Mga Magbabasa Nangutana . . .

Angay Bang Tudloan ang mga Anak Bahin sa Sekso?

▪ Daghang ginikanan ang maningkamot pag-ayo aron dili mataptag sakit ang ilang mga anak. Kinahanglan sab silang maningkamot sa pagpanalipod sa ilang mga anak batok sa imoral nga tinamdan. Ang usa ka paagi nga mahimo nila kana maoy sa paghatag ug hustong edukasyon bahin sa sekso. (Proverbio 5:​3-23) Kini nga pagbansay ug moral nga giya gikinahanglan kay mas kaylap karon ang kalaw-ayan diha sa TV ug Internet, sa mga libro, ug komiks.

“Ang pagkakat-on sa atong mga anak bahin sa sekso dili mao ang problema,” miingon ang propesor sa edukasyon ug awtor nga si Diane Levin. “Ang problema maoy kon unsay ilang nakat-onan, ang edad nga sila nakakat-on niana, ug kon kinsay nagtudlo nila. Ang mga bata naimpluwensiyahan pag-ayo sa makadaot nga matang sa seksuwal nga edukasyon gikan sa mga negosyante ug sa uso karon.”

Kinahanglang panalipdan sa mga ginikanan ang ilang mga anak batok sa hiwi ug imoral nga panglantaw nga nagdaot sa katilingban. (Proverbio 5:1; Efeso 6:⁠4) Ang mga bata kinahanglang mahibalo kon sa unsang paagi nagaobra ang lawas, kon unsaon pag-atiman ang kaugalingon, ug kon unsaon pagpanalipod batok sa imoral nga mga tawo. Sa dili pa matin-edyer, ang anak nga babaye kinahanglang mahibalo bahin sa kausaban sa iyang lawas ug makasabot kon nganong ug sa unsang paagi magregla. Sa susama, ang anak nga lalaki angayng mahibalo daan bahin sa paggawas sa binhi panahon sa pagkatulog. Samtang gagmay pa ang mga bata, mahimo na silang tudloan sa ilang ginikanan sa hustong ngalan sa mga parte sa lawas. Ang mahigugmaong ginikanan magtudlo sa ilang mga anak ug tulo ka hinungdanong butang bahin niini: (1) Kini maoy pribado. (2) Kini dili angayng hisgotan sa hilas nga paagi. (3) Kini dili ipahikap o ipakita sa uban, gawas lang sa pipila ka hinungdanong kahimtang. Samtang magdako ang mga bata, kinahanglang tinoon sa ginikanan kon kanus-a nila ipatin-aw sa mga anak nganong momabdos ang babaye. *

Kanus-a angayng sugdan sa mga ginikanan ang pagtudlo? Labing maayo kon mas sayo kay sa gituohan sa daghan. Ang batang babaye tingali reglahon sa edad nga 10 anyos o mas sayo pa. Ang batang lalaki tingali unang gawsag binhi sa edad nga 11 o 12. Mahimong mabalaka ang mga bata kon wala sila makasabot sa maong kausaban. Kinahanglan silang sultian daan nga normal lang kana. Panahon usab kini nga tabangan sila nga makasabot sa kahinungdanon sa pagsunod sa moral nga sukdanan sa Bibliya​—⁠butang nga wala itudlo sa kadaghanang sekular nga edukasyon bahin sa sekso.​—⁠Proverbio 6:​27-35.

[Footnote]