Asoo Ɔwɔ Kɛ Awovolɛ Kilehile Bɛ Mra Nla Nwo Debie?
Yɛ Kengavoma Biza Kɛ . . .
Asoo Ɔwɔ Kɛ Awovolɛ Kilehile Bɛ Mra Nla Nwo Debie?
▪ Awovolɛ dɔɔnwo bɔ mɔdenle kpalɛ bɔ bɛ mra nwo bane fi ewulenzane nwo. Ɔwɔ kɛ bɛyɛ deɛ ko ne ala bɛbɔ bɛ mra nwo bane bɛfi nla nu ɛbɛla ɛtane nwo. Adenle ko mɔɔ bɛbahola bɛalua zo bɛayɛ ɛhye la a le kɛ bɛbaha nla nwo edwɛkɛ mɔɔ fɛta la bɛahile bɛ. (Mrɛlɛbulɛ 5:3-23) Ndetelɛ nee adehilelɛ ɛhye mɔɔ ɔwɔ kɛ awovolɛ fa maa la anwo hyia ɔluakɛ nla nwo ninyɛne ɛbu zo wɔ TV nee Intanɛte, yɛɛ mbuluku nee sini nu.
Kilehilevolɛ nee kɛlɛvolɛ Diane Levin ka kɛ: “Tɛ ngyegyelɛ ne a le mɔɔ yɛ ngakula ne mɔ ɛlɛsukoa ye wɔ nla nwo la. Ngyegyelɛ ne a le mɔɔ bɛlɛsukoa, ɛvolɛ mɔɔ bɛli mɔɔ bɛlɛsukoa, nee menli mɔɔ ɛlɛkilehile bɛ la. Ngakula nyia nla nwo ngilehilelɛ mɔɔ sɛkye ɛbɛla kpalɛ la fi guadivoma nee awie mɔ ɛkɛ.”
Ɔwɔ kɛ awovolɛ bɔ bɛ mra nwo bane fi nla nwo edwɛkɛ mɔɔ sɛkye ɛbɛla kpalɛ la anwo. (Mrɛlɛbulɛ 5:1; Ɛfɛsɛsema 6:4) Ɔhyia kɛ ngakula nwu kɛzi bɛ sonlabaka ne yɛ gyima, kɛzi ɔwɔ kɛ bɛnea bɛ sonlabaka ne azo, nee kɛzi bɛbabɔ bɛ nwo bane bɛavi menli mɔɔ bɛ ɛbɛla ɛzɛkye anwo la. Kolaa na kakula bɛlɛra bie abɔ fuamunli anzɛɛ abu ɔ sa la, ɔwɔ kɛ ɔnwu nzenzaleɛ mɔɔ bara ye sonlabaka ne anu la, na ɔte deɛmɔti nee kɛzi bɛbu bɛ sa la abo. Zɔhane ala a ɔwɔ kɛ kakula nrenya dumua nwu ye kɛ bɛ nwo kola ba nɔɔzo anzɛɛ mekɛ mɔɔ bɛlɛka ɛlalɛ la a. Mekɛ mɔɔ bɛle ngyikyi la, awovolɛ bɛahola ahile bɛ sonlabaka ne nvɛyeba ne mɔ aluma. Awovolɛ kpalɛ kilehile bɛ mra nvɛyeba ɛhye mɔ anwo ninyɛne titile ɛhye mɔ: (1) Bɛle titile yɛɛ ɔnle kɛ awie nwu bɛ. (2) Ɔnle kɛ bɛka nwolɛ edwɛkɛ ɛtane bɛkile awie. (3) Ɔnle kɛ bɛmaa awie mɔ fa bɛ sa ka ye anzɛɛ bɛye bɛkile. Saa ngakula ne mɔ ɛlɛyɛ mgbanyinli a, ɔwɔ kɛ awovolɛ ne mɔ nwu mekɛ mɔɔ ɔfɛta nee kɛzi bɛbahile adenle mɔɔ raalɛ dua zo nrenzɛ anu bɛahile bɛ la. *
Mekɛ boni a ɔwɔ kɛ awovolɛ bɔ ngilehilelɛ ɛhye abo a? Ɔwɔ kɛ bɛbɔ ɔ bo ndɛndɛ. Kakula raalɛ bahola alumua abu ɔ sa wɔ mekɛ mɔɔ yeli ɛvolɛ 10 anzɛɛ ɔtɛdwule zɔ bɔbɔ la. Kakula nrenya anwo bahola alumua ara wɔ mekɛ mɔɔ yeli ɛvolɛ 11 anzɛɛ 12 la. Saa ngakula ɛnze mɔɔ ɛlɛkɔ zo la anwo ɛhwee a ɔbahola yeagyegye bɛ. Ɔhyia kɛ bɛmaa ngakula dumua nwu ye kɛ nzenzaleɛ ɛhye mɔ bara bɛ sonlabaka ne mɔ anu. Eza ɔle kpalɛ kɛ bɛbamaa bɛanwu nvasoɛ mɔɔ wɔ ɛbɛla ɛbɔlɛ nwo ngyinlazo mɔɔ wɔ Baebolo ne anu mɔɔ bɛbali zo azo la wɔ mekɛ ɛhye anu—debie mɔɔ menli mɔɔ tu nla nwo folɛ wɔ ewiade ye ɛngola ɛnyɛ la.—Mrɛlɛbulɛ 6:27-35.
[Ɔ bo ɛkɛ ne edwɛkɛ]
^ ɛden. 5 Awovolɛ bɛahola anyia ɛhye anwo edwɛkɛ mɔɔ boa la wɔ mbuluku ɛhye mɔ mɔɔ Gyihova Alasevolɛ ɛyɛ la anu: Edwɛkɛ “Preparing Your Daughter for Menarche” wɔ May 2006 Awake! ne mukelɛ 10-13; “What’s Happening to My Body?” wɔ Questions Young People Ask—Answers That Work, Foa 2 ne tile 6; yɛɛ “Keys to Family Happiness—Talk to Your Children About Sex” wɔ November 1, 2010 Watchtower ne mukelɛ 12-14.
