Tama Sina ese Natudia Dekenai Mahuta Hebou Karana Idia Herevalaia be Namo, A?
Tama Sina ese Natudia Dekenai Mahuta Hebou Karana Idia Herevalaia be Namo, A?
▪ Tama sina momo idia hekwarahi edia natudia idia naria namonamo, gorere dikadia idia abia lasi totona. Unai hegeregerena, namona be idia hekwarahi edia natudia idia naria, kara mirodia idia karaia lasi totona. Natudia idia naria dalana ta be idia dekenai mahuta hebou karana do idia herevalaia. (Aonega Herevadia 5:3-23) Unai bamona hadibaia bona hakaua karana be mai anina bada, badina mahuta hebou laulau dikadia momo be TV, Intanet, buka idauidau bona mobael fon ai idia hedinarai, bona natudia be unai idia itaia diba.
Edukeisen Profesa bona buka torea hahine, Diane Levin ia gwau: “Hari iseda natudia be mahuta hebou karana ena anina idia dibaia. To hekwakwanai be dahaka idia dibaia noho, edia mauri lagani be hida neganai unai idia dibaia, bona daidia ese idia hadibaia. Bisinesi taudia bona matabodaga taudia edia mauri dalana amo natudia be diba kererena idia abia.”
Namona be tama sina ese edia natudia idia gimaia, unai amo lalohadai dikadia idia dadaraia diba. (Aonega Herevadia 5:1; Efeso 6:4) Natudia dekenai tauanina ena gaukara dalana, naria dalana, bona matabodaga taudia dadaraia dalana idia hadibaia be namo. Natuna kekeni ia do maragi neganai, namona be ia diba ia bada neganai ena tauanina dekenai gau haida do idia idau, danu hua gorere ia vara dalana bona ena badina ia lalopararalaia be namo. Unai hegeregerena, natuna mero be ia mahuta lalonai ena vesi ia lasi kava karana ia lalopararalaia be gau badana. Natudia idia do maragi neganai, tama sina ese idia dekenai tauanina ena kahana idauidau edia ladana korikori idia hadibaia. Lalokau tama sina ese edia natudia dekenai tauanina ena kahana haida idia herevalaia neganai, inai mai anina bada gaudia toi idia hadibaia: (1) Idia be hehuni gaudia. (2) Dala kererena ai do idia herevalaia lasi. (3) Ma haida ese do idia itaia lasi bona dogoatao lasi. Natudia idia tubu neganai, namona be tama sina ese nega maorona idia abia hidi, hahine ia rogorogo dalana idia herevalaia totona. a
Edena negai tama sina ese natudia idia hadibaia matamaia? Idia do maragi neganai idia hadibaia be namo. Reana kekeni ena mauri lagani be 8 ia lao 10 neganai, hua gorere ia davaria. Reana mero ena mauri lagani be 11 o 12 neganai, ena vesi ia lasi kava. Bema natudia be unai gaudia idia vara edia badina idia lalopararalaia namonamo lasi, lalohadai kerere idia abia diba. Namona be natudia oi hadibaia guna, unai be vaia tauanina ai idia vara gaudia. Danu, idia oi durua Baibel ena taravatu maorodia badinaia karana ena namo idia diba totona. Tanobada ena sikuli idauidau ese unai idia hadibaia lasi.—Aonega Herevadia 6:27-35.
[Footnote]
a Tama sina ese heduru hereva haida be Iehova ena Witnes taudia ese idia karaia buka bona magasin ai idia itaia diba, haida be inai: Awake! May 2006, ena atikol ladana, “Preparing Your Daughter for Menarche,” rau 10-13; Questions Young People Ask—Answers That Work, Volume 2, karoa 6, “What’s Happening to My Body?”; bona Gima Kohorona, January-March 2011, “Famili Ena Moale Havaraia Daladia—Emui Natudia ida Mahuta Hebou Karana Herevalaia,” rau 12-14.
