San̄a Kpere Abasi

Ndinam Ofụri Se Abasi Oyomde Inam

NDI akanam emekere m̀mê nso idi uduak uwem? Nte Jehovah okobotde nnyịn anam ikeme ndibụp utọ mbụme emi inyụn̄ inen̄ede iyom ibọrọ. Ndien imokop inemesịt etieti sia edima Abasi nnyịn mîkpọn̄ke nnyịn ubọk ubọk. Ibọrọ mbụme emi do ke Bible. Kere ban̄a ikọ Edidem Solomon ke Ecclesiastes 12:13.

Solomon ama okụt n̄kpọ etieti ke uwem. Ntre, enye ama ekeme nditịn̄ nte ikemede ndikop inemesịt ye se ikemede ndinam man uwem nnyịn enyene ufọn. Sia Abasi ama ọkọnọ Solomon uwak ọniọn̄ ye inyene onyụn̄ anam enye edidem, Solomon ama ekeme ndidụn̄ọde se mme owo ẹsiyomde, esịnede inyene ye uwọrọ iso. (Ecclesiastes 2:4-9; 4:4) Ekem, Abasi ama ọnọ enye odudu ndiwet se enye okodụn̄ọrede okụt, ete: “Utịt n̄kpọ emi edi: Bak ata Abasi nyụn̄ nịm mme ibet esie. Koro ofụri mbiomo emi owo enyenede edi emi.” Itien̄wed emi owụt mfọnn̄kan n̄kpọ emi owo akpanamde ke uwem.

“Bak ata Abasi.” Ndidọhọ ibak Abasi ekeme nditie nnyịn ntre ntre. Edi mbak enye emi idịghe ndịk. Enye itiehe nte mbak emi ofụn esibakde eteufọk esie emi ọsọn̄de ido, edi edi enye emi eyen esinyenede ọnọ edima ete esie oyom ndinem enye esịt. N̄wed kiet ọdọhọ ke mbak Abasi edi “uten̄e emi ikọt Abasi ẹten̄ede Enye sia ẹmade Enye ẹnyụn̄ ẹkponode Enye ke ntak akwa odudu Esie.” Utọ mbak emi esinam inyịme ndinam uduak Abasi sia imade enye inyụn̄ ifiọkde ke enye ama nnyịn nde. Se owo anamde owụt ke enye enyene utọ mbak emi, idịghe se enye ekerede. Didie?

“Nịm mme ibet esie.” Mbak Abasi esinam ikop uyo esie. Ndien ndikop uyo Jehovah owụt eti ibuot. Sia Abasi edide Andibot, enye ọfiọk mfọnn̄kan usụn̄ emi ikpodude uwem, ukem nte anam-ubomisọn̄ ọfiọkde mfọnn̄kan usụn̄ emi ẹkpekamade ubomisọn̄. N̄ko, Jehovah oyom n̄kpọ ọfọn ye nnyịn. Enye oyom ikop inemesịt, ndien mme ibet esie ẹdi ke ufọn nnyịn. (Isaiah 48:17) Apostle John ama etịn̄ aban̄a emi ete: “Ndima Abasi ọwọrọ ete nnyịn inịm mme ewụhọ esie; ndien mme ewụhọ esie idobike owo mbiomo.” (1 John 5:3) Mme ewụhọ Abasi ẹwụt ke enye ama nnyịn, ndien ndikop uyo Abasi owụt ke imama enye.

“Ofụri mbiomo emi owo enyenede edi emi.” Emi owụt ata akpan ntak emi anade ibak Abasi inyụn̄ ikop uyo esie. Se anade inam edi emi. Jehovah enyene nnyịn sia enye okobot nnyịn. (Psalm 36:9) Ntre, oyom ikop uyo esie. Edieke idude uwem nte enye oyomde, ọwọrọ imanam ofụri se enye oyomde inam.

Nso ndien idi uduak uwem emi? Ke nditịn̄ ibio ibio: Abasi okobot nnyịn man inam uduak esie. Ndien idụhe se ikpanamde ikan emi man uwem nnyịn ọfọn. Mbọk, yom usụn̄ kpep n̄kpọ en̄wen ban̄a uduak Jehovah ye nte afo ekemede ndidu uwem ekekem ye uduak emi. Mme Ntiense Jehovah ẹyekop inemesịt ndin̄wam fi.

Itie Bible emi okpokotde ke November:

◼ Mme N̄ke 22-31; Ecclesiastes 1-12–Ikwọ Solomon 1-8