Kon krosibei na Gado

Wi musu du san Gado wani

OITI yu aksi yusrefi a sani disi: ’Fu san ede wi de na libi?’ Boiti taki Yehovah meki wi na so wan fasi taki wi man poti na aksi disi, a meki wi nanga na angri fu kon sabi san na a piki. Koloku taki wi lobi-ati Gado e yepi wi fu feni a piki tapu na aksi dati. A piki di wi e angri fu kon sabi, de fu feni na ini en Wortu, Bijbel. Luku den wortu fu Kownu Salomo di skrifi na Preikiman 12:13.

Salomo na a yoisti sma di kan fruteri wi fa wi kan de koloku èn fu san ede wi de na libi. Fu di Gado ben gi en bun furu koni, furu gudu, nanga kownu makti, meki a ben kan ondrosuku finifini sortu sani libisma e suku fu abi, soleki gudu nanga biginen (Preikiman 2:4-9; 4:4). Nanga yepi fu santa yeye, a skrifi den sani di a ben kon sabi. A ben taki: „Now di mi taki ala sani kaba, a moro prenspari sani na disi: Lespeki a tru Gado èn hori den komando fu en, fu di dati na san libisma musu du.” Den wortu dati e sori san na den moro bun sani di wan sma kan du èn san o tyari den moro bun bakapisi kon gi en.

„Lespeki a tru Gado.” Te wan sma abi lespeki gi Gado, dan a e angri fu plisi en neleki fa wan pikin e angri fu plisi en lobi-ati papa. A lespeki di wi abi gi Gado e meki taki wi de klariklari fu du a wani fu en fu di wi lobi en èn fu di wi sabi taki a lobi wi. Wi e sori a lespeki dati nanga den sani di wi e du. Fa so?

„Hori den komando fu en.” Te wi e lespeki a tru Gado, dan dati e meki taki wi e gi yesi na en. A bun fu gi yesi na Yehovah. Leki Mekiman, a sabi san na a moro bun fasi fa wi musu libi, neleki fa wan sma di e meki sani sabi san na a moro bun fasi fu gebroiki den sani dati. Boiti dati Yehovah abi a bun fu wi na prakseri. A wani taki wi de koloku, èn den komando fu en na fu wi eigi bun (Yesaya 48:17). Na apostel Yohanes e taki en so: „Te wi lobi Gado, dan wi o hori den komando fu en. Toku den komando fu en no de wan hebi” (1 Yohanes 5:3). Te wi e gi yesi na Gado, dan wi e sori taki wi lobi en èn den komando fu en e sori taki a lobi wi.

„Dati na san libisma musu du.” Den wortu disi e sori krin fu san ede a prenspari fu lespeki Gado èn fu gi yesi na en. Wi de fruplekti fu du dati. Fu di Yehovah na wi Mekiman, meki wi musu de nanga tangi taki a gi wi libi (Psalm 36:9). Boiti dati, wi musu gi yesi na en. Te wi e libi soleki fa a wani taki wi musu libi, dan wi e du a wani fu en.

Sobun, fu san ede wi de na libi? Fu taki en krin: Wi de na libi fu du a wani fu Gado. Wan moro bun fasi fu libi no de. Fu san ede yu no e pruberi fu kon sabi moro krin san na a wani fu Yehovah èn fa yu kan libi soleki fa a wani? Yehovah Kotoigi o breiti fu yepi yu.

A bun fu leisi a pisi disi fu Bijbel na ini november:

◼ Odo 22-31; Preikiman 1-12–Singi fu Salomo 8