting Yutupela i Laikim

Sampela pikinini man em ol i tineja, ating ol i no pilim pasin bilong papa long traim toktok wantaim ol. Sapos i luk olsem pikinini man bilong yu i wok long abrusim ol askim bilong yu, orait no ken ting olsem em i no laik toktok wantaim yu, nogat. Sapos yu senisim pasin bilong yu long toktok wantaim em, ating em bai orait long mekim sampela tok.

Jacques, em wanpela papa long Frans, sampela taim em i hatwok long toktok wantaim pikinini man bilong em, Jérôme. Tasol em i no subim pikinini long toktok wantaim em, nogat, em i traim narapela rot​—⁠em i pilai soka wantaim em. Em i tok: “Taim mipela i pilai pinis, mipela i save sindaun long gras na malolo liklik. Planti taim pikinini i save kamapim tingting bilong em long dispela taim. Mitupela i stap wantaim, na no gat narapela i stap, na mi ting dispela i mekim mitupela i pas gut wantaim.”

Olsem wanem sapos pikinini bilong yu i no laikim spot? André i tingim bek ol haptaim em i bin lusim bilong stap wantaim pikinini bilong em long lukim ol sta long nait. André i tok: “Mipela i  save putim tupela sia ausait long taim bilong kol na pasim blanket long skin, na holim wanpela kap ti long han na lukluk antap long skai. Mipela i save toktok long Man i bin wokim ol sta. Na mipela i toktok tu long ol samting bilong mipela yet. Mipela i save toktok long olgeta samting.”​—⁠Aisaia 40:​25, 26.

Olsem wanem sapos yu no laik mekim ol samting pikinini bilong yu i laik mekim? Sapos olsem, ating yu mas lusim sampela laik bilong yu na mekim samting em i laikim. (Filipai 2:⁠4) Ian, i sindaun long Saut Afrika, em i tok: “Mi save laikim spot, tasol pikinini man bilong mi Vaughan, em i no laikim tumas spot. Em i save laikim ol balus na kompiuta. Olsem na mi lain long laikim ol dispela samting tu, na mi kisim em i go lukim ol so bilong balus na mekim pilai long kompiuta long draivim ol samting olsem balus. Mi ting dispela pasin bilong kisim amamas wantaim i bin helpim Vaughan long toktok gut wantaim mi long ol samting.”

Strongim Bel Bilong Em

“Papa, lukim!” Olsem wanem? Sampela taim liklik pikinini man bilong yu i bin singaut olsem long yu taim em i lain long mekim wanpela nupela wok? Sapos nau em i bikpela mangi pinis, em i save soim yet olsem em i laik bai yu ken amamas long em? Ating nogat, a? Tasol yu mas wok yet long tok amamas long ol wok bilong em, na taim em i kamap bikpela man em bai i gat stretpela tingting long ol samting.

Tingim pasin Jehova yet i bin mekim long pikinini bilong em. Taim Jisas i laik kirap mekim wanpela bikpela wok hia long graun, God i tokaut olsem em i laikim tumas pikinini bilong em, em i tok: “Dispela em i Pikinini bilong mi, mi laikim em tumas na mi amamas long em.” (Matyu 3:17; 5:48) Tru, yu gat wok long stretim na skulim pikinini bilong yu. (Efesus 6:⁠4) Tasol yu save painim rot bilong kamapim long pikinini olsem yu amamas long ol gutpela tok na pasin em i mekim?

Sampela man i hatwok long kamapim long pikinini olsem ol i amamas long em na laikim em. Ating ol i bin kamap bikpela insait long famili em papamama i save toktok planti long ol popaia bilong ol na i no long ol gutpela wok bilong ol. Sapos yu bin kamap bikpela long kain famili olsem, orait yu mas wok strong long helpim pikinini long amamas long em yet. Yu ken mekim olsem wanem? Luca i save wok wantaim pikinini man bilong em Manuel husat i gat 15 krismas, long mekim sampela wok bilong haus. Luca i tok: “Sampela taim mi tokim Manuel long kirapim wanpela wok, na mi bai helpim em sapos em i no inap pinisim. Planti taim em yet i save mekim. Taim em yet i mekim wanpela wok, em i save belgut na amamas long em yet. Taim em i mekim gut wanpela wok, mi save tok amamas long em. Taim wok bilong em i no kamap gutpela, mi save tokim em olsem mi amamas long em i bin traim.”

Yu ken strongim bel bilong pikinini moa yet sapos yu helpim em long winim ol mak em i bin putim. Tasol olsem wanem sapos em i no winim kwik ol mak ? O olsem wanem sapos ol mak em i laik winim ol i gutpela, tasol i no wankain long ol mak yu laik bai em i winim? Sapos olsem, ating yu mas skelim gen ol mak yu laik bai em i winim. Jacques, em yumi bin stori long em, em i tok: “Mi traim helpim pikinini bilong mi long winim ol mak em inap winim. Tasol mi was gut na bai ol dispela mak i bilong em yet na i no bilong mi. Na mi tokim mi yet olsem, em i mas wok long winim ol dispela mak long skel bilong em yet, olsem em inap mekim hariap o isi isi.” Sapos yu harim gut tingting bilong pikinini, na tok amamas long ol gutpela wok em i bin mekim, na strongim bel bilong em taim sampela wok i no kamap gutpela, bai yu helpim em long winim ol mak em i bin putim.

Tru, sampela taim i gat hevi i kamap na yutupela i no pas gut wantaim. Tasol bihain bai pikinini i gat laik long pas gut yet wantaim yu. Tru tumas, yumi olgeta i save amamas long i stap klostu long man i bin helpim yumi long winim ol mak, a?

[Futnot]