Peidek kan Sang Sounwadawad kan . . .

Pahpa oh nohno kan anahne padahkihong neirail seri kan duwen wia nsenen pwopwoud?

▪ Pahpa oh nohno tohto kin nantihong uwen arail kak ren perehsang neirail seri kan soumwahu keper kan. Pahpa oh nohno kan pil anahne wia soangen nantihohte pwehn pere neirail seri kan sang tiahk suwed oh keper kan. Ehu ahl me re kak doadoahngki iei en kihong irail kaweid me pwung oh konehng me pid wia nsenen pwopwoud. (Lepin Padahk 5:3-23) Soangen kaweid en pahpa oh nohno pwukat kin kesempwal pwehki ahnsou wet, e mengeiong seri kan en kilang soahng suwed pwukat nan kasdo, Internet, oh nan pwuhk kan.

Emen soun kaweid en pelien sukuhl oh pil sounnting koasoia: “Kahpwal me mie rahnwet sohte kohsang neitail seri kan ar sukuhlki duwen wia nsenen pwopwoud, ahpw e kohsang dahme re sukuhlki, sounpar en seri kan ni ahnsou me re tepida sukuhliki met, oh ihs me kin padahkihong irail. Kasukuhl ong seri kan me kin keieu kamwakid irail laud oh keper iei me kin kohsang ni pelien pesines oh dahme pali laud en aramas kin wia oh nda.”

Pahpa oh nohno kan anahne perehsang neirail seri kan madamadau sapwung me kin kauwehla mour en aramas. (Lepin Padahk 5:1; Episos 6:4) Seri kan anahne ese duwen paliwararail eh kin doadoahk, ia duwen arail pahn apwalih paliwararail oh pere irail sang aramas tiahk suwed kan. Mwohn paliwar en seri men kin wiahla paliwar en aramas laud, serepein men anahne ese wekidekla kan me kin wiawiong paliwere oh wehwehki dahme kahrehda soumwahu en lih kin wiawi. Pil duwehte, pwutak men anahne ese duwen pihl me kin kohsang reh. Ahnsou me seri kan tikitik, pahpa oh nohno kak tepida padahkihong irail ahd pwung en paliwararail kan. Pahpa oh nohno limpoak kan kin padahkihong neirail seri kan ire kesempwal siluh duwen paliwararail: (1) Wasa pwukat tohrohr oh ongete irail. (2) Sohte me pahn wiahki koasoi suwed. (3) Sohte me pahn doahke de kilang. Ni seri kan ar kin lalaudla, pahpa oh nohno kan anahne ese iahd me re pahn kawehwehiong irail ia duwen lih emen eh kin liseianda. *

Iahd me pahpa oh nohno kan pahn tepida wia kasukuhl wet? Ahnsou mwadang. Serepein men kak tepida wia eh soumwahu en lih ni eh sounpar 10 de mwadangasang. Pwutak emen kak tepida mie pihl kohsang reh ni eh sounpar 11 de 12. Wekideklahn nan paliwar pwukat kin kak kapwunode seri kan ma re sohte wehwehki kahrepe. Seri kan anahne ese me sohte mehkot sapwungala ni paliwararail ahnsou me soahng pwukat kin wiawi. Met pil wia ahnsoun sewese irail en wehwehki kesempwalpen en kin idawehn kaweid en Paipel ong tiahk mwahu kan. Prokram en kasukuhl en wia nsenen pwopwoud teikan sohte kin wia met.​—Lepin Padahk 6:27-35.

[Nting tikitik kan me mi pah]