Mangin Suod sa Dios

Pagtuman sang Aton Katungdanan sa Dios

NAPAMANGKOT mo na bala kon ano ang katuyuan sang kabuhi? Ginhatagan kita ni Jehova indi lamang sing ikasarang sa pagpamangkot sini kundi sing handum nga mahibaluan ang sabat. Ginabuligan kita sang aton mahigugmaon nga Dios nga makita ang sabat sa iya Pulong, ang Biblia. Binagbinaga ang ginsiling ni Hari Solomon sa Manugwali 12:13 (MB).

Pinasahi ang kahimtangan ni Solomon. Madamo sia sing masiling kon paano matigayon ang kalipay kag katuyuan sa kabuhi. Ginbugayan sia sing kaalam, manggad, kag awtoridad, gani nausisa niya sing maayo ang pagtinguha sang tawo, lakip ang paghandum sang manggad kag kabantugan. (Manugwali 2:4-9; 4:4) Dayon, sa bulig sang Dios nakahimo sia sing konklusion: “Sa tapos sini tanan, amo na lang ini ang akon masiling: Magkahadlok ka sa Dios, kag tumana ang iya mga sugo, kay amo ini ang bug-os nga katungdanan sang tawo.” Ginapakita sini ang pinakamakalilipay kag pinakadungganon nga mahimo sang tawo.

“Magkahadlok ka sa Dios.” Ang pagkahadlok sa Dios daw indi makagalanyat. Pero ini nga kahadlok indi negatibo. Indi ini pareho sa isa ka suluguon nga nahadlok sa iya mapintas nga amo, kundi sa isa ka bata nga gusto pahamut-an ang iya mahigugmaon nga amay. Suno sa isa ka reperensia, ang kahadlok sa Dios amo ang “pagtahod kag pagdayaw sang mga tawo sa Dios bangod ginahigugma nila Sia kag ginatahod ang Iya gahom kag pagkahalangdon.” Magapahulag ini sa aton nga tumanon ang kabubut-on sang Dios bangod ginahigugma naton sia kag nahibaluan naton nga ginahigugma niya kita. Ini nga kahadlok indi lamang isa ka balatyagon; makita ini sa buhat. Paano?

“Tumana ang iya mga sugo.” Ang kahadlok sa Dios magapahulag sa aton nga tumanon sia. Bilang aton Manunuga, nahibaluan niya ang pinakamaayo para sa aton, subong nga nahibaluan sang manughimo sang produkto kon paano gamiton sing maayo ang ila produkto. Si Jehova interesado sa aton. Gusto niya nga magmalipayon kita, kag ang iya ginapatuman para sa aton kaayuhan. (Isaias 48:17) Si apostol Juan nagsiling: “Ini ang kahulugan sang gugma sa Dios, nga tumanon naton ang iya mga sugo; apang ang iya mga sugo indi mabug-at.” (1 Juan 5:3) Ang pagtuman pamatuod sang aton gugma sa Dios, kag ang iya kasuguan pamatuod sang iya gugma sa aton.

“Ini ang bug-os nga katungdanan sang tawo.” Ginapakita sini kon ngaa importante nga kahadlukan kag tumanon ang Dios. Ini ang aton katungdanan. Si Jehova ang aton Manunuga, gani utang naton sa iya ang aton kabuhi. (Salmo 36:9) Kon nagakabuhi kita suno sa iya kabubut-on, ginatuman naton ang aton katungdanan.

Gani, ano ang katuyuan sang kabuhi? Sa simple nga sabat, nagakabuhi kita para himuon ang kabubut-on sang Dios. Ini lamang ang paagi para may katuyuan ang aton kabuhi. Ngaa indi mo pagtun-an sing dugang pa ang kabubut-on ni Jehova kag ipahisuno ang imo kabuhi sa sini? Nalipay ang mga Saksi ni Jehova nga buligan ka.

Bahin sang Biblia nga Mahimo basahon sa Nobiembre:

▪ Hulubaton 22–Ambahanon ni Solomon 8