Come che un pare el pol seitar esser amigo de so fiol?

FURSI to fiol el te ga belche domandà: “Pupà, come feto saver tute queste robe?” E pol esser che te sì restà tanto orgolioso de esser un pare. Ma se to fiol el ga scoltà i to consili e dopo el ga bio boni resultadi, sicuro che te sì restà ancora pi contento. a — Proverbi 23:15, 24.

Ma col passar dei ani, sarà che to fiol el seita a gaver el stesso amor e rispeto par ti? Come che te pol seitar a esser amigo de to fiol intanto che lu l’è drio vegner grando? Prima, vedemo arquante dificoltà che un pare el pol infrontar.

Tre dificoltà che le pol suceder

1. MANCANSA DE TEMPO: In arquanti paesi, l’è el pare che el ga de laorar de pi tempo par mantegner la fameia. Tante volte lu el passa el giorno intiero fora de casa e in arquanti posti el pare el dopera poco tempo insieme de so fioi. Par esémpio, una peschisa fata nela Frància la ga mostrà che el pare el passa manco de 12 minuti cada giorno insieme de so fioi.

PENSAGHE SORA: Quanto tempo te passi insieme de to fiol? Cossa càtito de nela pròssima stimana o nele pròssime due stimane scriver do quanto tempo te stè insieme de to fiol cada giorno? Fursi te resti sorpreso col resultado.

2. NO TE GHÈ BIO UN BON ESÉMPIO: Arquanti òmini no i ga bio una amicìssia tanto forte col so pare. Jean-Marie , che l’è de star nela Frància, el ga dito: “Mi go bio poco contato col me pare. Mi no parlea tanto con lu. Questo ga fato vegner fora problemi che mi gnanca imaginea. Par esémpio, par mi l’è tanto fadiga discorer coi me fioi.” Ghen’è altri òmini che i cognossi ben el so pare, ma no i ga una amicìssia forte con lu. Philippe, de 43 ani, el ga dito: “L’era fadiga par el me pare mostrar che el me amea. Par quela, ancoi go de sforsarme tanto par mostrar che amo me fiol.”

PENSAGHE SORA: Te cati che la relassion che te ghè col to pare influensia la maniera che te trati to fiol? Ghen’è robe che te fè col to fiol, compagno a quel che to pare el fea con ti, sia bone o rugne? Che robe?

3. CULTURA: Arquante culture le insegna che el pare no’l ghe ocore partissipar tanto in slevar i fioi. Luca, che l’è stà slevà nte un paese dela Europa, el ga dito: “Ndove mi son stà slevà, le persone le pensa che tender dei fioi l’è robe de done.” Altre culture le dise che el pare sol el ga de esser cativo o firme coi so fioi. Varda el esémpio de George, che l’è stà slevà nte un paese dela Àfrica. Lu el ga dito: “Nela me cultura, el pare no’l giuga coi so fioi parché el ga paura che questo lo farà perder la autorità. Par quela, go sempre bio dificoltà de far robe sémplisse, come star insieme dei me fioi.”

PENSAGHE SORA: Ntel posto ndove te sì de star, cossa che se speta che un pare el fae? I òmini i impara che slevar i fioi l’è sol laoro de done? I ze insentivadi a mostrar amor ai fioi o i pensa che el pare no’l ga de farlo?

Se te ghè fioi e te infronti qualcheduna de queste dificoltà, come che te pol dàrghene fora? Vedi arquante sugestion.

Scomìnsia quando lori i ze ciei

De quando i ze nassesti, i toseti i vol far compagno a so pare. Alora, dopera ben questa oportunità intanto che to fiol l’è ancora cieo. Come che te pol farlo? E come far par torse el tempo par star insieme con lu?

Sempre che te pol, assa che to fiol el te giute. Par esémpio, se te ghè qualche laoro de far casa, domanda el so aiuto. Daghe una feramenta o qualcossa che lu el ga de bisogno par giutarte. Sicuro che lu el restarà tanto contento de laorar insieme col so pare. Fursi, lu el ghe mete un pochetin de pi par far el laoro, ma se te lo assi farlo, te sarè drio insegnar to fiol a esser un brao laorador e valtri saré ancora pi amighi. Tanto tempo indrio, la Bìblia la ga insentivà el pare a convidar i so fioi par far i laori e doperar questa oportunità par parlar con lori e insegnarghe. (Deuteronómio 6:6-9) Questo consìlio l’è bon par noantri ancoi.

Nantra roba che te pol far l’è torse el tempo de giugar col to fiol. Giugar no l’è sol una oportunità par goderse. Le peschise le mostra che quando el pare el giuga coi so fioi pìcoli, lu l’è drio giutarli a esser sicuri de far robe nove.

Ghen’è ancora altra rason de parché che l’è importante giugar coi fioi. El peschisadori Michel Fize el ga dito: “Quando el pare e el fiol i giuga insieme, el fiol el impara a comunicarse meio col so pare. Intanto che i ze drio giugar, el pare el pol mostrar che el ama so fiol par meso de quel che el dise e par meso de quel che el fà. Cossita, l’è drio insegnarghe a anca lu mostrar amor. André, un pare che l’è de star nela Alemagna el ga dito: “Quando me fiol l’era cieo, noantri giughéino tanto. Mi ghe dea struconi e lu el ga imparà a mostrar amor par mi .”

Nantra oportunità che el pare el pol doperar par far pi forte el so amor par el fiol, l’è pena prima de dormir. Ledi sempre una stòria par lu e scolta con atension quando lu el parla de quel che ghe ga sucedesto durante el giorno. Fursi lu el te parla dele robe bone e anca dele robe che lo assa preocupà. Se te fè cossita, sarà pi fàcile par el to fiol parlar con ti intanto che el vien grando.

Ndé in serca de quel che ve piase de far

Arquanti gióveni i par che no i ga tanta voia de parlar col so pare quando lu el proa comunicarse con lori. Se to fiol no’l risponde quel che te volarissi, no stà pensar che lu no’l vol ciacolar con ti. Se ti te cambi un pochetin la maniera de parlaghe, fursi lu el se sentirà meio de parlar con ti.

Jacques, un pare che l’è de star nela Frància, dele volte el catea difìcile parlar col so fiol Jèrôme. Invesse de proar obrigarlo a parlar con lu, lu el ga scominsià a giugar bola col so fiol. Lu el conta: “Dopo de giugar, noantri se sentéino do par tera par riposar un pochetin. Tante volte el me fiol el scominsiea a contar tuto quel che l’era drio sentir. Penso che quel che ga giutà a far pi forte la nostra amicìssia, l’è che lu el savea che podea passar tempo sol lu e mi.”

Ma se to fiol no’l ghe piase de sporte? Andrè el ga caro de pensar nel tempo che el ga passà col so fiol drio vardar le stele. Lu el ga dito: “De note, se sentéino fora casa quando l’era fredo. Noantri metéino su le querte e bevéino un sià par scaldarne e vardéino el cielo. Parléino sora Quel che el ga creà le stele, sora noantri e sora quasi tuto.” — Isaia 40:25, 26.

Pol esser che no te piase far arquante robe che el to fiol el ghe piase. Alora, te pol cambiar un pochetin la to idea e far una roba che no te piase tanto. (Filipensi 2:4) Ian, che l’è de star nela Àfrica del Sud el ga dito: “Me piasea tanto de sporte, ma me fiol Vaughan no tanto. Lu el ghe piasea de avioni e computadori. Par quela, son ndà in serca de cognosser de pi sora queste robe. Mi lo menea a presentassion de avion e dele volte doperéino un giugheto de avion nel computador. Penso che Vaughan el se sente ben de parlar con mi parché ghemo passà boni momenti insieme.”

Giuta el to fiol a sentirse sicuro de far le robe

“Varda pupà, varda!” To fiol el te ga belche dito qualcossa cossita quando el ga imparà a far una roba nova? Se lu l’è belche un toso, sarà che lu ancora el va in serca dela to aprovassion? Fursi nò. Ma sicuro che lu el gavarà bisogno dela to aprovassion par deventar un brao omo.

Varda el bel esémpio che Geovà Dio el ga dato quando Gesù el ga scominsià a far un laoro spessial qua ntela tera. Dio el ga mostrà che lo amea davanti a tante persone. Lu el ga dito: “Questo l’è el me fiol, el amado, quel che mi go aprovà.” (Mateo 3:17; 5:48) L‘è vera che ti te ghè de dissiplinar e insegnar to fiol. (Efesi 6:4) Ma sarà che te doperi le oportunità par mostrar che te piase dele bone robe che lu el dise e che el fà?

Par arquanti òmini l’è fadiga mostrar ai so fioi che ghe piase dele robe bone che i fà e mostrarghe amor. Pol esser che i so genitori i se consentrea de pi nei so sbali che nele robe bone che i fea. Se questo ga sucedesto con ti, te ghè de sforsarte par giutar to fiol a esser pi sicuro dele robe che el fà. Varda cossa che Luca, che ghemo parlà vanti, ghe piase de far insieme col so fiol Manuel, che el ga 15 ani. Lu el ga dito: “Dele volte ghe domando a Manuel de scominsiar a far un laoro lu sol e ghe digo che se el ga bisogno de aiuto, mi lo giuto. Quasi sempre, lu l’è bon de finir el laoro sensa el me aiuto. Quando questo sucede, lu el resta tanto contento, e mi lo lodo quando lu el fà polito. E quando lu no’l fà tanto ben quanto me piaseria, ancora cossita ghe digo che son restà contento che lu el se ga sforsà de farlo.”

Nantra roba che te pol far par giutar el to fiol a esser pi sicuro de quel che el fà l’è giutarlo a gaver ancora de pi ogetivi nela vita. Ma fursi lu el ghe mete de pi tempo de quel che te piaseria par rivar a questi ogetivi. O lu el vol far una roba che no l’è mia bruta, ma l’è difarente de quel che te piaseria che lu el fesse. Alora, pol esser che te ghè de cambiar de idea de quel che te speti del to fiol. Jacques, che ghemo parlà prima, el ga dito: “Proo giutar me fiol a gaver ogetivi che lu el sarà bon de rivarghe e anca vui che i so ogetivi i sia far quel che lu el vol, nò quel che mi vui. Dopo, me sforso par pensar che lu el ga el so tempo par rivarghe a questi ogetivi. Se te scolti quel che to fiol el pensa, se te lodi le so bone qualità e se ti lo incoraia a nò desister de far le robe che lu no l’è stà bon de far prima, te sarè drio giutarlo a rivarghe ai so ogetivi.

L’è normal che te gàpia qualche dificoltà col to fiol. Ma col tempo, lu el volerà seitar a esser to amigo. Sicuro che tuti i vol restar darente de quei che li giuta a gaver boni resultadi.

[Nota]