ʻUnuʻunu Ofi ki he ʻOtuá

Ko Hono Fakahoko Hotau Fatongia ki he ʻOtuá

KUO faifai ange peá ke fifili, ‘Ko e hā ʻa e taumuʻa ʻo e moʻuí?’ Kuo tokonaki ʻe Sihova kia kitautolu ʻo ʻikai ngata pē ʻi he malava ke ʻeke ha fehuʻi pehē kae pehē foki ki he fiemaʻu lahi ʻi loto, ke ʻiloʻi ʻa e talí. Ko e meʻa mālié, kuo ʻikai tuku kitautolu ʻe he ʻOtuá ʻi he fakapoʻulí. Ko e tali ʻoku tau fakaʻamu ki aí ʻoku ʻi heʻene Folofolá, ʻa e Tohi Tapú. Fakakaukau angé ki he ngaahi lea ʻa Tuʻi Solomone ʻoku ʻi he Koheleti 12:13, PM.

Ko Solomoné naʻe ʻi ha tuʻunga makehe. Naʻe lava moʻoni ke ne fakamatala ki he founga ʻe maʻu ai ʻa e fiefia mo e ʻuhinga ʻi he moʻuí. ʻI hono tāpuekina ʻaki ʻa e poto anga-kehe, koloa lahi fau, mo e mafai fakatuʻí, naʻá ne malava ai ke fai ha fakatotolo lelei ki he ngaahi ngāue ʻa e tangatá, ʻo kau ai ʻa e fekumi ki he koloá mo e tuʻu-ki-muʻá. (Koheleti 2:4-9; 4:4) Ko ia ai, ʻi he malumalu ʻo e fakamānavaʻi fakaʻotuá, naʻá ne fakanounou e meʻa naʻá ne ʻiló, ʻo pehē: “Ke tau fanogo ki he fakaoji oe gaahi mea kotoabe: Ke ke manavahe ki he Otua, bea ke fai ki he ene gaahi fekau: he oku katoa i he mea ni ae gaue totonu [‘fatongia,’ NW] ae tagata.” ʻOku fakanounou mai ʻe he ngaahi lea ko iá ʻa e feinga fakafiemālie taha mo māʻolunga taha ʻa e tangatá.

“Manavahe ki he Otua.” Ko e foʻi fakakaukau ʻo e manavahē ki he ʻOtuá heʻikai nai hā fakamānako ʻi he kamatá. Ka ko e manavahē ko ení ko ha hehema lelei ia ʻo e lotó. Te tau fakakaukau nai ʻo ʻikai ki ha tamaioʻeiki ʻoku ilifia ʻi hano fakaʻitaʻi ha pule anga-fefeka ka ko ha kiʻi leka ʻoku vēkeveke ke fakafiefiaʻi haʻane tamai ʻofa. ʻOku pehē ʻi ha tohi maʻuʻanga fakamatala ʻe taha ko e manavahē ki he ʻOtuá ko e “fakakaukau ia ʻo e fakaʻapaʻapa mo e māluʻia ʻoku fakahaaʻi ʻe Hono kakaí kiate Ia koeʻuhi ʻoku nau ʻofa kiate Ia pea tokaʻi Hono mālohí mo Hono lahí.” Ko ha fakakaukau pehē ʻokú ne ueʻi kitautolu ke fakamoʻulaloa ki he finangalo ʻo e ʻOtuá koeʻuhi ʻoku tau ʻofa kiate ia pea ʻoku tau ʻiloʻi ʻokú ne ʻofa ʻia kitautolu. Ko e manavahē lelei ko ení ʻoku ʻikai ko ha ongoʻi pē ia; ʻoku fakahāhā ia ʻi he ngaahi ngāue. ʻO fēfē?

“Fai ki he ene gaahi fekau.” Ko e manavahē ki he ʻOtuá ʻokú ne ueʻi kitautolu ke talangofua kiate ia. ʻOku ʻuhinga lelei ke fai kia Sihova ʻetau talangofuá. ʻI hono tuʻunga ko hotau Tokotaha-Ngaohí, ʻokú ne ʻiloʻi ʻa e founga lelei taha ke tau moʻui aí, hangē pē ko e ʻiloʻi ʻe ha tokotaha faʻu koloa ʻa e founga lelei taha ke ngāueʻaki ai ʻene koloá. ʻIkai ko ia pē, ʻoku tokanga mai ʻa Sihova kia kitautolu. ʻOkú ne loto ke tau fiefia, pea ko ʻene ngaahi fiemaʻú ʻoku fakataumuʻa ia ke pouaki ʻetau tuʻunga moʻuí. (ʻAisea 48:17) ʻOku fakalea peheni ia ʻe he ʻapositolo ko Sioné: “Ko e meʻa ʻeni ʻoku ʻuhinga ki ai ʻa e ʻofa ki he ʻOtuá, ko ʻetau tauhi ʻene ngaahi fekaú; pea ko ʻene ngaahi fekaú ʻoku ʻikai ke fakamafasia.” (1 Sione 5:3) Ko ʻetau talangofuá ʻoku fakahāhā ai ʻetau ʻofa ki he ʻOtuá, pea ko ʻene ngaahi fekaú ʻoku tapua atu ai ʻene ʻofa kia kitautolú.

‘Oku katoa i he mea ni ae fatongia ae tagatá.’ Ko e ngaahi leá ni ʻoku fakamamafaʻi ai ha ʻuhinga mahuʻinga ke manavahē ki he ʻOtuá mo talangofua kiate ia. Ko e fai peheé ko hotau fatongia ia, ko hotau ngafa. Ko Sihova ʻa hotau Tokotaha-Fakatupú, ko ia ʻoku tau moʻuaʻaki kiate ia ʻetau moʻuí tonu. (Saame 36:9) ʻOku tau toe moʻuaʻaki foki kiate ia ʻetau talangofuá. ʻI heʻetau moʻui ʻo hangē ko hono finangalo ke tau moʻui aí, ʻoku tau fakahoko ai hotau fatongiá.

Ko e hā leva ʻa e taumuʻa ʻo e moʻuí? Ko hono ʻai mahinó, ko eni ia: ʻOku tau ʻi hení ke fai ʻa e finangalo ʻo e ʻOtuá. ʻOku ʻikai ha toe founga lelei ange ke fakafonu ai hoʻo moʻuí ʻaki e ʻuhinga. Ko e hā ʻoku ʻikai te ke kumi lahi ange ai fekauʻaki mo e finangalo ʻo Sihová mo e founga ʻe lava ke ʻomai ai hoʻo moʻuí ke fehoanaki mo iá? ʻE fiefia ʻa e Kau Fakamoʻoni ʻa Sihová ke tokoniʻi koe.