Kwestin Blong Olgeta We Oli Ridim Magasin Ya . . .

?Olsem Wanem? ?I Stret Blong Papa Mama i Tijim Pikinini Long Ol Fasin Blong Man Wetem Woman?

▪ Plante papa mama oli traehad blong lukaot gud long ol pikinini blong olgeta, blong oli no kasem ol rabis sik. Long sem fasin, ol papa mama oli mas traehad blong lukaot gud se ol pikinini blong olgeta oli no gat ol rabis fasin. Wan rod blong lukaot gud long olgeta, hemia blong tijim ol pikinini blong oli gat stret tingting, long fasin blong man wetem woman. (Ol Proveb 5:3-23) Tede, ol pikinini oli save lukluk ol nogud fasin blong man mo woman long televisin, long Intenet, long ol buk, mo long ol comic (bandes dessinées). Taswe, i impoten tumas we papa mama i tijim pikinini long ol gudfala fasin.

Tija ya Diane Levin we i stap raetem ol buk, i talem se “ol pikinini tede oli stap save fasin we man i mekem wetem woman. Be problem hemia wanem we oli stap lanem, mo oli save samting ya taem oli gat hamas yia, mo hu i tijim olgeta. Ol man we oli salem ol samting, oli pulum tingting blong ol pikinini i go long fasin blong man wetem woman. Mo fasin blong ol man raonabaot i gat paoa long ol pikinini tu. Ol samting ya oli mekem se ol pikinini oli kasem wan tijing we i no stret.”

Ol papa mama oli mas lukaot gud long ol pikinini blong olgeta, blong ol rong tingting mo rabis tingting we ol man raonabaot oli gat, i no spolem olgeta. (Ol Proveb 5:1; Efesas 6:4) Ol pikinini oli mas save olsem wanem bodi blong olgeta i wok. Oli mas save olsem wanem blong stap klin long bodi, mo olsem wanem blong blokem narafala we i wantem mekem nogud fasin long olgeta. Taem pikinini i gruap, bodi blong hem i stap jenis. Ol gel oli mas save ol jenis we bambae i kamaot long bodi blong olgeta. Mo oli mas kasem save from wanem bambae oli luk sik blong woman, mo se sik blong woman i olsem wanem. Sem mak, ol boe oli mas save wanem ya wota blong man, bifo we i kamaot long bodi blong olgeta. Taem pikinini i smol yet, papa mama i mas stat tijim hem long stret nem blong ol defren haf blong bodi. Ol papa mama we oli lavem ol pikinini blong olgeta, bambae oli tijim olgeta long tri samting: (1) Sam haf blong bodi i tabu, i blong olgeta nomo. (2) Oli no mas yusum nem blong tabu haf blong bodi blong toktok nogud. (3) Oli no mas letem narafala man i luk mo i tajem tabu haf blong bodi blong olgeta. Taem pikinini i stap kam bigwan, papa mama i mas eksplenem long hem olsem wanem wan woman i save gat bel. *

?Ol papa mama oli mas stat wetaem blong tijim pikinini blong olgeta? Maet bambae yufala i sapraes long ansa blong kwestin ya. Ol gel oli save luk sik blong woman taem oli gat 10 yia no bifo we oli gat 10 yia. Mo ol boe oli save luk wota blong man taem oli gat 11 no 12 yia. Ol jenis ya oli save mekem pikinini i harem nogud, antap moa sipos hem i no kasem save se wanem i stap hapen long bodi blong hem. Papa mama i mas talem long hem se ol jenis we bambae hem i luk, oli hapen long yumi evriwan taem yumi stap gruap. Mo papa mama i mas givhan long pikinini blong save se i impoten blong folem ol loa blong Baebol, blong hem i save gat ol gudfala fasin. Hemia ol save we pikinini i no kasem long skul.—Ol Proveb 6:27-35.

[Futnot]