¿Parlapayananchischu wawakunata warmi-qhari puñuymanta?
Leeqkunan yachayta munanku
¿Parlapayananchischu wawakunata warmi-qhari puñuymanta?
▪ Tayta-mamakunaqa imaymanata ruwaspan wawankuta cuidanku mana onqonankupaq. Chhaynallatataqmi cuidananku ama pipas mana allinkunata yachachinankupaq. Chaytaqa allin yuyaywan warmi-qhari puñuymanta parlapayaspan ruwankuman (Proverbios 5:3-23). Arí, tayta-mamakunan sut’ita chaykunamanta wawankuman rimapayananku, ¿imarayku? Televisionpi, Internetpi, librokunapi chansakunapipas warmi-qhari puñuymanta rimakusqanrayku, chayta wawakuna qhawaspan pantasqata yachankuman.
Diane Levin sutiyoq profesoran nin: “Wawakunaqa manan yachanallankuchu warmi-qhari puñuymanta, aswanpas imatas chaymanta yachashanku, hayk’a watanpis yachashanku, pikunas yachachishanku chaykunatan qhawarina. Chaymantapas imaymana propagandakuna, mana kaqta warmi-qhari puñuymanta rimaykunan wawakunata waqllichinman”, nispa.
Wawakunataqa allintan cuidananchis warmi-qhari puñuymanta mana kaqta rimaqkunamanta (Proverbios 5:1; Efesios 6:4). Yachanankun imaynas cuerponku kasqanta, imaynatas cuidakunkuman, imaynatan millay qhelli runakunamanta cuidakunkuman chaytapas. Warmi wawakunatan manaraq sipasyashaqtinkun yachachinanku imaynatan cuerponku cambian, imaraykus killanku chayamun hayk’aqmi chay kanqa chaytapas. Qhari wawakunatapas manaraq waynayashaqtinkun rimapayananku imaraykus tutakunapi muhunku phawamun chayta. Huch’uychankumantapachan yachachinanku qhari kayninkumanta otaq warmi kayninkumanta. Munakuq tayta-mamakunaqa wawankutan yachachinanku qhari kayninkumanta otaq warmi kayninkumanta respetowan rimanankupaq, hinaspapas mana pipas chayta llaminanchu ni qhawananchu. Wiñasqankuman hinataq willananku imaynatas huk warmi wiksallikun chayta. *
¿Hayk’aqmi parlapayananchis? Huch’uychankumantapacha. Warmi wawamanqa 10 watanpi otaq ñawpaqtan killan chayayta qallarinman. Qhari wawakunataq 11 otaq 12 watanpi tutakuna muhun phawarinman. Chhaynapi tarikuspankun sinchita mancharikunkuman. Chaymi rimapayananchis imachus cuerponkupi pasasqanta chhaynapuni kasqantapas. Hinaspapas chaykunamanta rimapayaspan entiendechinanchis warmi-qhari puñuymanta Bibliaq nisqan ancha allin kasqanta, chaykunataqa manan escuelakunapiqa yachachinkuchu (Proverbios 6:27-35).
[Uranpi willakuy]
^ párr. 5 Tayta-mamakuna astawan yachayta munanku chayqa, kay qelqakunatan t’aqwinkuman: 2006 wata mayo killamanta ¡Despertad! revistata 10-13 paginakunata “Prepare a su hija para la primera menstruación”, Lo que los jóvenes preguntan. Respuestas prácticas (volumen 2) 6 capitulopi: “¿Qué le pasa a mi cuerpo?”, 2011 wata enero killamanta Qhawaq revistata 12-14 paginakunata “Familiapaq allin yachachikuykuna: Wawakunawan parlasun warmi-qhari puñuymanta” nisqa temakunata. Chaykunataqa Jehová Diospa testigonkunan ruwan.
