Fluwa nun kannganfuɛ’m be usa kɛ...

?Ɔ fata kɛ siɛ nin niɛn’m be kan yasua nin bla lika ndɛ be kle be mma mun?

▪ Siɛ nin niɛn sunman be mian be ɲin kpa be sasa be mma mun naan tukpacɛ tɛ wie w’a tɔman be su. Ɔ fata kɛ be sasa be sɔ wie akunndan nin aeliɛ tɛ’m be lika. Wafa nga be kwla yo sɔ’n, i kun yɛle kɛ maan be kan yasua nin bla lika i su ndɛ ng’ɔ nin i fata’n be kle be. (Nyanndra Mun 5:3-23) Ba’m be like klelɛ sɔ’n ti cinnjin kpa. Afin televiziɔn nun nin ɛntɛnɛti su ɔ nin fluwa wafawafa kwlaa nun’n, be yi bian nin bla nna’n i nglo yɛ be kɛn i ndɛ weinwein. I sɔ liɛ’n w’a tru kpa.

Diani Levini m’ɔ ti suklu klefuɛ’n nin fluwa klɛfuɛ’n seli kɛ: “Ng’ɔ ti ndɛ’n nɛ́n i yɛle bian nin bla nna’n i su like mɔ e mma’m be su suan’n. Sanngɛ ng’ɔ ti ndɛ’n, yɛle like bɔbɔ ba’n nga be su suan’n, ɔ nin afuɛ nga kɛ bé súɛn i sɔ like’n be le i’n, yɛ sran ng’ɔ kle be like’n. Bian nin bla nna’n i su ndɛ nga sran mun, ɔ nin nga aata difuɛ’m be kan kle ba mun’n be ti tɛtɛ kpa yɛ be kwla saci be.”

Bian nin bla nna’n i su akunndan tɛtɛ mɔ sran’m be bu’n m’ɔ su saci be’n, ɔ fata kɛ siɛ nin niɛn’m be sasa be mma mun be lika. (Nyanndra Mun 5:1; Efɛzfuɛ Mun 6:4) Ɔ fata kɛ ba kanngan’m be si wafa nga be wunnɛn’n fa ti’n, ɔ nin wafa nga be kwla niɛn i lika’n, yɛ wafa nga be kwla sasa be wun sran tɛtɛ’m be lika’n. Ka naan ba bla’n i sa w’a bu’n, ɔ fata kɛ ɔ si wafa nga i wunnɛn’n wá káci’n, ɔ nin wafa nga bla’m be sa bu’n ɔ nin sa nga ti yɛ ɔ yo sɔ’n. Yasua kan’n kusu’n, ɔ fata kɛ ɔ dun mmua si yasua i wun nzue m’ɔ gua kɔnguɛ’n i su ndɛ. Kɛ ba’m be te yo kanngan’n, siɛ nin niɛn’m be kwla kle be be wunnɛn’n i likalika’m be dunman kpafuɛ mun. Siɛ nin niɛn nga be klo be mma mun’n, be kle be be wunnɛn’n i su ninnge cinnjin nsan. I klikli’n yɛle kɛ be nvialiɛ nun lika’m be ti be ngunmin be liɛ, naan kusu be timan kɛ be wunnɛn’n i lika onga’m be sa. I nɲɔn su’n yɛle kɛ nán maan be kɛn i ndɛ tɛ annzɛ be fa di aɔwi. Yɛ i nsan su’n yɛle kɛ, nán be bɔbɔ annzɛ sran uflɛ kan nun ngowa, annzɛ kusu nán be fa kle sran. Kɛ ba’m bé ɲín bé kɔ́’n, wafa nga bla kun wunnzɛ’n, blɛ ng’ɔ ti mɔ siɛ nin niɛn’m be yiyi nun kle be’n, ɔ fata kɛ be bu i akunndan. *

?Afuɛ nɲɛ yɛ ɔ fata kɛ ba’m be ɲɛn i naan be si nin be nin’m b’a kle be i sɔ ninnge mun ɔn? Ɔ fata kɛ be bo i bo ndɛ nun kpa. Afin wie liɛ’n, kɛ ba bla’n ko ɲan afuɛ 10 cɛ’n kpɛkun i sa su bu. Wie liɛ bɔbɔ’n ɔ ɲanman afuɛ blu. Yasua kan’n i liɛ’n, kɛ be se kɛ w’a ɲan afuɛ 11 annzɛ 12 cɛ’n, kpɛkun i wun nzue su gua. Sɛ ba’m b’a dunman mmua b’a wunman like ng’ɔ́ wá yó be’n i wlɛ ka’n, naan i sɔ sa liɛ’n ju’n, be akunndan’n kwla sanngan. I ti’n, ɔ fata kɛ siɛ nin niɛn’m be dun mmua se be kɛ ɲinlɛ mɔ be su ɲin’n ti yɛ i sɔ sa’n wá jú ɔ. I sɔ blɛ nun kusu yɛ ɔ fata kɛ be uka ba mun naan be wun i wlɛ kɛ Biblu’n i nun mmla’m be su falɛ’n ti kpa man be naan ɔ ti cinnjin ɔn. Afin mɛn nunfuɛ’m be ninnge nga be kle’n, i wie fi kwlá kleman be ajalɛ sɔ’n.—Nyanndra Mun 6:27-35.

[Ja ngua lɛ ndɛ’n]