Leisiman e aksi . . .

Papa nanga mama musu taki fu seks nanga den pikin fu den?

▪ Furu papa nanga mama e du tranga muiti fu kibri den pikin gi takru siki. Papa nanga mama musu du a srefi muiti dati tu fu sorgu taki den pikin no kisi takru fasi. Wan fasi fa den kan du dati na te den e meki den pikin kon sabi san den musu sabi fu seks (Odo 5:3-23). A de prenspari taki papa nanga mama leri den pikin den sani disi èn taki den e leri den fa den musu tyari densrefi na wan fasi di fiti. Dati de so fu di a e pasa moro nanga moro taki pikin e si sekstori noso prenki tapu telefisi nanga Internet èn den kan leisi den sani dati na ini buku.

Professor Diane Levin ben skrifi: „A problema na ini a ten disi a no taki den pikin fu wi e kon sabi sani fu seks, ma a problema na den sani di den e kon sabi fu seks. Boiti dati den yongu tumusi te den e kon sabi den sani dati èn a no den yoisti sma e taki nanga den fu den tori dati. Reklame nanga a fasi fa sma na ini a ten disi e tyari densrefi abi furu krakti tapu pikin èn na so den pikin e kisi wan fowtu denki fu seks.”

Papa nanga mama musu kibri den pikin gi den fowtu denki di e pori a libimakandra èn di kan meki den pikin tyari densrefi na wan fasi di no fiti (Odo 5:1; Efeisesma 6:4). Yongu pikin musu kon sabi den skin, den musu sabi fa fu sorgu den skin èn fa fu kibri densrefi gi sma di wani du sani di no fiti nanga den. Fosi wan meisje tron wan tini, noso fosi en skin e bigin kenki, a musu sabi fu san ede dati e pasa èn a musu frustan fu san ede a o kisi en munsiki èn fa dati o pasa. Na so a de tu taki wan boi musu sabi na fesi taki son leisi skiti o komoto na en syenpresi te a e sribi te neti. Te den pikin yongu ete, dan papa nanga mama musu leri den san na den yoisti nen fu spesrutu pisi fu den skin. Papa nanga mama di lobi den pikin fu den musu leri den dri prenspari sani fu den pisi dati fu a skin: (1) Den pisi dati fu a skin na fu den wawan. (2) Den no musu taki fu den pisi dati na wan fasi di no fiti. (3) Sma no musu fasi den drape èn den no musu sori trawan den pisi dati. Te den pikin e kon bigi, dan papa nanga mama musu luku o ten den o fruteri den fa wan uma e kon de nanga bere. *

O ten papa nanga mama musu bigin taki nanga den pikin fu den sani disi? Den musu du dati so fruku leki a kan. Wan meisje kan kisi en munsiki te a abi 10 yari noso moro fruku srefi. Wan boi kan abi 11 noso 12 yari srefi, te skiti e komoto fu a fosi leisi na en syenpresi. Den sani disi di de wan bigi kenki na ini a libi fu pikin, kan bruya den te den no sabi san e pasa nanga den. Pikin musu sabi na fesi taki noti no e du den, ma taki den sani disi musu pasa. Te den sani disi pasa nanga den, dan a bun tu fu yepi den fu kon frustan fu san ede a prenspari fu hori densrefi na Bijbel markitiki. Nofo tron pikin no e kon sabi den sani dati te den e kisi leri fu seks na skoro noso na tra presi.​—Odo 6:27-35.

[Futuwortu]