Ia Mafuta Atu i le Atua

Faataunuuina o La Tatou Matafaioi i le Atua

PE NA iai se taimi na e mafaufau ai, i le māfuaaga na faia ai le tagata? Na aumaia e Ieova iā i tatou e lē gata o le tomai e faia ai na fesili, ae o le faanaunauga malosi foʻi e saʻili ai le tali. O le mea e lelei ai, ona ua tuu mai e lo tatou Atua alofa le avanoa e tatou te maua ai le tali. O loo i lana Afioga, le Tusi Paia le tali o loo tatou moomoo i ai. Seʻi mātau upu a le tupu o Solomona o loo i le Failauga 12:13.

Sa iai Solomona i se tulaga uigaese ona o mea sa tutupu i lona olaga, ma o le māfuaaga lenā na mafai ai ona ia fautua mai i le auala e maua ai le fiafia, ma se olaga aogā. Na mafai ona ia malamalama lelei i mea o loo tuliloa e tagata, e aofia ai le saʻilia o ʻoa ma le tulaga aloaʻia, ona sa faamanuiaina o ia i le tele o le atamai, matuā tamaoaiga, ma le pule tautupu. (Failauga 2:4-9; 4:4) O lea, ona o le fesoasoani a le Atua na ia taaofaʻi ai nei manatu i le faapea mai: “O le faaiʻuga lenei o mea uma ua faalogo i ai: Ia mataʻu i le Atua moni ma tausi i ana poloaʻiga. Auā o le matafaioi lea a tagata.” Ua faamatilatila mai i na upu le matuā tauia ma le tāua o taumafaiga a tagata.

“Ia mataʻu i le Atua moni.” I le taimi muamua, atonu e lē logolelei le manatu o le mataʻu i le Atua. Ae o lenei mataʻu o se uiga e iloa ai o loo lelei le loto. E tatou te lē ono mafaufau la i se pologa e fefe i le faia o se gaoioiga e ita ai lona matai sauā, nai lo o lea, ia mafaufau i se tamaitiiti e naunau e faafiafia le loto o lona tamā alofa. Ua taʻua i se lomifefiloi, o le mataʻu i le Atua, o le “faaaloalo loloto ma le migao lea e faaalia e Ona tagata talu ai e latou te alolofa iā te Ia, ma faaaloalo i Lona mana ma Lona tulaga silisili ese.” O lenā uiga e uunaʻia ai i tatou ina ia gauaʻi atu i le faia o le finagalo o le Atua ona o lo tatou alofa mo ia, ma e tatou te iloa e alofa mai o ia. O lenei mataʻu tatau e lē na o se faalogona, ae e faaalia i gaoioiga. E faapefea?

“Tausi i ana poloaʻiga.” O le mataʻu i le Atua e uunaʻia ai i tatou ina ia usiusitaʻi iā te ia. E ono ma tatau ona tatou usiusitaʻi iā Ieova. Talu ai o ia o Lē na faia i tatou, e na te silafia lelei la le auala sili e tatou te ola ai, e pei lava ona iloa lelei e se kamupani le auala sili e faaaogā ai oloa na gaosiaina. E silafia foʻi e Ieova le mea e sili ona lelei mo i tatou. E finagalo o ia ina ia tatou fiafia, ma na faia ana faatulagaga ina ia manuia ai o tatou olaga. (Isaia 48:17) Ua faapea mai le aposetolo o Ioane: “O le alofa lenei i le Atua, ia tatou tausi i ana poloaʻiga; ma e lē mamafa ana poloaʻiga.” (1 Ioane 5:3) O lo tatou usiusitaʻi ua faaalia ai lo tatou alofa mo le Atua, ma ua faailoa mai i ana poloaʻiga lona alofa mo i tatou.

“O le matafaioi lea a tagata.” Ua faamatilatila mai i nei upu se māfuaaga tāua e mataʻu ma usiusitaʻi ai i le Atua. O la tatou matafaioi ma o la tatou tiute tauave lea. Ua tatou nofo aitalafu iā Ieova ona o ia o Lē na faia i tatou. (Salamo 36:9) E tatau foʻi ona tatou usiusitaʻi iā te ia. E mafai ona faataunuuina la tatou matafaioi, pe afai e ola e tusa ai ma le auala e finagalo i ai o ia.

O le ā tonu la le māfuaaga na faia ai le tagata? O le tali tuusaʻo: Ina ia faia le finagalo o le Atua. E leai se isi auala e sili atu e maua ai se olaga aogā. E manaia pe a e suʻesuʻe atili e uiga i le finagalo o Ieova, ma le auala e ola ai ina ia ōgatusa ma lenā tulaga. E fiafia Molimau a Ieova e fesoasoani atu iā te oe.

Faitauga Tusi Paia mo Novema:

◼ Faataoto 22-31; Failauga 1-12–Pese a Solomona 1-8