Lapeny Pa Lukwan Bukkewa . . .

Lunyodo mono myero gupwony lutinogi lok i kom buto?

▪ Lunyodo mapol gitute ki kerogi ducu wek gigwok lutinogi ki i kom two mogo maraco. I yo acel-lu bene, lunyodo myero gutute matek me gwoko lutinogi ki i kit mogo ma pe tye atir. Yo acel ma giromo timone kwede aye ka gipwonyo lutinogi i yo mupore lok i kom buto. (Carolok 5:3-23) Pwony ma lunyodo miyo kacel ki tira i kit ma lutino myero gukwo kwede pire tek, pien lutino gitye ka neno lok kom buto i telebijon, vidio, bukke, ki dong tuko goga.

Lapwony mo acel otito ni: “Pwonyo lutino lok i kom buto pe tek i kareni.” Ento en omedde ni “peko ma tye aye obedo gin ma kipwonyogi kwede, mwaka ma lutino myero gunong iye pwony man, ki dong nga ma tye ka pwonyogi. Kwena me cato wil kacel ki tekwaro mogo gimiyo pwony maraco atika i lok kom buto i yo ma balo dok nyweno wi lutino.”

Lunyodo myero gugwok lutinogi ki i lok mogo ma nyweno wic ma lubbe ki lok me buto ma tye ka neko kabedowa-ni. (Carolok 5:1; Jo Epeco 6:4) Lutino matino myero gunge kit ma dul komgi tiyo kwede, kit ma myero gugwok ki lengo me komgi, ki kit ma myero gugwokke ki i kom jo ma gimaro lok me caro. Ma peya raa ogoyo latin​—mwaka ma latin cako bedo ki miti me buto​—latin anyaka myero onge alokaloka ma bitimme i kome dok oniang gin mumiyo timme, ki dong kit ma neno dwe timme kwede. I yo acel-lu, latin awobi myero onge con lok i kom lek ma en bilekone i dyewor ci layo lac me co i kome. Ka lutino pud gitino, lunyodo gitwero cako pwonyogi ki nying dul komgi labongo pango nyo weyone. Lunyodo ma lumar gimiyo pwony adek ma pigi tego bot lutinogi ma lubbe ki dul kom magi: (1) Tye piri keni dok pigi tek. (2) Myero pe ki lok iye i yo marac. (3) Pe myero kigudgi atata nyo kinyut ka maleng. Ka lutino giwoto ki doko dito, lunyodo myero gunge kare mene ma myero gupwonygi kit ma i dako dongo kwede. *

Lunyodo myero gucak pwony man awene? Omyero gucak con. Latin anyaka romo cako neno dwe ki mwaka 10 nyo con. Latin awobi romo cako layo lac me co i kine me mwaka 11 nyo 12. Alokaloka magi twero gwenyo wi latin ka pe oniang gin ma tye ka timme i kome-ni. Omyero kitit ki lutino con ni alokaloka magi ma timme i komgi-ni pe rac. Man aye kare me konyogi wek guniang kit ma lubo cik me Baibul pire tek kwede​—gin ma pol kare dano pe gitimo ka gitye ka pwonyo lok i kom buto.​—Carolok 6:27-35.

[Lok ma tye piny]