Ol Man i Askim . . .

Yu Ting Papamama i Mas Givim Stretpela Save Long Ol Pikinini Long Maritpasin?

▪ Planti papamama i save wok strong tru long lukautim ol pikinini bilong ol bambai ol i no ken kisim ol sik nogut. Ol papamama i mas mekim olsem tu bilong lukautim ol pikinini bambai ol i no ken bihainim ol pasin nogut. Wanpela rot bilong mekim olsem em long givim stretpela save long ol long maritpasin. (Sindaun 5:​3-23) Ol kain gutpela skultok na stiatok i bikpela samting, long wanem, long nau ol pikinini inap lukim olkain piksa nogut bilong maritpasin long TV, Intenet, ol buk, na ol magasin.

Profesa na meri bilong raitim buk, Diane Levin i tok: “Long nau ol pikinini i wok long kisim save long maritpasin, tasol hevi i kamap long rot bilong wanem save ol i kisim, na ol i gat hamas krismas taim ol i kisim dispela save, na husat i skulim ol. Olkain wok bisnis na lain i gat biknem, ol i save givim skul nogut long ol pikinini long ol samting bilong maritpasin.”

Ol papamama i mas lukautim gut ol pikinini bambai olkain tingting nogut bilong maritpasin i no ken bagarapim tingting bilong ol. (Sindaun 5:1; Efesus 6:⁠4) Ol pikinini i mas save long bodi bilong ol i wok olsem wanem, hau ol i ken lukautim gut skin bilong ol yet, na olsem wanem ol i ken lukautim ol yet bambai ol man nogut i no ken bagarapim ol. Paslain long pikinini meri i kamap tineja​—⁠em taim we sampela senis i kamap long bodi na i makim olsem em i wok long kamap bikpela​—⁠em i mas save long ol senis bai kamap long bodi bilong em na kliagut long wai na hau meri i save kisim sik mun. Olsem tasol, paslain long ol senis i kamap long bodi bilong ol pikinini man, ol tu i mas save olsem wara bai kamap long sem bilong ol taim ol i slip na driman. Taim ol pikinini i liklik yet, papamama i mas skulim ol long ol nem stret bilong olgeta wan wan hap bilong bodi. Ol gutpela papamama i save skulim ol pikinini long 3-pela bikpela samting em ol pikinini i mas save long en long sampela hap bilong bodi, olsem: (1) Ol dispela hap bilong bodi i spesel na i bilong ol yet tasol. (2) Ol i no ken mekim ol stori nogut long ol dispela hap bilong bodi. (3) Ol dispela hap bilong bodi i no bilong ol narapela long tatsim o lukim. Taim ol pikinini i wok long kamap bikpela, papamama i mas skelim gut wanem taim i stret long stori gut long ol long olsem wanem meri i save kisim bel. a

Wanem taim stret ol papamama i mas kirap skulim ol pikinini long dispela samting? Mobeta ol i kirap skulim ol long taim ol i liklik yet. Ating pikinini meri bai kisim sik mun long taim em i gat 10-pela krismas o paslain liklik long en. Ating taim pikinini man i gat 11 o 12-pela krismas, wara bai kamap long sem bilong em taim em i slip na driman. Ol dispela senis i kamap long bodi inap givim kain kain tingting long pikinini sapos em i no kliagut long as na ol dispela samting i kamap. Olsem na paslain long ol dispela senis i kamap, ol pikinini i mas kisim save olsem i no gat rong long ol dispela senis i kamap long bodi bilong ol. Na tu, em i gutpela taim bilong helpim ol pikinini long kliagut long as na em i bikpela samting long bihainim lo bilong Baibel long stretpela pasin​—⁠em samting we planti wok na program bilong gavman i no mekim.​—⁠Sindaun 6:​27-35.

[Futnot]