Katalakatsuwini Dios

Katlawaw tuku kilitlawatkan nema Dios lakaskin

¿MINIT kilhtamaku akxni lakpuwanti tuku xlakata lamaw unu? Jehová ni kaj kinkatlawan xlakata tlan natlawayaw uma takgalhskinin, na kinkatlawan xlakata naputsayaw xtakgalhtin. Chu kilipaxtikatsinitkan pi ni kaj chuna kinkamakgxtakgni, wi tuku tlawalh xlakata nakatsiyaw tuku xlakata lamaw unu. Takgalhtin nema lhuwa tiku katsiputunkgo wi kBiblia. Kaʼakxilhwi tuku wa mapakgsina Salomón kʼEclesiastés 12:13.

Salomón lhuwa tuku xkgalhi wa xlakata tlan xlichuwinan tapaxuwan chu tuku xlakata lamaw. Xmaxkikanit lhuwa liskgalala, tumin, chu mapakgsina xwanit, wa xlakata tlan liwana lakputsananilh tuku lakaskinkgo latamanin, makgapitsi wa uma, kgalhiputunkgo lhuwa tumin chu lilanka (Eclesiastés 2:4-9; 4:4). Dios malakpuwanilh uma tuku wa: «Xlakata putum tuku takgaxmatli, xlikgalhsputat wa uma: Kapekuani xaxlikana Dios chu kamaki xlimapakgsin. Xlakata wa tuku xlitlawat chatum chixku». Chuna limasiyalh tuku tlakg xlakaskinka chu lu lipaxuwa chatum lataman akxni chuna natlawa.

«Kapekuani xaxlikana Dios.» Max pulana ni lu nalakgatiya akxni nakgaxmata pi talakaskin napekuaniya Dios. Pero uma akgtum xatlan tapekua. Ni nalilakapastakaw chatum lakskujni tiku pekuani xpatrón tiku nitlan likatsi chu ni makgasitsiputun wata nalilakpuwanaw chatum aktsu kgawasa tiku lu makgapaxuwaputun xapaxkina xtlat. Maktum libro lichuwinan pi pekuanikan Dios kilhchanima «nakakninanikgo chu nalakgachixkuwilikgo xkachikin xlakata paxkikgo chu katsikgo pi kgalhi litliwakga chu lilanka». Xlikana xlakata kgalhiniyaw xatlan tapekua Dios kinkamakgtayayan natlawayaw tuku lakaskin xlakata paxkiyaw chu katsiyaw pi na kinkapaxkiyan. Chu nikaj namakgkatsiyaw pi paxkiyaw wata wi tuku tlawayaw xlakata limasiyayaw. ¿La limasiyayaw?

«Kamaki xlimapakgsin.» Tapekua nema kgalhiniyaw Dios tlawa pi nakgalhakgaxmataw, chu xlilat chuna natlawayaw. Chuna la akxni wi tiku tlawa aparatos, katsi la tlakg tlan limaklakaskinkan, Jehová katsi la tlakg tlan nalinaw kilatamatkan, xlakata wa kiMalakatsukinakan. Kaj kilitlankan tuku kinkalimapakgsiyan xlakata lakaskin pi chuna tlan chu xatapaxuwan nalatamayaw (Isaías 48:17). Apóstol Juan wa: «Xampi wa yuma liwi lantla napaxkiyaw Dios, mpi natlawayaw ntuwan xlimapakgsin, na wa xlimapakgsin, ni tuwa» (1 Juan 5:3). Akxni kgalhakgaxmataw Dios limasiyayaw pi paxkiyaw chu xlimapakgsin limasiya la xlilhuwa kinkapaxkiyan.

«Wa tuku xlitlawat chatum chixku.» Uma tachuwin limasiya tuku xlakata lu xlakaskinka napekuaniyaw Dios chu nakgalhakgaxmataw, xlakata wa tuku kilitlawatkan. Xlakata Jehová kinkatlawan, wa xmalana kilatamatkan (Salmo 36:9). Na kilikgalhakgaxmatatkan. Wa xlakata akxni linaw kilatamatkan chuna la Dios kinkaskiniyan tlawamaw tuku kilitlawatkan.

Pero ¿tuku xlakata lamaw unu? Lamaw unu xlakata natlawayaw xtalakaskin Dios. Akxni chuna natlawayaw tlakg xatapaxuwan nalatamayaw. ¿Tlakg katsiputuna xlakata xtalakaskin Jehová chu chuna nalipina milatamat? Xtatayananin Jehová tlan xatapaxuwan namakgtayakgoyan.