Okuti ovohe vesukisa okulongesa ovana vavo konthele yotyihola?
Ovatangi Vapula . . .
Okuti ovohe vesukisa okulongesa ovana vavo konthele yotyihola?
▪ Ovohe ovanyingi valinga ononkhono ononene opo vaamene ovana vavo komauvela apondola okuvenyona. Tupu, ovohe vesukisa okulinga ononkhono opo vaamene ovana vavo kovituwa vipondola okuvenyona. Onkhalelo imwe vapondola okutyilinga, okuvelongesa nawa konthele yotyihola. (Provérbios 5:3-23) Okuvelongesa nokuvehongolela nawa konthele oyo, tyesukisa mokonda ovana vatala ovipuka ovio mo Televisau, no mo Internete, no momikanda.
Omulongesi nomuhoneki Diane Levin wahangununa okuti: “Otyitateka hono hakuti ovana vetu vekahi nokulilongesa konthele yotyihola, mahi oityi vekahi nokulilongesa, o nomanima eñgapi vekahi nokulilongesa tyo, iya olie ukahi nokuvelongesa. Ovana vekahi nokulongeswa novalandesi novanthu ovakuavo onkhalelo yotyihola ipondola okuvenyona unene.”
Ovohe vesukisa okuamena ovana vavo komalusoke ahaviukile ekahi nokunyona ovanthu hono. (Provérbios 5:1; Efésios 6:4) Ovana vesukisa okunoñgonoka oñgeni olutu luavo lukahi, oñgeni vena okulikoha, noñgeni vena okuliamena kovanthu vovituwa ovivi. Tyina omona omukainthu ekahi nokukula olutu lwae luhimbika okupiluluka, ngotyo oe wesukisa okunoñgonoka konthele yomapiluluko oo, nokunoñgonoka oñgeni nomokonda yatyi mahimbika okuvela konohanyi. Tupu, omona omukuendye wesukisa okunoñgonoka etyi pamwe kounthiki atundila ehu, akala ngoti weliufuila, tyilekesa okuti ukahi nokukula. Tyina ovana ovatutu, ovohe vapondola okuhimbika okuvelongesa omanyina ononthele mbolutu luavo. Ovohe vena ohole valongesa ovana vavo ononthele ombu ononthatu mbolutu luavo: (1) Ombo mbakolela unene iya mbuna okuholekwa. (2) Kambupopiwa ngotyinyaneno. (3) Kambupondola okukuatwa ine okumbulekesa kovanthu. Putyina ovana vekula, ovohe vesukisa okunoñgonoka onalupi vena okuvepopila oñgeni omukai akala omulemi. a
Onalupi ovohe vesukisa okuhimbika okulongesa ovana ovipuka ovio? Kavapondola okuseta. Omukainthu upondola okuhimbika okuvela konohanyi alo umwe tyina nkhele ehenetuukise omanima 10. Omukuendye upondola okutunda ehu tyina ena omanima 11 ine 12. Ovipuka ovio vipondola okuhalulukisa ovana inkha kavetyii omokonda yatyi. Ovana vesukisa okupopilwa liwa okuti petupu natyike otyivi nolutu luavo. Tupu, oo omuvo wokuvekuatesako okunoñgonoka omokonda yatyi tyakolela okulandula onondonga Mbombimbiliya konthele yovituwa oviwa. Mahi ovanthu vomouye hatyoko valongesa konthele yotyihola.—Provérbios 6:27-35.
[Onondaka Poutoi]
a Ovohe vapondola okuvasa ombatelo konthele oyo, momikanda vialingwa no Nombangi mba Jeova: O Despertai! ya Maio yo 2006, monthele “Como Preparar Sua Filha Para a Primeira Menstruação,” pomafo 10-13; Os Jovens Perguntam—Respostas Práticas, Volume 2, mo kapitulu 6, kati “O Que Está Acontecendo Com Meu Corpo?”; no Mutala Womulavi 1 ya Kuhuhu yo 2010 monthele yati “Osapi Opo Ombunga Ikale Nehambu—Tomphola Novana Vove Konthele Yotyihola,” pomafo 12-14.
