¿TË NÄˈÄ mnayajtëyëty tiko të nmiˈinëm jukyˈäjtpë? Jyobaa të xymyoˈoyëmë madakën parë duˈun nnayajtëˈëwëm, per nanduˈun parë nnijäˈäjëm wiˈix yaˈˈatsoojëmbity. Ets dyoskujuyëm ko xytyuknijäˈäjëm mä Biiblyë diˈib yëˈë yˈAyukˈäjtypy. Min nˈokˈijxëm wiˈix ja rey Salomón tkujäˈäyë mä Eclesiastés 12:13.

Salomón myëdäjtë wijyˈäjtën parë tnimaytyäˈägët wiˈix mbäät njotkujkˈäjtëm ets tiko të nmiˈinëm yä Naxwiiny. Ojts yajmoˈoy mëjwiin kajaa wijyˈäjtën, mëkjäˈäyˈäjtën etsë kutujkën, pääty ojts yajxon tpayoˈoy tijaty tsyojkënyëˈäjttëbë naxwinyëdë jäˈäy, extëm ko jyantsy myëkjäˈäyˈatäˈändë ets myëjpëtsëmäˈändë (Eclesiastés 2:4-9; 4:4). Mët ko Dios wyinmäˈänymyooyë, ta duˈun dyajjëjpkejxy diˈibë nety të tpayoˈoy: “Duˈun jyëjpkexyë tyäˈädë maytyaˈaky, ko të yajmëdoodäˈäy: Tsëˈëgë Diosë tëyˈäjtënbë ets kuytyunë yˈanaˈamën. Yëˈko tyäˈädë yëˈë diˈib patëp ttunëdë naxwinyëdë jäˈäy”.

“Tsëˈëgë Diosë tëyˈäjtënbë.” Mbäät kyaj nˈoymyëdoˈojëmë tyäˈädë ayuk ko jyënaˈany tsëˈëgë Dios. Per yëˈë myaytyakypy tuˈugë tsëˈëgë oybyë. Kyaj yëˈëjëty extëm diˈib myëdäjtypy tuˈugë mosë ko dyajjotˈambekyë wyintsën, yëˈë tuˈugë tsëˈëgë extëm diˈib myëdäjtypy tuˈugë mixyuˈunk diˈib tyunaampy tijatyë tyeety tyukjotkëdakypy. Tuˈugë liibrë jyënaˈany ko yajtsëˈëgë Dios, yëˈë yˈandijpy ko “kyäjpn myëjˈixyëty ets wyintsëˈëgëdë mët ko tsyokëdë, ets ko yajwintsëˈëgë ja mëjˈäjtën ets ja madakën diˈib myëdäjtypy”. Pääty ko ntsëˈkëmë Dios, yëˈë xypyudëjkëm parë nduˈunëm tijaty tsyejpy mët ko ntsojkëm ets mët ko nnijäˈäjëm ko yëˈë nan xytsyojkëm. Etsë tyäˈädë tsëˈëgë kyaj jeˈeyë yajjawë, nan nigëxëˈkp mä tijaty nduˈunëm. ¿Wiˈixtsoo?

“Kuytyunë yˈanaˈamën.” Ko ntsëˈkëmë Dios, yëˈë xypyudëjkëm parë nmëmëdoˈojëm, ets oy ko duˈun nduˈunëm. Pes duˈun extëm tuˈugë jäˈäy nyijäˈäp wiˈix tyuny tijaty yajkojpy, nanduˈunë Jyobaa nyijäˈäp wiˈix mbäät mas oy njukyˈäjtëm, pes yëˈë të xyajkojëm. Tijaty xytyukˈanaˈamëm yëˈë parë ndukˈoyˈäjtëm, pes tsyejpy ets agujk jotkujk nˈijtëm ets kyaj parë axëëk njäjt ngëbajtëm (Isaías 48:17). Apostëlë Juan duˈun jyënany: “Ko ntsojkëm ja Dios, nguytyuˈunëmë naty yëˈë yˈanaˈamën. Es [...] kyaj mëk njäˈäjëm es nguytyuˈunëm diˈibë yëˈë xytyukˈanaˈamëm” (1 Fwank 5:3). Ko nmëmëdoˈojëmë Dios, ta nyaˈijxëm ko ntsojkëm ets ko xymyoˈoyëmë yˈanaˈamën, yëˈë mët ko xytsyojkëm.

“Tyäˈädë yëˈë diˈib patëp ttunëdë naxwinyëdë jäˈäy.” Extëm yä jyënaˈany, ¿tiko jyëjpˈamëty ntsëˈkëmë Dios ets nmëmëdoˈojëm? Yëˈko yëˈë xypyatëm nduˈunëm. Komë Jyobaa yëˈë të xyajkojëm, yëˈë jyaˈäjtypyë jukyˈäjtën (Salmo 36:9). Pääty patëp ets nmëmëdoˈojëm. Ko njukyˈäjtëm extëm yëˈë jyënaˈany, ta nguytyuˈunëm diˈib xypyatëm.

Pääty, ¿tiko të nmiˈinëm jukyˈäjtpë yä Naxwiiny? Jantsy adëyë yaˈˈatsoojëmbity: të nmiˈinëm parë nduˈunëm ti Dios tsyejpy. Nitii kyaduˈunëty extëm ko nduˈunëm diˈib mbäät xyajjotkujkˈäjtëm. ¿Mnijawëyaampy niˈigyë ti Jyobaa tsyejpy ets mjukyˈatäämp extëm yëˈë jyënaˈany? Mbäät mbudëkëtyë Jyobaa tyestiigëty.